Latest News

ᓄᓇᕕᒻᒥ ᐃᑯᐊᓪᓚᑐᕐᓂᐊᑏᑦ ᐱᒋᐅᕐᓴᕕᖓᑕ ᐅᒃᑯᐃᑕᐅᓂᖓ

Friday, June 8, 2018
 
ᓄᓇᕕᒻᒥ ᐃᑯᐊᓪᓚᑐᕐᓂᐊᑏᑦ ᐱᒋᐊᕐᓴᕕᖓ ᐅᒃᑯᐃᑕᐅᓂᖃᓚᐅᕐᑐᖅ ᔫᓂ 5-ᒥ, 2018-ᒥ ᐊᕐᕌᒍᑕᒫᕐᓯᐅᑎᒥᒃ ᑲᑎᒪᓂᖃᕐᑎᓗᒋᑦ ᖃᒥᑎᕆᔩᑦ ᐊᖓᔪᕐᖄᖏᑦ.

ᓇᓪᓕᐅᓂᕐᓯᐅᓂᖃᕐᑎᓗᒍ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ (ᑫᐋᔩᑉ) ᑐᑭᒧᐊᑦᑎᓯᔨᖓ, ᔨᐊᓂᕙ ᒪᓂᒃ, ᑭᐱᓯᓚᐅᕐᑐᖅ ᐃᒪᓕᕐᑐᐃᒍᑎᐅᑉ ᓱᓪᓗᓕᖓᓂᒃ ᐱᒋᐅᕐᓴᕕᐅᑉ ᐅᒃᑯᐃᑕᐅᓂᖓᓂᒃ ᓇᓗᓀᕐᓯᒍᑎᖃᕐᓱᓂ. ᐱᒋᐅᕐᓴᕕᒃ ᐃᓕᓐᓂᐊᑎᑦᓯᕕᐅᖃᑦᑕᓛᓕᕐᑐᖅ ᖃᒥᑎᕆᔨᓂᒃ, ᐃᓄᐃᑦ ᐃᓕᓐᓂᐊᑎᑦᓯᔩᑦ ᐃᓄᑦᑎᑑᕐᓗᑎᒃ ᐃᓕᓭᑎᓪᓗᒋᑦ.

ᓄᑖᒥ ᐱᒋᐅᕐᓴᕕᒻᒥ, ᑰᑦᔪᐊᒦᑦᑐᒥ,  ᓄᓇᕕᒻᒥᐅᑦ ᓇᓗᓀᕐᑕᐅᓯᒪᔪᓂᒃ École nationale des pompiers du Québec-ᒧᑦ (ÉPNQ) ᓄᓇᕕᒻᒥ ᐃᓕᓐᓂᐊᑎᑕᐅᖃᑦᑕᓛᓕᕐᑐᑦ. ᐃᓚᐅᑎᓪᓗᒋᑦ ᐃᑯᐊᓪᓚᑐᕐᓂᐊᑎᓂᒃ ᐃᓕᓐᓂᐊᑎᑦᓯᒍᑎᒧᑦ 1-ᒥ, ᐃᓕᓴᕐᑕᐅᖃᑦᑕᓛᕐᒥᔪᑦ ᓱᒃᑯᓇᕐᑐᐃᑦ ᐊᐅᓚᑕᐅᒍᓯᖏᓐᓂᒃ ᐊᒻᒪᓗ ᓄᓇᕐᓚᐅᖏᑦᑐᓂ ᑭᒡᒐᑐᕐᑎᐅᓚᖓᔪᑦ ᐃᓕᓴᕐᑕᐅᖃᑦᑕᒥᑎᓪᓗᒋᑦ.


ᒥᓯᐊᓪ ᒧᐊᕋᓐ, ᓯᕗᓕᕐᓯᒪᔪᖅ ᐱᒋᐅᕐᓴᑎᑦᓯᕕᒻᒧᑦ ᐱᓇᓱᒐᕐᒥᒃ, ᕿᒥᕐᕈᑎᑦᓯᔪᖅ ᐃᓱᕐᕆᐅᑎᓂᒃ ᓱᓪᓗᓕᒃ ᑭᐱᔭᐅᒌᕐᑎᓗᒍ.

