ᐳᓖᓰᑦ ᑲᒪᒋᒋᐊᓕᒥᓂᒃ ᐊᕐᓱᕈᕐᕕᖃᕐᓂᖏᑦᑕ ᐊᑦᔨᒌᖕᖏᓂᖏᑦ

ᐃᓘᓐᓇᑎᒃ ᐳᓖᓰᑦ ᐊᑦᑕᕈᓱᖕᖏᓗᐊᕆᐊᖃᖕᖏᓂᕐᒥᒃ ᑐᑭᓯᓂᕐᒥᓂᒃ ᐊᓂᒎᑎᑎᑦᓯᕙᒋᐊᓖᑦ ᐃᓕᓴᕐᓱᑎᒃ ᐳᓖᓯᐅᓂᕐᒥᒃ. ᐊᒻᒪᓗ, ᐃᓘᓐᓇᑎᒃ ᐳᓖᓰᑦ ᐱᓇᓱᕝᕕᖏᑦ ᓯᑎᔫᒍᑎᖃᕆᐊᖃᕐᐳᑦ ᒪᓕᒐᕐᓂᒃ ᐊᑦᑕᕈᓱᖕᖏᓗᐊᕐᓂᒧᐊᖓᔪᓂᒃ ᐱᓗᐊᓕᕋᑕᕐᓗᑎᒃ ᑲᒪᕙᒋᐊᖃᖕᖏᓂᕐᒧᑦ, ᑌᒣᓘᕆᔪᓪᓗ ᐃᑉᐱᒋᔭᐅᓪᓚᕆᒋᐊᖃᕐᓱᑎᒃ ᐊᒻᒪᓗ ᖃᐅᔨᓴᕐᑕᐅᕙᒋᐊᖃᕐᓱᑎᒃ ᑐᓴᕐᑎᓗᒋᓪᓗ ᓄᓇᓕᓐᓂ ᐊᑦᑕᓀᑦᑐᒦᑦᑎᓯᓂᕐᓄᑦ ᑐᕐᖃᑕᕐᕕᒥᒃ ᐳᓖᓰᑦ ᑲᒪᒋᔭᖃᕐᓗᑎᒃ ᑌᒣᓘᕆᔪᕕᓂᐅᑉᐸᑕ.

ᐊᑦᑕᕈᓱᖕᖏᓗᐊᕐᓂᖅ ᐱᓗᑲᕝᕕᖃᓕᕋᑕᕐᓗᓂ ᐃᓚᒋᔭᐅᔪᖅ ᐳᓖᓯᓐᓂᐊᓂᕐᓄᑦ ᒪᓕᒐᖃᕐᒪᑕ ᖃᓄᓪᓗᐊᑎᒋ ᑎᒍᒐᓱᐊᕐᑕᒥᓂᒃ ᐊᕐᓱᕈᕝᕕᖃᕆᐊᖃᕐᒪᖔᑕ ᓈᒻᒪᑐᓂᒃ ᑎᒍᒐᓱᐊᕐᓗᒋᑦ ᐊᑑᑎᕙᒋᐊᖃᕐᒪᑕ ᑕᒫᑦ ᑲᒪᒋᔭᖃᕆᐊᖃᓕᕈᑎᒃ. ᐃᓕᒃᑰᑎᑕᐅᓂᖃᕐᐳᑦ ᑕᓪᓕᒪᐅᓈᕐᑎᑎᓪᓗᒋᑦ ᑎᒍᓯᒐᓱᐊᕈᓯᖏᑦ, ᐱᒋᐊᕐᕕᐅᑎᓪᓗᒍ ᐊᕐᓱᕈᕐᕕᖃᓗᐊᖕᖏᓂᕐᐹᖅ ᑎᑭᓪᓗᒍ ᐊᕐᓱᕈᕐᕕᖃᕐᓂᐹᖅ ᑲᒪᒋᔭᒥᓂᒃ. ᐊᑐᓂᑦ ᐊᑑᑎᔭᖏᑦᑕ ᐊᕐᓱᕈᓐᓂᑕᖃᕐᓂᖏᑦ ᓇᓗᓀᕐᑐᐃᒍᑎᐅᒍᓐᓇᑎᓪᓗᒋᑦ ᖃᓄᐃᓘᖃᑎᖃᕐᓂᖏᓐᓂᒃ ᑲᒪᒋᔭᒥᑕ ᐳᓖᓰᑦ ᐳᓖᓯᓐᓂᐊᓗᑎᒃ ᐊᓂᒎᑎᑎᑦᓯᓯᐊᕐᐸᒋᐊᖃᕐᓂᒥᓄᑦ; ᐱᒋᐊᕐᕕᐅᒐᔭᕐᑐᑕᒐ ᐳᓖᓯᐅᑉ ᑲᒪᒋᓚᖓᔭᒥᓄᑦ ᑎᑭᕝᕕᖃᕐᓂᖓ, ᐊᒻᒪᓗ ᐃᓱᓕᕕᖃᕐᓱᓂ ᐊᑦᑕᕈᓱᖕᖏᓂᕐᐹᒍᓂᕐᒥᒃ.

