Latest News

ᑲᑎᕕᐅᑉ ᐳᓖᓯᖏᑦᑕ ᑲᒪᓪᓚᕆᕝᕕᖓ ᓄᕐᖃᑎᑦᓯᒋᐊᓚᖓᔪᖅ ᐃᔨᕐᑐᐊᕆᔭᐅᑦᓱᑎᒃ ᓂᐅᕐᕈᓭᒍᑕᐅᕙᓐᓂᖏᓐᓂᒃ ᐃᒥᓗᐃᑦ ᐊᒻᒪᓗ ᐋᖓᔮᓐᓇᑐᐃᑦ

Tuesday, February 25, 2020
 
ᑲᑎᕕᐅᑉ ᐳᓖᓯᖏᑦ ᕿᒥᕐᕈᓕᕐᑐᑦ ᓄᐃᑦᓯᒐᔭᕆᐊᒥᒃ ᓄᑖᒥᒃ ᑲᒪᒋᔭᖃᓪᓚᕆᕝᕕᒥᒃ ᐃᓕᒃᑰᓗᓂ ᐱᓇᓱᐊᕐᕕᐅᓚᖓᑦᓱᓂ ᓄᕐᖃᑎᑦᓯᒋᐊᕐᑐᓄᑦ ᐱᖁᔭᕐᓂᒃ ᓯᖁᒥᑦᓯᒍᑕᐅᔪᑦ ᐃᒥᐊᓗᐃᑦ ᐊᒻᒪᓗ ᐋᖓᔮᓐᓇᑐᐃᑦ ᓂᐅᕐᕈᑕᐅᕙᓐᓂᖏᓐᓂᒃ ᓄᓇᕕᒻᒥ. 