ᓄᓇᓕᓐᓂ ᐊᑦᑕᓀᑦᑐᒦᑦᑎᓯᓂᕐᓄᑦ ᐱᓇᓱᕝᕕᖓ ᑫᐋᔩᑉ ᐱᓇᓱᐊᕐᓯᒪᓕᕐᑐᖅ ᑖᑦᓱᒥᖓ ᐱᓇᓱᒐᕐᒥᒃ ᐊᕐᕌᒍᑦ ᐱᖓᓱᑦ ᐅᖓᑖᓄᑦ. ᐱᓇᓱᒐᖅ ᐱᒋᐊᕐᑎᑕᐅᓯᒪᔪᖅ ᒥᓯᐊᓪ ᒧᐊᕋᓐᒧᑦ ᐊᒻᒪᓗ ᐱᓄᐊ ᐸᓛᓐᑦ ᓯᖏᑦᓯᖏᓐᓂᖓᓂ ᐱᐊ ᐱᐊᑌᒥᒃ ᐊᐅᓚᑦᓯᕕᒻᒥ ᐊᖓᔪᕐᖄᒧᑦ ᑐᖓᓕᐅᓯᑦᓱᓂ ᐊᒻᒪᓗ ᐱᒋᐊᕐᑎᑕᐅᓯᒪᔪᖅ ᑭᖑᓪᓕᐹᕐᓯᔭᐅᓂᖃᕐᑎᓗᒍ ᐃᑲᔪᕐᓯᒪᑦᓱᓂ.

ᑫᐋᔩᑉ ᐃᓕᓐᓂᐊᑎᑦᓯᓃᑦ ᒪᓂᓯᒪᖃᑦᑕᓂᐊᕐᑕᖏᑦ ᐊᑭᖃᖃᑦᑕᓂᐊᖕᖏᑐᑦ. ᐃᓕᓐᓂᐊᑎᑦᓯᔩᑦ ᐊᒻᒪᓗ ᐱᒋᐅᕐᓴᑎᑦᓯᔩᑦ ᐊᑭᖏᑦ ᐊᑭᓕᕐᑕᐅᓯᒪᖃᑦᑕᓂᐊᕐᒥᑎᓪᓗᒋᑦ, ᐆᑦᑑᑎᒋᓗᒋᑦ ᐊᐅᓚᓂᕐᓄᑦ, ᑐᔪᕐᒥᐅᕕᓐᓄᑦ, ᓂᕿᓄᑦ ᐊᒻᒪᓗ ᓂᕆᐅᓐᓇᖏᑦᑐᓄᑦ. ᐊᒥᓱᑦ ᐱᓇᓱᐊᖃᑕᐅᕙᑦᑐᑦ ᐅᒃᑯᐃᑕᐅᓂᖃᕐᑎᓯᓚᕿᕗᑦ, ᐆᑦᑑᑎᒋᑦᓱᒋᑦ ᑲᑎᕕᐅᑉ ᓄᓇᓕᓐᓂ ᐃᓪᓗᓕᕆᓂᕐᓄᑦ ᐊᓪᓚᕕᒻᒪᕆᖓ, ᑰᑦᔪᐊᑉ ᑲᕙᒫᐱᖓ, ᑫᐋᔩᑉ ᐱᓇᓱᕝᕕᖏᑦ ᐊᓯᖏᑦ ᐊᒻᒪᓗ ᑰᑦᔪᐊᒥ ᐃᑯᐊᓪᓚᑐᕐᓂᐊᓂᕐᓄᑦ ᐱᓇᓱᕝᕕᒃ.

 

 

ᐃᓱᕐᕆᐅᑏᑦ ᐊᒻᒪᓗ ᐱᐅᒃᑯᑏᑦ ᐃᑯᒪᐅᑎᖃᕐᑎᑕᐅᔪᑦ ᓯᕿᓐᓈᑕᐅᒍᑎᓄᑦ ᐊᒻᒪᓗ ᐊᐅᓚᐅᑎᓄᑦ.

 

ᐱᒋᐅᕐᓴᑎᑦᓯᕕᐅᑉ ᐃᓪᓗᖁᑎᖏᑦ ᐱᖓᓱᐃᓕᖓᔪᑦ.

 

ᓴᐅᒥᒻᒥᑦ ᑕᓕᕐᐱᒧᑦ: ᒥᓯᐊᓪ ᒧᕋᓐ, ᔨᐊᔨ ᔫᓐᔅ, ᖃᒥᑎᕆᔨ, ᔨᐊᓂᕙ ᒪᓂᒃ, ᕆᑦᓴᑦ ᔫᓐᔅ, ᑰᑦᔪᐊᒥ ᖃᒥᑎᕆᔩᑦ ᐊᖓᔪᕐᖄᖓ, ᐱᓄᐊ ᐸᓛᓐᑦ ᐊᒻᒪᓗ ᒣᑯ ᑯᐊᑕ, ᑫᐋᔩᑉ ᑲᒪᔨᒻᖕᒪᕆᖓ.