Latest News

2018-ᒥ ᑲᑎᕕᐅᑉ ᐳᓖᓯᖏᑦᑕ ᐯᓯᑰᕐᑎᓯᓂᖓ: ᐃᓚᐅᔪᑦ ᐅᓄᕐᓯᐅᒥᔪᑦ, ᓵᓚᖃᐅᑎᑦᓴᖃᕐᓂᓴᐅᓕᕐᑐᖅ

Tuesday, June 12, 2018
 
ᓂᕿᑦᓯᑐᓂ, ᔫᓂ 8-ᒥ, ᑲᑎᕕᐅᑉ ᐳᓖᓯᖏᑦ ᐊᕐᕌᒍᑕᒫᕐᓯᐅᑎᒥᒃ ᑰᑦᔪᐊᒥ ᐯᓯᑰᕐᑎᓯᓚᐅᕐᑐᑦ, ᕿᑎᕋᓕᒥ ᐱᖕᖑᐊᑐᑦ ᐱᒋᐊᓚᐅᕐᑐᑦ.

ᓱᖃᑦᓯᓃᑦ ᐱᒋᐊᓚᐅᕐᑐᑦ ᓄᓇᒃᑰᔫᑦ ᓄᕐᖃᖓᕕᖓᓂ ᑲᑎᑦᑕᕕᐅᑉ ᓴᓂᐊᓂ ᓂᕆᑦᓱᑎᒃ ᑕᑭᑦᑐᑳᕐᑕᓕᓐᓂᒃ ᓂᐊᖂᔭᓂᒃ, ᐱᕈᕐᑐᕕᓂᕐᓂᒃ ᐅᐊᕈᑎᒌᓂᒃ ᑲᑎᒪᔪᓂᒃ ᐊᒻᒪᓗ ᐃᒥᕋᕐᓱᑎᒃ. ᓱᖃᑦᓯᐅᑎᓄᑦ ᐃᓚᐅᓚᐅᕐᑐᖅ ᐊᖁᑦᑎᓯᓂᖅ ᐃᑕᒐᓐᓄᑦ ᐃᖏᕐᕋᓲᒥᒃ ᐃᖏᕐᕋᐅᑎᐊᐱᒻᒥᒃ ᐳᓖᓯᓂᒃ ᐃᑉᐱᒋᔨᖃᕐᓱᑎᒃ ᐃᒡᒑᓗᒃᑲᓱᑎᒃ ᐋᖓᔮᑦᑑᔮᕐᓇᑑᓐᓂᒃ.

 

ᑐᕌᒐᓪᓚᕆᓕᒃ ᓱᖃᑦᓯᑎᑦᓯᐅᑎᒃ ᑎᒥᒥᒍᑦ ᓂᒪᕐᑎᓯᓂᕐᓂᒃ ᐊᒻᒪᓗ ᐊᕐᖁᑎᒥ ᐊᑦᑕᓀᑦᑐᒦᑦᑎᓯᓂᕐᒥᒃ.

ᓱᖃᑦᓯᑎᑦᓯᔪᑦ ᐊᒻᒪᓗ ᐱᓇᓱᐊᖃᑎᒌᑦ ᐊᒥᓱᓂᒃ ᓵᓚᖃᐅᑎᖃᕐᑎᓯᓚᐅᕐᑐᑦ, ᐃᓚᐅᑎᓪᓗᒋᑦ ᓄᑖᑦᓯᐊᑦ ᐯᓯᑯᐃᑦ, ᓂᐊᕐᖁᐊᕇᒃᑯᑏᑦ, ᐯᓯᑰᑦ ᐸᓓᕐᓯᒪᐅᑎᖏᑦ ᐊᒻᒪᓗ ᐳᑦᑕᐅᑏᑦ. ᑕᕝᕙᓂ ᐊᕐᕌᒍᒥ, 57-ᐃᑦ ᐯᓯᑯᐃᑦ ᓵᓚᖃᐅᑎᐅᓚᐅᕐᑐᑦ, 14-ᓄᑦ ᐅᓄᕐᓂᓴᐅᑦᓱᑎᒃ ᑭᖑᓪᓕᐹᒥ ᐯᓯᑰᕐᓇᐅᓚᐅᔫᒥ.

