ᓱᓇᑐᐃᓐᓇᓄᑦ ᑐᑭᓯᐅᑎᑦᓭᑦ

 


ᐃᓚᐅᔪᑦ ᐳᓖᓯᓄᑦ ᐋᓰᐃᐊᒻᐲᒃᑯᓄᑦ ᕿᒧᑦᓯᑐᑦ 1957-ᒥ.


ᑲᑎᕕᐅᑉ ᐳᓖᓯᖏᑦᑕ ᐱᒋᐊᕐᐸᓕᐊᓯᒪᓂᖏᑦ

1936-ᒥ ᐋᓰᐃᐊᒻᐲᒃᑯᑦ Royal Canadian Mounted Police (RCMP) ᑐᓪᓕᕆᐅᕐᓯᒪᔪᑦ ᐳᐊᑦ ᐋᔨᓴᓐᒧᑦ ᐅᓪᓗᒥ ᐊᑎᖃᓕᕐᑐᒧᑦ ᐃᓄᑦᔪᐊᒥᒃ. ᐅᒥᐊᕐᕈᐊᖅ ᐊᑎᓕᒃ "ᐅᑭᐅᕐᑕᑑᑉ ᓂᒡᒋᖓᓂ ᐃᑉᐱᒍᓱᑦᑎ" ᐃᑉᐱᒍᓱᒋᐊᕐᑐᖃᑦᑕᓯᒪᔪᖅ ᓯᑦᔭᖏᓐᓂᒃ ᐃᓅᓕᑦᓯᒋᐊᕐᓂᓄᑦ ᐱᔭᑦᓴᖃᓕᕋᒥᒃ. ᑭᖑᓂᐊᐱᐊᒍᑦ 1936, ᐋᓰᐃᐊᒻᐲ ᐳᓖᓰᑦ ᓄᓇᕕᒻᒥ ᓄᓇᓕᓕᒫᓂ ᐃᓕᐅᕐᖃᓯᒪᓕᕐᑐᕕᓃᑦ.


1961-ᒥ, ᑯᐯᒃᑯᑦ ᐳᓖᓯᖏᑦ Surete du Quebec (S.Q) ᓯᖏᑦᓯᓯᒪᔪᑦ ᐋᓰᐃᐊᒻᐲᒃᑯᓂᒃ ᑭᖑᓂᖓᒍᑦ ᑐᑭᑖᕈᑎᐅᑉ ᑯᐯᑉ ᑲᕙᒪᖓ ᑎᒍᓯᓚᖓᓕᕐᑎᓗᒍ ᐃᓗᐃᒃᑲᑎᒍᑦ ᐊᐅᓚᑦᓯᓂᖃᓚᖓᓂᕐᒥᒃ ᓄᓇᒥ. SQ-ᐅᑉ ᓯᕗᓪᓕᐹᖅ ᐳᓖᓯᖏᑦᑕ ᐊᓪᓚᕕᖓ ᓄᐃᑕᐅᔪᕕᓂᖅ ᑰᑦᔪᐊᕌᐱᒥ ᐊᑎᖃᕐᑎᑕᐅᓯᒪᒻᒥᔪᒥ ᑯᔦᑦ ᕗᐃᓪ ᕆᕙ ᐊᒻᒪᓗ ᐱᖓᓲᔪᕐᑐᑦ ᑕᕐᕿᑦ ᓈᑎᓪᓗᒋᑦ ᑰᑦᔪᐊᒥ (ᐊᑎᖃᕐᑎᑕᐅᓯᒪᒻᒥᔪᖅ ᕗᐊᑦ ᓭᒧ). 1961-ᒍᓚᐅᕐᑎᓇᒍ, SQ ᓄᓇᕕᓕᐊᖃᑦᑕᑐᕕᓃᑦ ᐃᓕᔨᓪᓚᕆᒋᐊᕐᑐᓱᑎᒃ ᐱᖁᔦᑦ ᒪᓕᑦᑕᐅᒋᐊᖃᕐᓂᖏᓐᓂᒃ ᐋᓰᐃᐊᒻᐲᒃᑯᑦ ᑲᒪᓂᖃᕐᑎᓗᒋᑦ ᐱᒻᒪᕆᑎᒍᑦ ᐱᖁᔦᑦ ᓯᖁᒥᑕᐅᒻᒪᑕ.