  1. ᑲᒪᒋᒋᐊᓕᒥᓂᒃ ᑎᑭᕝᕕᖃᕐᓂᖅ (ᐁᕕᒥᓂᒃ ᐳᓖᓯᐅᓂᕐᒥᓄᑦ ᐊᐅᓚᑦᓯᔨᐅᓂᕐᒥᓄᑦ ᖃᓄᐃᓕᖕᙰᓚᕿᓂᖓ ᑖᓐᓇ ᑲᒪᒋᓯᔭᒥᓂᒃ)
  2. ᐅᖃᐅᑦᔪᐃᓂᖅ (ᑲᒪᒋᓯᔭᒥᓂᒃ ᑎᓕᐅᕆᓂᖅ ᐅᖃᐅᓯᑎᒍᑦ)
  3. ᓱᓇᒥᓪᓘᓃᑦ ᑎᒍᒥᐊᕋᓂ ᐊᐅᒡᒉᓯᒪᓂᖅ (ᑎᒍᒥᐊᕋᓂ ᕿᓈᔭᕐᕕᓕᒃ, ᐱᒋᐊᕈᑎᑦᓴᖓᓂᒃ ᑎᒍᔨᓐᓂᓂᖅ, ᕿᑲᕈᓐᓇᓯᑎᑦᓯᓂᖅ, ᐅᕝᕙᓘᓐᓃᑦ ᐸᓯᔭᕐᒥᒃ ᐊᐅᒡᒉᓯᒪᒍᓐᓇᓯᓂᖅ ᐊᓯᖏᑎᒍᑦ)
  4. ᐊᐅᒡᒉᓯᒪᒍᓐᓇᓯᒍᑏᑦ ᐱᒋᐊᕈᑎᑦᓭᑦ (ᐊᑐᕐᓗᒋᑦ ᑐᖁᑦᓯᒍᓐᓇᖏᑦᑐᑦ ᖃᓯᓕᓚᕿᓐᓇᑐᑦ, ᐃᑯᒪᐅᑎᐊᕈᕐᓅᑐᑦ ᐅᕝᕙᓘᓐᓃᑦ ᐊᐅᒡᒉᓯᒪᓚᖀᒍᓐᓇᑐᑦ ᐱᒋᐊᕈᑎᑦᓴᔦᑦ)
  5. ᓲᖑᓂᕐᐹᑦ ᐱᒻᒪᕆᐅᓂᕐᐹᑦ ᐊᐅᒡᒉᓯᒪᒍᑏᑦ (ᐊᑐᕐᓱᒋᑦ ᓱᒃᑯᐃᒪᕆᒍᓐᓇᑐᑦ ᐱᒋᐊᕈᑎᑦᓴᔦᑦ ᐸᓯᔭᒥᒃ)

ᑯᐯᒻᒥ, ᐆᑦᑑᑎᖃᕐᑎᑕᐅᓲᑦ ᐳᓖᓰᑦ ᐊᕐᓱᕈᕐᕕᖃᕐᓂᒥᒃ ᖃᓄᓪᓗᐊᑎᒋᒃ ᐊᑑᑎᑎᑦᓯᕙᒋᐊᖃᕐᓂᖏᑦ, ᑐᕌᒐᐅᑎᓪᓗᒍ ᑐᑭᓯᓇᕐᑎᓯᒍᓐᓇᓚᖓᓂᖅ ᐊᒻᒪᓗ ᑐᑭᓯᔭᐅᑎᑦᓯᒋᐊᖃᓚᖓᓂᖅ ᓱᓇᓄᑦ ᐊᕐᓱᕈᕐᕕᖃᕐᓂᒥᓂᒃ ᑎᒍᒐᓱᐊᕐᑕᒥᓂᒃ ᓱᒐᓗᓗᐊᕐᑎᓯᒋᐊᖃᕐᓂᒪᖔᕐᒥ.

