Latest News

ᓱᒧᑦ ᐆᒪᔪᕐᓯᐅᑏᑦ ᖁᑭᐅᑎᒥᓂᒃ ᓇᓗᓀᕐᑕᐅᔨᐊᖃᕐᓯᒪᒋᐊᓖᑦ?

Wednesday, February 6, 2019
 
ᐱᓇᓱᐊᕈᓯᐅᖃᑦᑕᓂᐊᓕᕐᒥᔪᓂ, ᑲᑎᕕᐅᑉ ᐳᓖᓯᖏᑦ, ᑲᑐᑦᔨᖃᑎᖃᕐᓗᑎᒃ ᐃᓄᐃᑦ ᐆᒪᔪᕐᓯᐅᑏᑦ, ᐃᖃᓗᑦᓯᐅᑏᑦ ᐊᒻᒪᓗ ᒥᑭᒋᐊᕐᓂᐊᑏᑦ ᓴᐳᑦᔭᐅᓂᖏᓐᓄᑦ ᐱᓇᓱᒐᕐᒥᒃ ᐊᒻᒪᓗ ᓄᓇᓖᑦ ᑲᕙᒫᐱᖏᓐᓂᒃ, ᐃᑲᔪᖃᕐᑕᓚᖓᓕᕐᒥᔪᑦ ᓇᓗᓀᕐᑐᑕᐅᑎᓪᓗᒋᑦ ᐃᓘᓐᓇᑎᒃ ᓄᓇᕕᒻᒥ ᓄᓇᓕᒥᐅᑦ ᖁᑭᐅᑎᓖᑦ.

ᐳᓖᓰᑦ ᐊᒻᒪᓗ ᐃᓄᑦᑎᑐᑦ ᐅᖃᐅᓯᓖᑦ ᐱᓇᓱᑦᑎᖏᑦ ᑫᐋᔩᑉ ᐊᑐᐃᓐᓇᐅᖃᑦᑕᓚᖓᔪᑦ ᐊᐱᕐᓲᑎᑦᓴᓕᓐᓂᒃ ᑭᐅᒍᓐᓇᓗᑎᒃ ᐊᒻᒪᓗ ᐃᑲᔪᕈᓐᓇᓗᑎᒃ ᓇᓗᓀᕐᑐᐃᒍᑎᓂᒃ ᐱᑕᑦᓯᑐᒐᕐᓂᒃ. ᐃᓘᓐᓇᑎᒃ ᐊᑐᕐᑕᐅᒍᓐᓇᓲᑦ ᖁᑭᐅᑏᑦ, ᐆᑦᑑᑎᒋᑦᓱᒋᑦ ᖁᑭᐅᑏᑦ ᐅᕝᕙᓘᓐᓃᑦ ᓇᐱᑦᑕᑐᐃᑦ, ᓇᓗᓀᕐᑕᐅᓯᒪᒋᐊᖃᕐᒪᑕ ᑯᐯᑉ ᐳᔮᕓᓐᓂᓯᖓᓂ ᑯᐯᒻᒥ ᐱᖁᔭᐅᓕᕐᑑᑦ ᐊᑖᓂ, ᖁᑭᐅᑏᑦ ᓇᓗᓀᕐᑐᑕᐅᓯᒪᓂᖏᓐᓄᑦ ᐱᖁᔭᐅᑉ.

