Latest News

ᑲᖏᕐᓱᐊᓗᑦᔪᐊᒥ ᐳᓖᓰᑦ ᕿᓄᕕᐅᑦᓱᑎᒃ ᐁᕕᓖᑦ

Sunday, May 10, 2020
 
ᐊᓪᓕᖏᓱᖓᕐᑐᓂ, ᐳᓖᓰᑦ ᐅᐃᒪᓇᕐᑐᒧᑦ ᓯᕙᓂᕐᑕᐅᓚᐅᕐᑐᑦ ᑐᓴᕐᑎᑕᐅᑦᓱᑎᒃ ᖁᖁᐊᖅᕙᓚᑦᓯᔪᖃᓕᕐᒪᑦ, ᓱᕐᕙᓛᓪᓚᕆᑦᑎᓯᔪᖃᕐᓱᓂ ᐊᒻᒪᓗ ᓂᐸᓕᔭᒻᒪᕆᕝᕕᐅᓱᓂ ᐊᓇᕐᕋᕆᔭᐅᔪᖅ ᓄᓇᓕᓐᓂ.

ᐳᓖᓰᑦ ᐊᓇᕐᕋᕆᔭᐅᔪᒥᒃ ᐁᕕᖃᓚᐅᕐᑐᑦ ᐊᒻᒪᓗ ᖁᖁᐊᕐᕙᓚᑦᓯᒥᒃ ᑐᓵᑦᓱᑎᒃ ᓂᐸᓕᔭᒻᒪᕆᑦᑐᓂᓪᓗ ᐃᓪᓘᑉ ᐃᓗᐊᓂ. ᐅᒃᑯᐊᒥ ᐊᑦᓴᑕᕐᓱᑎᒃ ᓇᓗᓀᕐᓯᓱᑎᓪᓗ ᐳᓖᓯᐅᒋᐊᒥᓂᒃ. ᐊᑦᓴᑕᓚᐅᕐᑐᑦ ᐊᑯᓂ ᐃᑎᕐᓯᒪᔪᓄᑦ ᐅᒃᑯᐃᑕᐅᒍᒪᑦᓱᑎᒃ. ᐳᓖᓰᑦ ᐃᑎᕐᕕᓴᖃᕐᒪᖔᑦ ᐊᓯᐊᒍᑦ ᖃᐅᔨᒐᓱᐊᓚᐅᕐᑐᑦ ᑭᓯᐊᓂ ᑲᑕᐅᑉ ᐊᓯᐊᓂᒃ ᐃᑎᕐᕕᓴᖃᓚᐅᖕᖏᑐᑦ. ᐳᓖᓰᑦ ᐃᑎᕐᓯᒪᔪᓂᒃ ᐅᒃᑯᐃᑕᐅᖕᖏᑯᑎᒃ, ᐅᒃᑯᐊᒥᒃ ᓯᖁᒥᑦᓯᓗᑎᒃ ᐃᑎᓚᖓᓂᕋᓚᐅᕐᑐᑦ.

ᐃᓄᓐᓂᒃ ᐃᑎᕐᓯᒪᔪᓂᒃ ᐱᖏᒐᓕᕋᒥᒃ, ᐳᓖᓰᑦ ᐅᒃᑯᐊᒥᒃ ᓯᖁᒥᑦᓯᓚᐅᕐᑐᑦ ᐃᑎᕐᓗᑎᒃ ᑭᓯᐊᓂᐅᓕᕐᓱᑎᒃ. ᐃᑎᕋᒥᒃ, ᑕᑯᓚᐅᕐᑐᑦ ᐃᓄᒻᒥᒃ ᐹᔭᐅᓂᐅᕙᓗᑦᑐᒥᒃ ᐋᓐᓂᑎᕐᓯᒪᔪᒥᒃ.

"ᖃᐅᔨᑎᑕᐅᓯᒪᔪᖓ ᑕᑯᓐᓇᕋᑦᓴᓕᐅᕐᑐᖃᕐᓂᒪᑦ ᐳᓖᓰᑦ ᑲᒪᑎᓪᓗᒋᑦ ᑕᑯᑦᓴᐅᑎᑦᓱᒍᓗ Facebook-ᑯᑦ," ᓚᓚᐅᕐᑐᖅ ᐳᓖᓰᑦ ᐊᖓᔪᕐᖄᒪᕆᖓᑕ ᑐᖓᓕᐊ ᔮᓐ-ᕗᔮᓐᓱᐊ ᒧᐊᕌ. "ᑕᑯᓐᓇᓯᒪᔭᕋ ᑕᑯᓐᓇᕋᑦᓴᓕᐊᕕᓂᖅ ᐊᒻᒪᓗ ᓱᓪᓚᕆᓐᓂᕕᓂᖏᓐᓂᒃ ᖃᐅᔨᒪᑦᓱᖓ. ᖃᐅᔨᓴᕐᑕᐅᖏᓐᓈᒪᑦ ᐊᑑᑎᓚᐅᕐᑐᖅ, ᖃᓄᒋᐊᓪᓚᒃ ᓇᓗᓀᕐᓯᐅᑎᒋᐊᓪᓚᓂᒃ ᐅᖃᕐᖃᔭᖕᖏᑐᖓ. ᑭᓯᐊᓂ, ᒫᓐᓇᐅᓂᖓᓂ, ᐃᒣᓕᒍᓐᓇᑐᖓ ᐳᓖᓰᑦ ᓈᒻᒪᓈᕐᓱᑎᒃ ᑲᒪᒋᔭᓕᕕᓃᑦ ᐊᒻᒪᓗ ᑲᑎᕕᐅᑉ ᐳᓖᓯᖏᓐᓄᑦ ᒪᓕᒉᑦ ᐃᓗᐊᓂ ᐱᓂᕐᓗᓂᖕᖏᓱᑎᒃ. ᐃᕐᙯᑎᑦᓯᒍᒪᔪᖓ ᐃᓄᓕᒫᓂᒃ ᑕᑯᓐᓇᕋᑦᓴᓕᐊᕕᓃᑦ ᐃᓗᐃᒃᑲᓂᒃ ᖃᐅᔨᐅᑕᐅᕐᖃᔭᖕᖏᒪᑕ ᐊᒻᒪᓗ ᐃᓄᐃᑦ ᑕᑯᓗᑎᓗ ᑕᒉᓐᓇᖅ ᐸᑦᓯᑎᖃᓯᓗᑎᓘᕐᐸᒋᐊᖃᕋᑎᒃ. ᖃᕆᑕᐅᔭᒨᕐᑕᐅᒍᓐᓇᑐᑦ ᖃᐅᔨᓚᕿᐅᑎᑕᖃᕈᓐᓀᓗᑎᒃ."

ᑭᓇᐅᓂᖓ ᓇᓗᓀᕐᑕᐅᓯᒪᓕᕐᑐᖅ ᐱᒋᐊᖃᑦᑕᓂᔪᕕᓂᖅ, ᐊᒻᒪᓗ ᖃᐅᔨᓴᕐᓂᖅ ᑲᔪᓯᖏᓐᓈᓱᓂ. ​