ᖁᖓᑦᑐᓂᒃ ᐊᒥᓱᓂᒃ ᑲᒃᑲᓛᓂᒃ ᑕᑯᖃᑦᑕᓚᐅᕐᑐᒍᑦ, ᓚᓚᐅᕐᑐᖅ ᐱᓄᐊ ᐸᓛᓐᑦ, ᐊᖓᔪᕐᖄᑉ ᑐᖓᓕᐊ, ᐊᐅᓚᑦᓯᕕᖓᓂ ᑲᑎᕕᐅᑉ ᐳᓖᓯᖏᑦᑕ. ᐊᓪᓕᖏᓱᖓᕐᑐᓂ, ᑕᑯᓚᐅᕐᑐᖓ ᒪᕐᕉᓂᒃ ᑲᒃᑲᓛᓐᓂᒃ ᐯᓯᑰᕐᑑᓂᒃ ᓂᐊᕐᖁᐊᕇᒃᑯᑏᓐᓂᒃ ᓇᓴᕐᓯᒪᑦᓱᑎᒃ ᐊᕐᖁᑎᒻᒪᕆᒻᒥᒃ ᐊᓪᓚᕕᐅᑉ ᐅᖓᑖᓂ, ᐊᓕᐊᓇᒻᒪᕆᓚᐅᕐᑐᖅ.

ᐊᓄᕆᒐᓗᐊᕐᑎᓗᒍ ᐄᒃᑮᓇᕐᓱᓂᓗ, ᐊᒥᓲᓂᕐᓭᑦ ᑲᒃᑲᓛᑦ ᐃᓚᐅᓚᐅᕐᑐᑦ ᐅᒃᑯᐊᓯᓂᕐᒧᑦ: ᑰᑦᔪᐊᑉ ᐊᕐᖁᑎᖏᑎᒍᑦ ᐯᓯᑰᕐᓱᖕᑎᒃ.


ᐊᑦᔨᒌᖕᖏᑐᑦ ᑮᓇᐅᔭᖃᕐᑎᓯᔪᑦ ᐊᒻᒪᓗ ᐱᓇᓱᐊᖃᑕᐅᔪᑦ 2018-ᒥ ᐯᓯᑰᕐᓂᒥᒃ: ᓄᓇᕕᒻᒥ ᐃᓗᓯᓕᕆᔨᒃᑯᑦ ᑲᑎᒪᔨᖏᑦ, ᐃᓄᐃᑦ ᑎᒻᒥᔫᖏᑦ, ᕘᔅ ᐃᐊ, Laval Fortin Adams, ᑰᑦᔪᐊᑉ ᑲᕙᒫᐱᖓ, ᐅᖓᓗᒃ, ᓄᓇᕕᒻᒥ ᓄᓇᒥᒃ ᑎᒍᒥᐊᕐᑎᑯᑦ, ᑰᑦᔪᐊᒥᐅᑦ Inc, ᓄᓇ ᐸᑦᑖᐱᒻᒥᒃ ᓄᓇᒥ ᐊᓇᐅᓪᓚᑏᑦ, ᑲᑎᕕᒃ ᓄᓇᓕᓐᓂ ᐃᓪᓗᓕᕆᓂᕐᓄᑦ ᐊᓪᓚᕕᒻᒪᕆᒃ, ᓄᓇᕕᒃ ᑐᓴᐅᒪᐅᑎᓕᕆᕕᒃ, Sûreté du Québec,  ᑏᕕ ᓂᐅᕕᕐᕕᒃ ᑕᑯᒥᓇᕐᑐᓂᒃ, ᓂᐅᕕᕐᕕᒃ ᓄᐊᔭᓐ, ᐃᒡᓗᕕᒐᖅ ᓯᓂᑦᑕᕕᒃ, Auberge ᑰᑦᔪᐊᒥ ᓯᓂᑦᑕᕕᒃ, Fine Woods (ᐹᑦ ᔪᐊᒃ), ᓄᓇᕕᒻᒥ ᐆᒪᔪᐃᑦ ᐅᖑᒪᔭᐅᓂᖏᓐᓄᑦ ᐊᓪᓚᕕᒃ, CIBC ᑮᓇᐅᔭᒃᑯᕕᒃ, ᓰᐲᓰ, ᑲᑎᕕᒃ ᐃᓕᓴᕐᓂᓕᕆᓂᖅ ᐊᒻᒪᓗ ᓂᐅᕕᕐᕕᒃ/ᑐᓪᓕᒃ.