ᐳᓖᓯ ᓱᓲᒍᒻᒪᖔᑦ

ᑕᑲᒃᑯᐊ ᐃᕐᓯᕖᑦ ᑕᑯᓗᒋᑦ, ᐳᓖᓯᐅᑉ ᑲᒪᒋᔭᖓᑕ ᖃᓄᐃᓘᕐᓂᖓ ᐃᑉᐱᒋᑦᓱᒍ, ᓱᒐᓗᕝᕕᐅᕙᓪᓕᐊᓂᖓ ᓲᖑᓯᕙᓪᓕᐊᑎᑕᐅᒋᐊᖃᓲᖅ ᐱᖕᖏᓂᕐᐹᒥᑦ ᐱᓗᐊᕐᓂᐹᒧᑦ:


ᖃᓄᖅ ᐊᕐᓱᕈᕐᕕᖃᕐᓂᖅ ᐊᑑᑎᑎᑕᐅᓲᒍᕙ?

ᐃᕐᓯᕕᓐᓂ, ᑕᑯᑫᓐᓇᕋᑦᑕ ᑕᓪᓕᒪᐅᓕᖓᔪᓂᒃ ᐊᕐᓱᕈᕐᕕᖃᕈᓯᓂᒃ ᐳᓖᓰᑦ ᐊᑑᑎᑎᓲᖏᓐᓂᒃ ᑲᒪᒋᒋᐊᓕᒥᓂᒃ ᑲᒪᓕᕋᒥᒃ:

  1. ᐊᖕᖔᑐᐃᓐᓇᑐᖅ: ᐳᓖᓯ ᐊᐅᒡᒉᓯᒪᒍᓐᓇᓯᔪᖅ ᑲᒪᒋᒋᐊᓕᒥᓂᒃ ᐊᒻᒪᓗ ᐸᓯᔭᖅ ᐊᖕᖔᑐᐃᓐᓇᓱᓂ;
  2. ᐊᖕᖔᖏᑦᑐᖅ: ᐸᓯᔭᖅ ᐳᓖᓯᒧᑦ ᐅᖃᐅᑦᔪᑕᐅᒍᑎᒥᓂᒃ ᓈᓚᖕᖏᑐᖅ, ᑎᒥᒥᒍᑦ ᐃᕐᓯᓇᕿᕕᖃᖕᖏᑲᓗᐊᕐᓱᓂ;
  3. ᖁᓄᔪᖅ: ᐸᓯᔭᖅ ᖁᓄᔪᖅ ᐅᕝᕙᓘᓐᓃᑦᖅ ᐳᓖᓯᒧᑦ ᐅᖃᐅᑦᔪᑕᐅᒍᑎᒥᓂᒃ ᓈᓚᖕᖏᑐᖅ;
  4. ᐊᑭᒪᔪᕐᑐᖅ ᐱᒋᐊᕐᓂᓱᓂ: ᐸᓯᔭᖅ ᓱᒐᓗᕝᕕᖃᕐᓱᓂ ᐳᓖᓯᒥᒃ ᖁᓄᔪᖅ ᐊᕐᓱᕈᕐᕕᒋᑦᓱᒍ ᐅᕝᕙᓘᓐᓃᑦ ᐃᓂᕐᑑᒪᓵᕆᑦᓱᓂ ᓱᒃᑯᐃᓚᖓᓂᕋᕐᓱᓂ ᑭᓇᑐᐃᓐᓇᒥᒃ (ᒥᖏᑏᔪᖅ, ᐃᑎᒻᒦᔪᖅ, ᐱᒋᐊᓚᖓᒋᐊᒥᒃ ᐊᑐᐃᓐᓇᕈᕐᑎᕙᓗᑦᑐᖅ);
  5. ᑎᒥᖓᓂᒃ ᓱᒃᑯᓚᖀᔪᖅ ᑐᖁᑦᓯᔪᕐᓘᓃᑦ: ᐳᓖᓯ ᐃᓕᒪᓱᓚᕿᔪᖅ, ᐱᑦᔪᑎᖃᑦᓯᐊᓱᓂ ᑕᑯᓐᓇᑕᒥᒍᑦ, ᑭᓇᑐᐃᓐᓇᐅᑉ ᐋᓐᓂᑕᐅᓚᕿᓚᖓᒋᐊᖓᓂᒃ ᐅᕝᕙᓘᓐᓃᑦ ᑐᖁᑕᐅᓚᖓᓯᓂᖓᓂᒃ.