1975-ᒥ ᔦᒥᔅ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑎᒃ ᐊᑎᓕᐅᕐᕕᐅᔪᕕᓂᖅ ᐊᖏᔪᕐᓓᑦ ᐊᓯᑦᔨᑐᕐᑕᐅᓚᕿᑎᓪᓗᒋᑦ ᐳᓖᓯᓄᐊᖓᔪᑦ ᓄᓇᕕᒻᒥ. ᐊᖏᖃᑎᒌᒍᑎᖓ SQ ᐊᒻᒪᓗ ᓄᓇᓕᑐᖃᑦᓴᔦᑦ ᓄᐃᑕᐅᔪᕕᓂᖅ ᐃᖏᕐᕋᓯᑎᑕᐅᓚᖓᓕᕐᑎᓗᒍ ᓄᓇᖃᕐᖄᑐᕕᓃᑦ ᐳᓖᓯᖃᕐᓂᖏᓐᓄᑦ ᐱᓇᓱᒐᖅ. ᐊᓪᓓᑦ ᑯᔩᑦ ᓯᕗᓪᓕᐸᐅᑦᓱᑎᒃ ᐃᖏᕐᕋᓯᑎᑦᓯᔪᕕᓃᑦ ᐱᓇᓱᒐᕐᒥᒃ 1978-ᒥ ᑌᒪ ᑭᖑᓂᖓᒍᑦ ᓇᔅᑲᐲᑦ ᐊᒻᒪᓗ ᐃᓄᐃᑦ 1980-ᒥ.




SQ ᑭᒡᒐᑐᕐᑎᖏᑦ ᐃᓚᒋᑦᓱᒋᑦ ᐃᓄᐃᑦ ᐳᓖᓯᐅᒍᒪᓂᕐᒥᓂᒃ ᑲᔪᓯᑎᑦᓯᔪᑦ.

ᐃᓄᐃᑦ ᐱᔭᕇᑦᓯᐊᓯᒪᔪᑦ ᓄᓇᖃᕐᖄᑐᕕᓃᑦ ᐳᓖᓯᐅᓂᕐᓄᑦ ᐃᓕᓴᕐᑕᐅᓂᖏᓐᓄᑦ ᐱᓇᓱᒐᕐᒥᒃ, ᑐᕌᖓᒍᑎᖃᓪᓚᕆᑦᓱᑎᒃ ᐳᓖᓯᖁᑎᑖᕆᔭᐅᖃᑦᑕᓕᕐᑐᕕᓃᑦ SQ-ᒧᑦ. ᐃᓘᓐᓇᑎᒃ ᑐᕌᒍᑎᖃᓪᓚᕆᑦᑐᑦ ᐳᓖᓰᑦ ᐃᑉᐱᒋᔭᐅᓂᖃᖃᑦᑕᑐᕕᓃᑦ ᐃᓚᐅᔪᑐᐃᓐᓇᒧᑦ.

ᑲᑎᕕᐅᑉ ᐳᓖᓯᖏᑦ ᓄᐃᑕᐅᔪᕕᓃᑦ 1996-ᒥ ᐃᓚᒋᔭᐅᑎᓪᓗᒍ ᓄᐃᑦᓯᔪᓄᑦ Solicitor General of Canada ᐊᒻᒪᓗ Ministère de la Sécurité publique (ᑭᓇᓕᒫᒃᑯᑦ ᐊᑦᑕᓀᑦᑐᒦᑦᑎᑕᐅᕕᖓ) ᒪᓕᑦᓱᒋᑦ ᑌᒣᒋᐊᖃᕐᓂᕃᓃᑦ ᔦᒥᔅ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑎᐅᑉ ᐊᒻᒪᓗ ᒪᓕᑦᓱᒋᑦ ᓯᐊᒃᓴᓐ 369-ᖏᓐᓃᑐᑦ ᐊᒻᒪᓗ 370-ᖏᓐᓃᑐᑦ ᐱᖁᔭᐅᑉ ᐱᑦᔪᑎᓕᐅᑉ ᓄᓇᓖᑦ ᑲᕙᒫᐱᖏᓐᓂᒃ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ.


