Latest News

ᐳᓖᓯ ᕓᕃᑦ-ᑎᐅᓐ ᐁᑦᑐᑕᖅ ᐱᓇᓱᑦᓯᐊᒍᑎᒥᓄᑦ ᐃᓕᑕᕐᓇᐅᑎᒥᒃ

Friday, April 16, 2021
 
ᐅᒃᑯᐃᓯᕕᖃᓂᖓᓂ ᑰᑦᔪᐊᒥ, ᑯᐯ ᑲᕙᒪᖓᑕ ᑭᓇᓕᒫᒧᑦ ᐊᑦᑕᓇᕐᑐᒦᑦᑌᓕᓂᕐᒧᑦ ᒥᓂᔅᑕᒃᑯᖓ ᐁᑦᑐᐃᔪᑦ ᐅᓪᓗᒥ ᐱᓇᓱᑦᓯᐊᒍᑎᒥᓄᑦ ᐃᓕᑕᕐᓇᐅᑎᒥᒃ ᐳᓖᓯᒧᑦ ᕓᕃᑦ-ᑎᐅᓐ ᓄᓇᕕᐅᑉ ᐳᓖᓯᖏᑦ ᐱᒍᑦᔨᓂᖏᑦᑕ ᑲᑉᐱᐊᓇᕐᑐᑰᕐᑐᓂᑦ ᐊᓐᓃᓂᔪᕕᓂᐅᕋᒥ ᐊᕐᓇᒥᒃ  ᓴᓪᓗᓂ 2019-ᒥ.

ᕕᑎᕆᒃ ᒃᕋᐅᓂᐁ, ᑌᑦᓱᒪᓂ ᐳᓖᓯᐅᓯᒪᔪᖅ ᑲᑎᕕᒃ ᐳᓖᓰᒃᑯᖏᓐᓂ, ᐁᑦᑐᑕᐅᓂᐊᕐᒥᔪᖅ ᐃᓕᑕᕐᓇᐅᑎᒥᒃ ᑌᑲᓂ ᐃᑲᔪᕐᓯᖃᑕᐅᓂᕋᒥ, ᑭᓯᐊᓂ ᐃᓚᐅᓂᐊᖕᖏᑐᖅ ᐅᒃᑯᐃᓯᕕᖃᕐᓂᖓᓂ ᐱᓇᓱᒃᑲᒥ ᑯᐯ ᐳᓕᓯᒃᑯᖏᓐᓂᑦ (SQ).

ᑲᑉᐱᐊᓇᕐᑐᑰᓚᐅᔪᑦ ᒫᑦᓯ 2019-ᒥ, 11:00PM-ᖑᕋᓚᒻᒥ, ᓴᓪᓗᓂ. ᐳᓖᓰᑦ ᐊᕐᓇᒧᑦ ᐅᖄᓚᕕᐅᓚᐅᔪᑦ ᐅᐃᒻᒪᓇᕐᑐᒥᒃ. ᐃᕐᓯᓱᓂ ᙯᕋᓕᔭᕐᓱᓂ, ᑕᒐ ᑐᑭᓯᓇᕐᓯᐊᓚᐅᔪᖕᖏᑑᖅ ᑐᓴᕐᓴᐅᓯᐊᕋᓂᓗ. ᐳᓖᓰᑦ ᐊᐱᕐᓱᒐᓱᐊᕋᓗᐊᕐᓱᑎᒃ, ᑐᑭᓯᔭᑐᐊᕆᓚᐅᔭᖏᒃ "ᓯᐊᔭ" ᐊᒻᒪᓗ "15" (ᖁᓕᓪᓗ ᑕᓪᓕᒪᓗ).