ᔭᓄᐊᔨ 28 ᐱᓇᓱᐊᕈᓯᖓᓂ, ᐃᑲᔪᕐᓯᓂᖅ ᒪᓂᒪᑎᐅᔪᖅ ᑰᑦᔪᐊᒥ ᖁᑭᐅᑎᓕᓐᓄᑦ ᓇᓗᓀᕐᑐᑕᐅᔨᐊᖃᕆᐊᓕᓐᓄᑦ ᖁᑭᐅᑎᒥᓂᒃ ᑯᐯᑉ ᓇᓗᓀᕐᓯᓂᕐᓄᑦ ᑭᒡᒐᑐᕐᕕᖓᓄᑦ. ᓯᕗᓂᕐᒥ ᐊᑯᓂᐅᖕᖏᑐᖅ ᑌᒫᑦᓭᓇᖅ ᐃᓘᓐᓀᓂ ᓄᓇᓕᓐᓂ ᑌᒣᒍᑦᔨᖃᑦᑕᓛᕐᒥᓱᑎᒃ. ᐅᓪᓗᒥ, 200 ᓴᓂᐊᓃᑦᑐᑦ ᖁᑭᐅᑏᑦ ᓄᓇᕕᒻᒥ ᓇᓗᓀᕐᑕᐅᓯᒪᓕᕐᑐᑦ.

ᐊᑕᐅᑦᓯᑯᓪᓗ, ᖁᑭᐅᑏᑦ ᓯᒃᑭᕇᒃᑯᑎᖏᑦ ᐸᓓᕈᑏᑦ ᐊᐃᑦᑐᑑᑕᐅᖃᑦᑕᓚᐅᔪᒻᒥᔪᑦ ᐊᑭᖃᕈᓐᓀᑎᓪᓗᒋᑦ ᖁᑭᐅᑏᑦ ᐊᑦᑕᓀᑦᑑᒋᐊᖃᕐᓂᖏᑦ ᐱᑦᔪᑕᐅᑎᓪᓗᒍ. ᑰᑦᔪᐊᑐᐃᓐᓇᒥ 100 ᐅᖓᑖᓅᕐᑐᑦ ᐁᑦᑐᑑᑎᐅᖃᑦᑕᓚᐅᔫᑦ.

ᓱᒧᑦ ᐆᒪᔪᕐᓯᐅᑏᑦ ᖁᑭᐅᑎᒥᓂᒃ ᓇᓗᓀᕐᑕᐅᔨᐊᖃᕐᓯᒪᒋᐊᓖᑦ?

ᐅᓪᓗᒥ ᓇᓗᓀᕐᑐᐃᓯᒪᐅᑎᖃᖕᖏᑐᑦ ᖁᑭᐅᑎᓂᒃ ᑯᐯᒻᒥ ᐊᒻᒪᓗ ᑳᓇᑕᒥ. ᓇᓗᓀᕐᑐᐃᓂᖅ ᐊᑑᑎᖃᕈᓐᓇᒪᑦ ᐊᒥᓱᓂᒃ ᐱᑦᔪᑎᖃᕐᓱᓂ:

·   ᖁᑭᐅᑎᒋᔭᐅᔪᑦ ᖃᓄᐃᑦᑑᒪᖔᑕ ᑕᑯᔭᐅᓗᑎᒃ, ᐊᒻᒪᓗ ᑎᓪᓕᒐᐅᓯᒪᔪᑦ ᐅᑎᕐᑎᑕᐅᓗᑎᒃ ᑎᓪᓕᒉᔭᕕᓂᕐᒧᑦ;

·   ᓯᒃᑭᕇᒃᑯᑎᖏᑦ ᐸᓓᕈᑏᑦ ᐁᑦᑐᑑᑕᐅᓲᑦ ᐊᑭᖃᕈᓐᓀᑎᓪᓗᒋᑦ;

·   ᐆᒪᔪᕐᓯᐅᑏᑦ ᐃᓕᑦᓯᓯᐊᕐᐸᓕᐊᒍᓐᓇᑐᑦ ᖁᑭᐅᑏᑦ ᐊᑦᑕᓀᑦᑑᑎᑕᐅᒍᓐᓇᐅᑎᖏᓐᓂᒃ;

-   ᐆᒪᔪᕐᓯᐅᑏᑦ ᓇᓗᓀᕐᑕᐅᔨᐊᓖᑦ ᐱᖁᔭᕐᒥᒃ ᒪᓕᑦᑐᑦ.