ᐱᔭᐅᒋᐊᓚᖓᔪᓂᒃ ᓯᕗᓂᓕᐅᕐᓯᒪᐅᑏᑦ

ᑲᑎᕕᐅᑉ ᐳᓖᓯᖏᑦᑕ ᐱᓇᓱᒐᕆᕙᐅᒃ ᐊᒻᒪᓗ ᐃᓘᓐᓇᖏᑦᑕ ᐃᓚᐅᔪᑦ ᑖᒃᑯᓄᖓ ᓄᐃᑕᑎᑦᓰᓇᕐᓂᖅ ᓄᓪᓚᖓᓐᓇᑐᒥᒃ, ᐊᒻᒪᓗ ᑭᓇᓕᒫᒃᑯᑦ ᐊᑦᑕᓀᑦᑐᒦᓐᓂᖏᓐᓂᒃ ᓄᓇᒥ, ᐱᖁᔭᕐᓂᒃ ᓯᖁᒥᑦᓯᑎᑦᓯᑌᓕᓂᖅ ᐊᒻᒪᓗ ᓄᓇᓖᑦ ᑲᕙᒫᐱᖏᑦᑕ ᐱᖁᔮᐱᖏᓐᓂᒃ ᓯᖁᒥᑦᓯᑎᑦᓯᑌᓕᓂᖅ, ᒪᓕᒐᖕᖑᑎᓯᒪᔭᖏᓐᓂᒃ ᑫᐋᔩᑉ, ᐊᒻᒪᓗ ᐱᖁᔭᖏᓐᓂᒃ ᑯᐯᑉ ᐳᔮᕓᓐᓯᖓᑕ ᐊᒻᒪᓗ ᐱᖁᔭᕐᓂᒃ ᓯᖁᒥᑦᓯᔪᑦ ᕿᓂᕐᐸᓗᒋᑦ.

 

ᓯᕗᕐᓂᒧᑦ ᑕᑯᓐᓇᑕᖏᑦ

ᑲᑎᕕᐅᑉ ᐳᓖᓯᖏᑦᑕ ᓯᕗᓂᕐᒥ ᑕᑯᓐᓇᑕᖏᑦ ᒪᓂᔨᓯᒪᓂᖅ ᓄᓇᕕᐅᑉ ᐃᓄᖏᓐᓄᑦ ᐱᐅᓂᕐᐹᓂ ᐱᓇᓱᑦᑎᒪᕆᐅᓂᕐᓄᑦ, ᓲᓱᑦᓴᕈᑎᓂᒃ ᐊᒻᒪᓗ ᐃᓱᕐᕆᓇᕐᑐᓂᒃ ᐳᓖᓰᑦ ᑭᒡᒐᑐᕈᑎᖏᓐᓂᒃ ᐊᒻᒪᓗ ᐱᒋᐊᕐᕕᓕᐅᑎᖕᖑᓗᑎᒃ ᐳᓖᓰᑦ ᑭᒡᒐᑐᕈᑎᖏᓐᓂᒃ ᓄᓇᓕᖏᓐᓂ ᐃᓄᐃᑦ ᐊᒻᒪᓗ ᓄᓇᖃᕐᖄᑐᕕᓃᑦ, ᑕᒪᖏᑎᒍᑦ ᐃᖏᕐᕋᑎᑦᓯᒍᓐᓇᓯᓂᑎᒍᑦ ᐊᒻᒪᓗ ᐊᐅᓚᑦᓯᒍᓐᓇᓯᓂᑎᒍᑦ.



ᐱᒍᒪᓪᓚᕆᐅᑎᖏᑦ

ᑲᑎᕕᐅᑉ ᐳᓖᓯᖏᑦ ᐅᑉᐱᕆᔭᖃᕐᐳᑦ ᐊᕐᖁᑎᒋᓗᒋᑦ ᐊᑑᑎᑎᑕᐅᓂᖏᑦ ᐊᓐᓂᓇᕐᑐᖁᑎᒋᔭᐅᓲᑦ ᐃᓘᓐᓀᓄᑦ ᓇᓗᓀᕐᑕᐅᔪᑦ ᑕᑲᒃᑯᓇᓂ, ᓄᓇᕕᒻᒥ ᐱᐅᔪᒻᒪᕆᓐᓂᒃ ᐳᓖᓯᖃᕐᑎᓯᓂᕐᓄᑦ ᐱᓚᕿᒐᔭᕆᐊᒥᒃ