 

ᓱᔪᖃᕐᒪᖔᑦ ᖃᐅᔨᓴᕐᓂᖅ

ᐃᓕᓴᕐᑕᐅᓱᑎᒃ ᐳᓖᓰᑦ ᐃᓕᓐᓂᐊᑎᑕᐅᓲᑦ ᐃᒣᒋᐊᖃᕐᓂᕋᕐᑕᐅᓱᑎᒃ:

  1. ᐳᓖᓯᐅᑉ ᑲᒪᒋᔭᑦᓴᓚᕆᖓ ᐃᓅᓯᕐᒥᒃ ᐊᓐᓇᑎᑦᓯᓂᖅ ᐊᒻᒪᓗ ᐅᖑᒪᑦᓯᓂᖅ;
  2. ᑐᕌᒐᓪᓚᕆᖏᑦ ᐃᓘᓐᓇᖏᑦᑕ ᐊᕐᓱᕈᕐᕕᖃᕐᓃᑦ ᐃᓄᓐᓂᒃ ᐊᑦᑕᓇᕐᑐᒨᕐᑎᓯᑦᑌᓕᓂᖅ;
  3. ᐳᓖᓯ ᐊᑦᑕᓀᑦᑐᒦᓪᓗᓂ ᑭᓯᐊᓂᐅᕗᖅ ᐃᓄᐃᑦ ᐊᑦᑕᓇᕐᑐᒨᓚᕿᓂᐊᖕᖏᒪᑕ.

ᑌᒣᒻᒪᑦ, ᖃᐅᔨᓴᓕᕈᑎᒃ ᐳᓖᓰᑦ ᓱᔪᖃᕐᒪᖔᑦ ᓱᕐᖁᐃᓯᕙᒋᐊᖃᕐᐳᑦ ᐱᖓᓲᔪᕐᑐᓂᒃ:

  • ᐊᕙᑎᖓ (ᐃᑯᒪᑕᖃᕐᓂᖓ, ᓯᓚ, ᓇᔪᕐᑕᖓ, ᐊᓯᖏᓪᓗ);
  • ᐃᓄᐃᑦ ᓇᔪᕐᑕᐅᔪᒦᖃᑕᐅᔪᑦ ᐅᓄᕐᓂᖏᑦ;
  • ᐸᓯᔭᐅᑉ ᐱᔪᓐᓇᓂᖏᑦᑕ ᖃᐅᔨᒪᔭᐅᓂᖏᑦ (ᓲᔫᓂᖓ, ᐃᒥᐊᓗᑦᓯᒪᒻᒪᖔᑦ ᐋᖓᔮᓐᓇᑐᕐᑐᓯᒪᒻᒪᖔᓪᓘᓃᑦ, ᐱᒋᐊᕈᑎᑦᓴᒥᒃ ᑎᒍᒥᐊᕐᒪᖔᑦ, ᐊᓯᖏᓪᓗ);
  • ᖃᐅᔨᒪᔭᐅᓂᖓ ᐃᓅᑉ ᐳᓖᓯᓐᓂᐊᑕᐅᒋᐊᓕᐅᑉ;
  • ᖃᑦᓯᖑᕐᓂᖓ ᐊᒻᒪᓗ ᓇᔪᕐᑕᖓᑕ ᐅᖓᓯᓐᓂᖓ (ᑐᐊᕕᕐᓗᑎᒃ ᐁᕕᖃᕆᐊᖃᕐᓂᒥᓄᑦ);
  • ᐃᓂᕐᑑᒪᓇᕐᓂᖓ ᖃᓄᓪᓗᐊᑎᒋᒃ ᓱᒃᑯᓚᖀᓚᖓᓗᓂ.

ᑕᑯᒐᓱᐊᕐᓗᒋᑦ ᓇᓗᓀᕐᓯᒍᑎᒻᒪᕇᑦ National Use of Force Model (ᑖᒃᑯᐊ ᐊᕐᓱᕈᕐᕕᖃᕐᓂᒧᑦ ᓱᒐᓗᕝᕕᖃᕐᓂᒧᑦ ᐆᑦᑐᕋᐅᑏᑦ) ᑐᑭᓯᒋᐊᓪᓚᕕᑦᓴᐅᒪᑕ.