ᖁᑭᐅᑎᒥᓂᒃ ᓇᓗᓀᕐᑕᐅᔨᐊᖃᕆᐊᓖᑦ, ᖁᑭᐅᑎᓖᑦ ᐊᑑᑎᖃᑦᓯᐊᑐᓂᒃ ᓇᒻᒥᓂᕐᒥᓂᒃ ᓇᓗᓀᕐᑕᐅᔨᐊᖃᕈᓐᓇᑐᑦ, ᐆᑦᑑᑎᒋᑦᓱᒋᑦ ᐊᖁᒍᓐᓇᐅᑏᑦ, ᓯᕿᓂᖕᖑᐊᖏᑦ ᐊᑦᔨᖑᐊᕐᑕᓖᑦ, ᖁᑭᐅᑎᖃᕈᓐᓇᐅᑏᑦ ᐅᕝᕙᓘᓐᓃᑦ ᐊᖏᖃᑎᒌᒍᑎᒧᑦ ᐃᓚᐅᓂᕐᒥᓄᑦ ᓇᓗᓀᒃᑯᑌᑦ ᐊᑦᔨᖑᐊᕐᑕᓖᑦ. ᖁᑭᐅᑎᓂᒃ ᓇᓗᓀᕐᑕᐅᑎᑦᓯᐅᑏᑦ ᖃᕆᐅᔭᒃᑯᑦ ᐱᑕᑦᓯᑐᕐᑕᐅᒍᓐᓇᒥᔪᑦ ᐅᕙᓂ: https://siaf.gouv.qc.ca/accueil.html?L=1.

ᖁᑭᐅᑎᒥᓂᒃ ᓇᓗᓀᕐᑕᐅᔨᐊᓖᑦ, ᐅᑯᓂᖓ ᑐᑭᓯᐅᑎᑦᓴᓂᒃ ᓇᔪᕐᑎᖃᕆᐊᖃᕐᐳᑦ:

·         ᖃᓄᐃᑦᑑᓂᖓ;

·         ᓴᓇᒪᓂᖓ;

·         ᓯᒃᑭᑎᑦᓯᐅᑎᖓ;

·         ᓇᓪᓕᐊᓴᔭᐅᓂᖓ;

·         ᓲᖑᓂᖓ;

·         ᖁᑭᐅᑎᐅᑉ ᐊᓯᐅᒌᒃᑯᑎᖓ ᑭᑎᑦᔪᑎᖓ;

·         ᓇᓃᑦᑎᓗᒍ ᓴᓇᕐᕙᓯᒪᔨᐊᕆᔭᐅᓲᒍᒻᒪᖔᑦ ᖁᑭᐅᑎᒋᔭᐅᔪᖅ;

ᐅᑯᐊ ᐆᑦᑑᑏᑦ ᐱᑕᑦᓯᑐᒐᐅᓲᑦ:

·         ᓇᓗᓀᕐᑐᐃᕕᒃ ᐃᓅᓕᕐᑐᕕᓂᐅᒋᐊᖓᓂᒃ ᓱᕐᖁᐃᓯᑎᑦᓯᐅᑎᑕᓕᒃ

·         ᓇᓗᓀᕐᑐᐃᕕᒃ ᐱᖃᕆᐊᖓᓂᒃ ᐊᒻᒪᓗ ᐱᓯᒪᒋᐊᖓᓂᒃ ᖁᑭᐅᑎᖃᕈᓐᓇᐅᑎᒥᒃ (PAL)

·         ᓇᓗᓀᕐᑐᐃᕕᒃ ᐊᑑᑎᖃᑦᓯᐊᑐᒥᒃ ᑭᓇᐅᓂᖓᑕ ᓱᕐᖁᐃᑕᐅᒍᑎᖓᓂᒃ ᐱᑕᓕᒃ

ᑐᑭᓯᒋᐊᓪᓚᕈᒪᔪᑦ:

ᒣᑯ ᕕᓪᑐ Michael Filteau

(819) 964-2961 Ext. 2507

mfilteau@krpf.ca

Service d'immatriculation des armes à feu du Québec

1-888-335-9997

Info@siaf.gouv.qc.ca