  • ᐳᕐᑐᓂᕐᐹᑦ ᓈᒻᒪᑐᓕᓂᕐᓄᑦ ᐊᒻᒪᓗ ᐱᐅᓯᕐᓲᑎᐅᑦᓯᐊᑐᑦ ᒪᓕᒉᑦ. ᐱᒐᓱᐊᒻᒪᕆᐅᑎᙯᓐᓇᓂᖅ ᓄᐃᑕᑎᑦᓯᖏᓐᓇᕆᐊᖃᕐᓂᒥᒃ ᑭᓇᓕᒫᒃᑯᓄᑦ ᑕᑎᒋᔭᐅᓂᕐᒥᓂᒃ ᐊᒻᒪᓗ ᓇᔪᕐᑎᙯᓐᓇᓗᑎᒃ ᐸᓯᔭᑦᓴᖑᕐᑌᓕᓂᕐᓂᒃ ᐃᓄᓐᓄᑦ ᐊᕐᖁᑎᒋᓗᒋᑦ ᐃᓘᓐᓇᑎᒃ ᐱᓇᓱᑦᑎᖏᑦ ᐊᒻᒪᓗ ᐊᑭᓕᕐᑐᑕᐅᒐᑎᒃ ᐃᓱᒪᒥᑦᓱᑎᒃ ᐱᓇᓱᐊᕈᑦᔨᔪᑦ.
  • ᐱᓇᓱᑦᑎᖁᑎᕗᑦ ᐱᒻᒪᕆᐅᓂᕐᐸᐅᑎᓗᒋᑦ ᐱᖁᑎᒻᒪᕆᒋᔭᕗᑦ ᐊᒻᒪᓗ ᐱᓇᓱᐊᖃᑎᒌᑦᓯᐊᓂᒃᑯᑦ, ᓲᓱᒋᐅᑎᓂᒃᑯᑦ, ᐊᒻᒪᓗ ᐃᑲᔪᕐᑎᒌᓐᓂᑯᑦ ᓄᓇᓖᑦ ᑭᒡᒐᑐᕐᑕᐅᓯᐊᕐᓂᐸᐅᒍᓐᓇᒪᑕ.
  • ᐳᓖᓯᐅᑉ ᐱᓇᓱᒐᖓ ᓱᕐᖁᐃᑕᐅᓯᒪᔪᖅ ᓄᓇᓕᓐᓄᑦ ᑭᒡᒐᑐᕐᑕᒥᓄᑦ ᐊᒻᒪᓗ ᐊᕐᖁᑎᒋᑦᓱᒍ ᐱᓇᓱᐊᖃᑎᖃᑦᓯᐊᓂᖅ ᓄᓇᓖᑦ ᐃᓄᖏᓐᓂᒃ ᐳᓖᓰᑦ ᐱᐅᓯᐅᒥᑎᑦᓯᒍᓐᓇᓲᑦ ᐃᓅᓯᖏᓐᓂᒃ ᐊᕐᖁᑎᒋᑦᓱᒋᑦ ᐊᐅᒡᒉᓯᒪᒍᓐᓇᓃᑦ ᐊᒻᒪᓗ ᐃᑯᓪᓚᑎᕆᓯᒪᓃᑦ ᐱᖁᔦᑦ ᓯᖁᒥᑕᐅᓂᖏᓐᓂᒃ.
  • ᐳᓖᓰᑦ ᐊᒻᒪᓗ ᓄᓇᓖᑦ ᐊᕕᑦᓯᒪᒍᑎᖃᕐᐳᑦ ᑲᒪᒋᔭᐅᒋᐊᖃᕐᓂᖏᓐᓂᒃ ᐱᖁᔦᑦ ᓯᖁᒥᑕᐅᑦᑌᓕᓂᖏᓐᓂᒃ ᐊᒻᒪᓗ ᐃᓄᐃᑦ ᑭᓇᓕᒫᒃᑯᑦ ᐊᑦᑕᓀᑦᑐᒦᓐᓂᖏᓐᓂᒃ.
  • ᐱᔪᓐᓇᓂᕗᑦ ᐱᒍᒪᓪᓚᕆᐅᑎᑦᑎᓃᑦᑐᓂᒃ ᓱᕐᖁᐃᑕᐅᒍᑎᖃᓲᖅ ᑲᒪᒋᔭᖃᑦᓯᐊᓂᑦᑎᒍᑦ ᑭᓇᑐᐃᓐᓇᑯᓐᓂᒃ ᑭᒡᒐᑐᕈᑎᑦᑎᒍᑦ, ᖃᓄᓕᒫᕈᓐᓇᓂᑦᑎᒍᑦ ᐊᒻᒪᓗ ᐱᐅᓂᖏᓐᓄᑦ ᐱᓇᓱᐊᖃᑎᒌᑦ ᐱᒃᑭᓂᐅᓂᖏᓐᓄᑦ ᐊᒻᒪᓗ ᕿᓂᕐᐸᓱᑕ ᐱᓇᓱᑦᑎᓴᓂᒃ ᐊᒻᒪᓗ ᓄᕐᙯᓇᕐᑎᑌᓕᑦᓱᒋᑦ ᐊᑕᐅᓯᐅᑦᑎᑐᑦ ᑌᒣᑦᑐᓂᒃ ᐱᓯᑎᐅᒍᑎᓖᑦ.