ᑌᒫᒃ ᓇᓃᒻᒪᖔᑦ ᖃᐅᔨᒪᓪᓗᐊᒐᑎᒃ, ᐅᐃᒻᒪᓯᔪᕕᓃᒃ ᑕᒐ ᐃᖏᕐᕋᓱᑎᒃ ᓄᓇᓕᒻᒥ ᓄᓇᒃᑰᔫᒃᑯᑦ ᐃᒐᓛᕐᒥᓂᒃ ᐅᒃᑯᐃᖔᕐᑎᓯᑦᓱᑎᒃ ᑑᓵᕋᓱᒻᒧᑦ ᙯᕋᓕᔭᕐᑑᓂᒃ. ᓯᐊᔭᒥ ᑲᑉᐱᐊᓇᕐᑐᑰᕐᑐᒥᒃ ᕿᓂᓯᑦᓱᑎᒃ ᐃᓪᓗᖓᓂ 15-ᒥ ᑭᑎᑦᔪᑎᖃᕐᑎᓗᒍ, ᐁᑉᐸᖓ ᐳᓖᓯ ᓈᒻᒪᓈᒐᓱᓯᔪᕕᓂᖅ ᓇᓂᑯᑦᓯᐊᓂ ᓄᓇᓕᒻᒥ.

ᐃᓪᓘᑉ ᓵᖓᓄᑦ ᑎᑭᓕᕋᒥᒃ, ᐊᕐᓇᒥ ᙯᕋᓕᔭᕐᑐᒥ ᑐᓵᓕᕐᑐᕕᓃᒃ. ᒪᕐᕉᒃ NPS-ᑯᑦ ᐳᓖᓯᖏᒃ ᐃᓪᓗᒧᑦ ᐃᑎᓕᕐᑐᕕᓃᒃ ᓱᒃᑫᑐᒥ ᑕᒐ ᑕᑯᑦᓱᑎᒃ ᐊᖑᑎᒥᒃ ᓴᕕᑯᑖᒥᒃ ᑎᒍᒥᐊᕐᑐᒥ. ᓄᕐᖃᑎᑦᓯᒍᓐᓇᓯᔪᕕᓃᒃ ᐃᑯᒪᐅᑎᑎᒍᑦ ᖁᑭᐅᑎᒧᑦ ᖃᕆᐊᖓ ᓂᓐᓂᐅᒐᓗᐊᕐᐸᑦ. ᐊᕐᓇᖅ ᐊᑦᑕᓇᕐᑐᒦᒻᒪᕆᑦᑐᕕᓂᖅ ᓴᕕᒻᒧᑦ ᑲᐱᔭᐅᓂᐅᒧᑦ, ᐃᕐᖁᒪᖏᓐᓇᒐᓗᐊᕐᓱᓂ. ᐊᐅᓈᒻᒪᕆᑦᓱᓂ, ᑕᒐ ᐊᐅᓚᑎᑕᐅᓯᔪᕕᓂᖅ ᐅᐃᒻᒪᓇᕐᑐᑯᑦ ᒪᓪᑐᔨᐊᓪ-ᒧ, ᐋᓐᓂᐊᓯᐅᕐᑕᐅᓂᐊᕋᒥ.

ᑖᒃᑯᐊ ᐳᓖᓰᒃ ᑭᐅᑦᓴᐅᑎᒋᒍᑎᒥᓄᑦ ᐊᒻᒪᓗ ᑲᑉᐱᐊᓇᕐᑐᑰᕐᑐᒥᒃ ᐃᑲᔪᕐᓯᓯᒪᕋᒥᒃ ᐊᓐᓃᓂᑦᓱᑎᒃ ᐊᕐᓇᐅᑉ ᐃᓅᓯᖓᓂ. ᐳᓖᓰᑦ ᐊᖓᔪᕐᖄᖓ ᓚᕉᔅ ᐅᒃᑯᐃᓯᕕᖃᕐᓂᖓᓂ ᑐᑭᓯᕆᐊᒃᑲᓂᑎᑦᓯᓚᐅᔪᖅ ᐳᓖᓰᒃ ᓲᓱᑦᓯᐊᓂᖏᓐᓂᒃ ᐊᒻᒪᓗ ᐊᑐᐃᓐᓇᐅᕐᑎᓯᒪᓂᒋᓚᐅᒧᖏᓐᓂᒃ ᑲᑉᐱᐊᓇᕐᑐᖃᑎᓗᒍ ᑭᐅᑦᓯᐊᒍᑎᕕᓂᖏᓐᓂᒃ. ​​