  • ᓄᓇᓕᓐᓂᒃ ᐱᓇᓱᐊᖃᑎᖃᕈᓐᓇᐅᑎᑦᓴᑎᓂᒃ ᕿᓂᕐᐸᑐᒍᑦ ᑐᑭᓯᑦᓯᐊᓂᕐᓴᐅᒍᒪᒧᑦ ᖃᓄᐃᑦᑑᓂᖏᓐᓂᒃ ᓄᓇᓕᓐᓂ ᐱᓀᓗᑌᑦ ᐊᒻᒪᓗ ᓄᐃᑦᓯᒍᒪᒧᑦ ᑐᑭᖃᑦᓯᐊᑐᓂᒃ ᐊᒻᒪᓗ ᐃᑲᔪᕐᑎᒌᒍᑕᐅᑦᓯᐊᑐᓂᒃ ᐋᕐᖀᒍᑎᑦᓴᓂᒃ ᑖᒃᑯᓂᖓ ᐱᓀᓗᑕᕐᓂᒃ.
  • ᐱᕙᓪᓖᒐᓱᐊᑦᓯᐊᐸᑦᑐᒍᑦ ᐱᓯᑎᐅᓂᖏᓐᓂᒃ ᐃᓘᓐᓇᖏᑦᑕ ᐱᓇᓱᑦᑏᑦ ᐱᓚᕿᖁᒧᑦ ᐱᔪᑦᓴᐅᔮᕐᓂᓂᒃ, ᐃᓱᒪᑕᐅᒍᑎᑦᓴᓂᒃ, ᑲᒪᑦᓯᐊᕈᑎᑦᓴᓂᒃ ᐊᒻᒪᓗ ᐱᓇᓱᑦᑎᒪᕆᑦᑎᑐᑦ ᐱᐅᓯᖃᕈᑎᑦᓴᖏᓐᓂᒃ, ᓄᐃᑕᑎᖏᓐᓇᓗᒋᑦ ᐃᑉᐱᒍᓱᓐᓃᑦ ᐱᓇᓱᒐᕐᒥᓂᒃ ᓈᒻᒪᓴᓐᓂᒥᒃ, ᕿᓚᓈᕈᑎᖃᕐᓂᒥᒃ, ᐊᑦᑕᓀᑦᑐᒦᓐᓂᒥᒃ ᐊᒻᒪᓗ ᓇᒻᒥᓂᖅ ᐱᓇᓱᒐᕐᒥᓂᒃ ᐱᕙᓪᓕᐊᑎᑦᓯᕙᓪᓕᐊᓯᐊᕐᓂᒥᒃ.
  • ᐅᓄᕐᓯᕙᓪᓕᐊᑎᓗᒋᑦ ᐱᕕᓕᒫᒥᒍᑦ ᐃᓱᕐᕆᓇᕐᑐᐃᑦ ᐊᑐᐃᓐᓀᑦ ᐱᓇᓱᐊᕈᑎᑦᓭᑦ ᐱᓇᓱᑦᑏᓗ, ᑕᒪᖏᓐᓂ ᓇᒻᒥᓂᖏᓐᓅᓕᖓᔪᑦ ᐊᒻᒪᓗ ᑮᓇᐅᔭᖃᕐᑎᑕᐅᒍᑏᑦ ᐱᕙᓪᓕᖁᑎᑖᕐᐸᓕᐊᑦᓯᐊᑎᓪᓗᒋᑦ, ᓄᓇᓕᒥᐅᑦ ᒪᓂᒪᔭᐅᖁᓇᕐᓂᖏᓐᓄᑦ ᐱᐅᓂᕐᐹᑎᒍᑦ ᑭᒡᒐᑐᕐᑕᐅᒍᑎᓄᑦ.
  • ᐅᓪᓗᒥᓂᑕᑦᓯᐊᑦ ᐱᓇᓱᐊᕈᑏᑦ ᐃᓱᕐᕆᓇᕐᑐᑦ ᐊᒻᒪᓗ ᑲᔪᓯᓂᖏᑦ ᐅᓪᓗᒥᓂᑕᕐᓯᐅᑎᓂᒃ ᐃᓕᓐᓂᐊᑎᑕᐅᓃᑦ ᓄᐃᑕᖏᓐᓇᖁᓪᓗᒋᑦ ᐊᒻᒪᓗ ᐱᕙᓪᓕᐊᖏᓐᓇᓯᐊᖁᓪᓗᒋᑦ ᐳᓖᓰᑦ ᑭᒡᒐᑐᕈᑎᖏᑦ ᓄᓇᓕᒥᐅᓂᒃ.


SQ ᐳᓖᓯᖏᑦ ᑰᑦᔪᐊᒥ ᐳᓖᓯᒃᑯᑦ ᓵᖓᓂ 1980-ᒥ

ᐳᓖᓯᖃᕐᓂᖅ

ᑲᑎᕕᐅᑉ ᐳᓖᓯᖏᑦ ᑲᔪᓯᑎᑦᓯᓲᑦ ᐳᓖᓯᐅᓂᑐᐃᓐᓀᑦ ᑭᒡᒐᑐᕈᑎᖏᓐᓂᒃ ᐊᓪᓚᕕᖁᑎᖃᕐᓱᑎᒃ ᐃᓘᓐᓀᓂ ᓄᓇᓕᓐᓂ. ᓄᓇᓕᓐᓂ ᐊᓪᓚᕕᖏᑦ ᐳᓖᓯᓐᓂᐊᕕᖏᑦ ᐱᖓᓱᓂᒃ ᐳᓖᓯᑦᑕᖃᓲᑦ, ᐅᑯᓇᓂᐅᖕᖏᑐᐃᓐᓇᑐᖅ ᑰᑦᔪᐊᕌᐱᒃ, ᐃᓄᑦᔪᐊᖅ, ᓴᓪᓗᐃᑦ, ᐳᕕᕐᓂᑐᖅ ᐊᒻᒪᓗ ᑰᑦᔪᐊᖅ, ᑐᑭᓕᕇᓐᓂᖏᑦ ᐃᒣᓕᖓᒻᒪᑕᓕ ᑖᒃᑯᐊ ᓯᑕᒪ, ᑕᓪᓕᒪᑦ, ᐱᖓᓲᔪᕐᑐᑦ, ᓯᑕᒪᐅᔪᖕᖏᒐᕐᑐᑦ ᐊᒻᒪᓗ ᓯᑕᒪᐅᔪᕐᑐᑦ ᐳᓖᓰᑦ. ᐊᓪᓚᕕᒻᒪᕆᖓ ᑲᑎᕕᐅᑉ ᐳᓖᓯᖏᑦᑕ ᑰᑦᔪᐊᒦᑦᑐᖅ.

ᓄᓇᕕᒻᒥ ᖃᐅᔨᓴᕐᕕ ᓄᐃᑕᐅᓯᒪᔪᖅ 2009-ᒥ ᐱᕙᓪᓕᑎᒋᐊᕐᓱᒋᑦ ᐊᕕᑦᑕᐅᓯᒪᓂᖏᑦ ᓯᓚᑐᓃᑦ ᐊᒻᒪᓗ ᐱᓯᑎᐅᒍᑏᑦ ᑲᑎᕕᐅᑉ ᐳᓖᓯᖏᓐᓂ ᐊᒻᒪᓗ ᑯᐯᑉ ᐳᓖᓯᖏᓐᓂ Sûreté du Québec (SQ). ᐊᑕᐅᓯᖅ ᑲᑎᕕᐅᑉ ᐳᓖᓯᖏᓐᓄᑦ ᐃᓚᐅᔪᖅ ᐊᒻᒪᓗ ᓯᑕᒪᑦ SQ-ᒧᑦ ᐃᓚᐅᔪᑦ ᑰᑦᔪᐊᒦᑦᑐᑦ, ᖃᐅᔨᓴᕐᕕᒃ ᐃᑉᐱᒋᔭᖃᓪᓚᕆᕝᕕᐅᔪᖅ ᐋᖓᔮᓐᓇᑐᐃᑦ ᐊᒻᒪᓗ ᐃᒥᐊᓗᐃᑦ ᓂᐅᕐᕈᑕᐅᓂᖏᓐᓂᒃ, ᐊᒻᒪᓗ ᐱᖁᔦᑦ ᓯᖁᒥᑕᐅᓂᖏᓐᓂᒃ ᐃᑦᓯᒍᓱᓐᓂᓄᐊᖓᔪᓂᒃ. ᐊᒻᒪᓗ, ᑲᑎᕕᐅᑉ ᐳᓖᓯᖏᑦ ᐱᖁᔦᑦ ᓯᖁᒥᑕᐅᓂᖏᓐᓄᑦ ᓯᓚᑦᑐᓂᖁᑎᓕᒃ ᐳᓖᓯᒥᒃ ᑲᒪᒋᔭᖃᓪᓚᕆᓲᒥᒃ ᐋᖓᔮᓐᓇᑐᐃᑦ ᓂᐅᕐᕈᑕᐅᓂᖏᓐᓂᒃ ᐊᒻᒪᓗ ᐃᒥᐊᓗᐃᑦ ᑕᒪᒃᑯᐊ ᐱᓇᓱᐊᕐᑕᐅᓂᖏᓐᓂᒃ ᑲᒪᔨᐅᑦᓱᓂ. ᐱᓇᓱᒐᖓ ᑮᓇᐅᔭᖃᕐᑎᑕᐅᔪᖅ ᐊᕐᖁᑎᒋᑦᓱᒍ ᐅᖓᓗᒃ ᐱᓇᓱᒐᖅ ᑐᕌᖓᔪᖅ ᓄᓇᓕᓐᓄᑦ ᐊᑦᑕᓀᑦᑐᒦᑦᑐᓄᑦ. ᐳᓖᓯᐅᑉ ᐱᓇᓱᐊᒐᖏᑦᑕ ᐃᓚᖓ ᐳᑯᓐᓂᖅ ᑐᑭᓯᐅᑎᑦᓴᓂᒃ ᓄᓇᓕᓐᓂᑦ ᐊᑐᕐᑕᐅᒋᐊᖃᕋᔭᕐᑐᓂᒃ ᓄᐃᑕᐅᓂᖏᓐᓄᑦ ᕿᓈᔭᕐᕕᖃᕈᓐᓇᐅᑏᑦ ᐅᕝᕙᓘᓐᓃᑦ ᑎᒍᓯᓃᑦ ᓄᓇᓖᑦ ᐱᖁᔮᐱᖏᑦᑕ ᐊᑖᒍᑦ.

ᓄᓇᖃᕐᖄᑐᕕᓃᑦ ᑐᕌᒐᓪᓚᕆᓖᑦ ᐱᖁᔭᕐᓂᒃ ᐊᑑᑎᑎᑦᓯᓂᕐᓄᑦ ᐱᒋᐊᕐᑏᑦ ᑲᑐᑦᔨᔪᑦ (A-CFSEU) ᐊᓯᒋᒻᒥᔭᖓ ᑲᑐᑦᔮᓕᓐᓂᒃ ᐳᓖᓯᖃᕐᑎᓯᒍᑎᒃ ᐃᓚᐅᕕᐅᑦᓱᓂ ᐋᓰᐃᐊᒻᐲᒃᑯᓄᑦ, SQ-ᒧᑦ ᐊᒻᒪᓗ ᓄᓇᖃᕐᖄᑐᕕᓃᑦ ᐳᓖᓯᖏᓐᓄᑦ ᑭᒡᒐᑐᕐᓂᓄᑦ ᑯᐯᓕᒫᒥ.

 

ᑮᓇᐅᔭᖃᕐᑎᓯᐅᑏᑦ

ᐱᖓᓱᐃᓄᑦ ᐃᓚᐅᕕᐅᔪᖅ ᐊᖏᖃᑎᒌᒍᑎᒃ ᐊᑑᑎᖃᓚᖓᔪᖅ ᐁᐸᔭᓕ 1, 2014 ᐊᒻᒪᓗ ᒫᑦᓯ 31, 2018 ᐊᑯᓐᓂᖓᓂ, ᑲᑎᕕᐅᑉ ᐳᓖᓯᖏᓐᓂᒃ ᑮᓇᐅᔭᖃᕐᑎᓯᐅᑕᐅᔪᖅ. ᒪᓕᓪᓗᒋᑦ ᒪᓕᑦᑕᐅᓲᑦ ᑲᕙᒪᑐᖃᒃᑯᑦ-ᑯᐯᒃ ᑲᕙᒪᖓᑕ ᑮᓇᐅᔭᖃᕐᑎᓯᐅᑎᖏᑦ ᐊᕕᑦᑕᐅᓯᒪᔪᑦ ᐊᑖᒍᑦ ᓄᓇᓕᑐᖃᑦᓴᔦᑦ ᐳᓖᓯᖃᕐᓂᓄᑦ ᐱᓇᓱᒐᖓᑕ. ᑲᓇᑕ ᒪᓂᔨᓯᒪᔪᖅ 52%-ᖏᓐᓂᒃ ᐊᒻᒪᓗ ᑯᐯᒃ 48%-ᖏᓐᓂᒃ ᑮᓇᐅᔭᖃᕐᑎᓯᐅᑎᓂᒃ ᐊᑖᒍᑦ ᐱᖓᓱᐃᓄᑦ ᐃᓚᐅᕕᐅᔫᑉ ᐊᖏᖃᑎᒌᒍᑎᐅᑉ. ᒪᕐᕈᐃᑦ ᐊᖏᖃᑎᒌᒍᑎᖓ ᑯᐯᒃᑯᓂᒃ ᑕᕝᕗᖓᑦᓭᓇᖅ ᐱᑦᔪᑎᒋᑦᓱᒋᑦ ᐳᓖᓰᑦ ᑭᒡᒐᑐᕐᓂᖏᑦᑕ ᑲᔪᓯᑎᑕᐅᓂᖏᑦ ᓄᓇᓕᓐᓂ ᐊᑑᑎᓂᖃᕐᒥᔪᖅ.

ᑮᓇᐅᔭᖃᕐᑎᓯᐅᑎᒋᐊᓪᓓᑦ ᐱᔭᐅᓯᒪᔪᑦ ᑲᑎᕕᐅᑉ ᐳᓖᓯᖏᓐᓄᑦ ᐊᑖᓂᑦᑎᓗᒋᑦ ᑎᓕᔨᒍᑎᐅᑉ B.11-ᖏᓐᓃᑐᑦ ᐊᖏᖃᑎᒌᒍᑎᐅᑉ ᐱᑦᔪᑎᓕᐅᑉ ᐃᓗᐃᒃᑲᓂᒃ ᑮᓇᐅᔭᖃᕐᑎᑕᐅᒍᑎᖏᓐᓂᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ (ᓯᕗᓂᕐᒧᑦ ᐊᖏᖃᑎᒌᒍᑎᒃ) ᑐᕌᖓᔪᑦ ᑲᔪᓯᑎᑕᐅᓂᖏᓐᓄᑦ ᐃᑉᐱᒍᓱᑦᑎᖃᓂᕐᓄᑦ ᑭᒡᒐᑐᕈᑎᓄᑦ ᐊᕐᕕᑕᕐᑏᑦ ᐃᕐᖃᑐᐃᔩᑦ ᐃᕐᖃᑐᐃᓂᖃᕐᑎᓗᒋᑦ ᐊᒻᒪᓗ ᐱᓯᒪᔪᑦ ᐊᓯᖏᓐᓂᑦ ᐱᖁᔦᑦ ᓯᖁᒥᑕᐅᑎᑕᐅᑦᑌᓕᓂᖏᓐᓄᑦ ᐱᓇᓱᐊᕋᑦᓴᓄᑦ, ᐳᓖᓯᑦᓴᓄᑦ ᐱᓇᓱᒐᕐᒧᑦ ᐊᒻᒪᓗ ᐳᓖᓰᑦ ᐃᓕᓐᓂᐊᑎᑕᐅᓂᖏᓐᓄᑦ.

ᑮᓇᐅᔭᖃᕐᑎᑕᐅᓂᕐᓄᑦ ᐅᖁᒣᑦᓴᕈᑎᒋᕙᑦᑕᖏᑦ ᑲᑎᕕᐅᑉ ᐳᓖᓯᖏᑦᑕ ᐃᑉᐱᒍᓱᑦᑎᖃᕐᓂᓄᑦ ᐊᒻᒪᓗ ᑎᒍᔭᐅᒪᔪᑦ ᐊᐅᓚᑕᐅᓂᖏᓐᓄᑦ ᑐᕃᓐᓇᑐᑎᒍᑦ ᑌᒣᑕᐅᓚᕿᐅᑕᐅᓯᒪᕙᑦᑐᖅ ᑎᒍᔭᐅᔪᑦ ᐅᓄᕐᓂᖏᓐᓄᑦ, ᑎᒍᔭᐅᒪᔪᑦ ᐊᓂᑎᑕᐅᓂᖏᓐᓄᑦ ᑭᓪᓕᓯᓂᐊᕐᓂᓄᑦ ᐊᒻᒪᓗ ᐃᕐᖃᑐᕐᑕᐅᔪᓄᑦ ᓄᓇᓕᓕᒫᓂ ᐊᕐᕕᑕᕐᑐᓄᑦ ᐃᕐᖃᑐᐃᔨᓄᑦ. ᐊᑭᒋᕙᑦᑕᖏᑦ ᑕᒪᒃᑯᐊ 15% ᓴᓂᐊᓃᒋᐊᖏᑦ ᒥᑦᓴᐅᓵᕐᑕᐅᓯᒪᔪᑦ ᑲᑎᕕᐅᑉ ᐳᓖᓯᖏᑦᑕ ᐃᖏᕐᕋᓂᕐᓄᑦ ᐸᑦᔭᖏᓐᓄᑦ. ᑲᑎᕕᐅᑉ ᐳᓖᓯᖏᑦ ᐊᒻᒪᓗ ᐱᓇᓱᐊᖃᑎᒋᓲᖏᑦ ᓇᓗᓀᕐᓯᒍᓐᓇᖏᐅᒪᔪᑦ ᐋᕐᕿᑲᐱᒍᑎᒋᒐᔭᕐᑕᖏᓐᓂᒃ ᐊᑭᐅᕙᑦᑐᑦ ᐃᑯᓪᓚᐅᒥᓚᕿᓗᒋᑦ. ᐊᑐᖕᖏᓚᕿᐅᑏᑦ ᑖᒃᑯᓇᓂ ᐊᑐᐃᓐᓇᐅᑎᑦᓯᓚᕿᒐᔭᕐᑎᓗᒋᑦ ᑮᓇᐅᔭᖃᕐᑎᑕᐅᓕᐅᒥᓂᕐᓴᐅᑎᓪᓗᒋᑦ ᐳᓖᓰᑦ ᑭᒡᒐᑐᕈᑎᑐᐃᓐᓇᖏᑦ.