ᑲᑎᕕᐅᑉ ᐳᓖᓯᖏᑦ ᕿᒥᕐᕈᓕᕐᑐᑦ ᓄᐃᑦᓯᒐᔭᕆᐊᒥᒃ ᓄᑖᒥᒃ ᑲᒪᒋᔭᖃᓪᓚᕆᕝᕕᒥᒃ ᐃᓕᒃᑰᓗᓂ ᐱᓇᓱᐊᕐᕕᐅᓚᖓᑦᓱᓂ ᓄᕐᖃᑎᑦᓯᒋᐊᕐᑐᓄᑦ ᐱᖁᔭᕐᓂᒃ ᓯᖁᒥᑦᓯᒍᑕᐅᔪᑦ ᐃᒥᐊᓗᐃᑦ ᐊᒻᒪᓗ ᐋᖓᔮᓐᓇᑐᐃᑦ ᓂᐅᕐᕈᑕᐅᕙᓐᓂᖏᓐᓂᒃ ᓄᓇᕕᒻᒥ.  
ᕕᕗᐊᔨ 18, 2020-ᒥ, ᑲᑎᕕᐅᑉ ᐳᓖᓯᖏᑦ ᕿᓈᔭᕐᓂᖃᓚᐅᕐᑐᑦ ᑐᖓᓕᕇᓈᕐᑎᑐᓂᒃ ᐃᑲᔪᕐᑕᐅᓱᑎᒃ ᑯᐯᑉ ᐳᓖᓯᖏᓐᓄᑦ, Sûreté du Québec (SQ), ᐊᒥᓱᐃᓂᒃ ᑕᑯᓚᕿᑦᓱᑎᒃ ᑎᒎᓪᓚᓱᒋᓪᓗ. Plutonium ᐱᓇᓱᒐᐅᑉ ᐊᑖᓂ, ᐳᓖᓰᑦ 12-ᕕᑦᓱᑎᒃ ᓴᕕᕐᓱᖃᑦᑕᓚᐅᕐᑐᑦ ᐊᒻᒪᓗ ᐃᓕᒪᓱᓚᕿᑦᓱᑎᒃ ᑕᓪᓕᒪᓂᒃ ᐃᓄᓐᓂᒃ, ᒪᓐᑐᔨᐊᓚᐅᑉ ᓄᓇᖓᓂᕙᓪᓗᖅ. ᐳᓖᓰᑦ ᐅᑯᓂᖓ ᑎᒍᔨᓐᓂᓚᐅᕐᑐᑦ.  
  • 180 ᐳᓪᓚᐅᔦᑦ ᓲᔪᑦᓴᔦᑦ Vodka (750 mL);
  • 2,500 g ᓰᑲᔨᐊᕐᓗᖅ ᑳᓈᐱᔅ;
  • 569 g ᑰᑫᓐ cocaine;
  • 775 ᐄᒐᖃᐅᑏᑦ ᐅᐃᕆᓐᓇᑐᓂᒃ methamphetamines;
  • $118,562 ᑳᓰᑦ;
  • 33 ᓂᐅᕕᐊᓂᒃ ᐊᑭᓖᒍᑏᑦ;
  • ​3 ᓄᑮᕐᑎᓯᐅᑏᑦ ᐃᑯᒪᐅᑎᒨᕐᑐᑦ;
  • 4 ᐃᖏᕐᕋᐅᑏᑦ.​
ᕕᕗᐊᔨ  23-ᒧᑦ, ᑲᑎᕕᐅᑉ ᐳᓖᓯᖏᑦ ᑲᔪᓯᑎᑦᓯᖃᑦᑕᓚᐅᔫᑦ ᕿᓈᔭᕆᐊᓪᓚᓂᕐᓂᒃ ᓴᓪᓗᓂ, ᑲᖏᕐᓱᔪᐊᒥ, ᐊᑯᓕᕕᒻᒥ, ᖁᐊᖅᑕᒥ ᐊᒻᒪᓗ ᐳᕕᕐᓂᑐᒥ. ᐳᓖᓰᑦ ᑎᒍᔨᓚᕿᓚᐅᕐᑐᑦ $6,500 ᐅᖓᑖᓅᕐᑐᓂᒃ ᑳᓯᓂᒃ, 24-ᓂᒃ ᐳᓪᓚᐅᔭᓂᒃ ᓲᔪᑦᓴᔭᓂᒃ 750 mL-ᓂᒃ ᐊᖏᓂᓕᓐᓂᒃ, ᑕᓪᓕᒪᐅᔪᕐᑐᓂᒃ ᓂᐅᕕᐊᓂᒃ ᐊᑭᓖᒍᑎᓂᒃ, ᐅᖄᒍᑎᐊᐱᓐᓂᒃ, ᑳᓈᐱᔅᓂᒃ ᐊᒻᒪᓗ ᕼᐋᓰᔅᓂᒃ. ᐊᓯᖏᓐᓂ ᕿᓈᔭᖃᑦᑕᓂᐊᕐᒥᓱᑎᒃ ᐅᓪᓗᓂ ᓯᕗᓂᕐᒥ. 
ᐱᓇᓱᒐᖅ Plutonium ᓄᐃᓚᕿᓯᒪᔪᖅ ᖃᐅᔨᒐᓱᐊᒻᒪᕆᓐᓂᐅᓚᐅᔫᒧᑦ ᐱᒋᐊᕐᑎᑕᐅᓚᔪᑎᓪᓗᒍ ᑕᕐᖀᑦ ᑕᓪᓕᒪᐅᔪᖕᖏᒐᕐᑐᑦ ᐊᓂᒍᕐᓯᒪᓕᕐᑐᑦ ᑲᑎᕕᐅᑉ ᐳᓖᓯᖏᓐᓄᑦ ᐃᓄᓐᓄᑦ ᑐᓴᕐᑎᑕᐅᖃᑦᑕᓱᑎᒃ. ᑲᑎᑦᓱᑎᒃ, 28 ᐳᓖᓰᑦ ᐊᒻᒪᓗ ᐱᓇᓱᑦᑎᑐᐃᓐᓀᑦ ᐃᓚᐅᖃᑦᑕᓚᐅᔫᑦ ᐱᓇᓱᒐᕐᒥ ᐱᓇᓱᐊᕐᑐᓄᑦ. ᑯᐯᒃ ᐳᓖᓯᖏᑦ SQ (ᐃᓚᐅᑎᓪᓗᒍ SQ ᕿᒻᒥᓂᒃ ᓀᕈᕐᑎᖃᕐᕕᖓ), Service de police de la Ville de Montréal (ᐃᓚᐅᑎᓪᓗᒋᑦ ᐅᐃᒪᓇᕐᑐᓕᕆᔨᖏᑦ), Service de police de Chateauguay, Service de police de Laval, Service de police de Saint-Jean-sur-Richelieu ᐊᒻᒪᓗ ᕿᓈᔭᕐᑏᑦ ᐱᓯᒪᔪᑦ Revenu Quebec-ᒥᑦ ᐊᒻᒪᓗ ᑳᓇᑕᒥ ᐊᓪᓚᓯᒪᔪᕐᓂᐊᕕᒃ ᖃᐅᔨᓴᕐᑐᓄᑦ ᐃᓚᐅᖃᑦᑕᓚᐅᕐᑐᑦ.  

ᑲᑎᕕᐅᑉ ᐳᓖᓯᖏᑦ ᓄᕐᖃᑎᑦᓯᒋᐊᕐᓂᒥ ᑕᓪᓕᒪᓂᒃ ᐃᓄᓐᓂᒃ ᐃᓕᒪᒋᔭᐅᔪᓂᒃ ᐊᐅᓚᑦᓯᔪᕕᓂᐅᔪᕆᑦᓯᔪᑦ 70%-ᖏᓐᓂᒃ ᐃᒥᐊᓗᐃᑦ ᓄᓇᕕᒻᒨᖃᑦᑕᐅᓂᖏᓐᓂᒃ. 2015-ᒥᓂᑦ, ᐃᓕᒪᒋᔦᑦ ᐱᒋᐊᕐᑎᓯᔪᕕᓃᑦ ᐱᖁᔭᕐᓂᒃ ᓯᖁᒥᑦᓯᓂᖃᕐᓱᑎᒃ ᐱᓗᑲᓐᓂᓂᒃ, ᓂᐅᕕᕐᑐᕕᓃᑦ 39,400-ᓂᒃ ᐳᓪᓚᐅᔭᓂᒃ ᐃᒥᐊᓗᓐᓂᒃ. ᑖᒃᑯᐊ ᐃᒥᐊᓗᐃᑦ ᓂᐅᕐᕈᑎᐅᒍᓐᓇᑐᑦ ᐊᑭᖃᕐᑎᓗᒋᑦ ᓂᐅᕕᐊᕆᔭᐅᑦᓱᑎᒃ ᐊᑭᕕᓂᖏᑦᑕ 12-ᕕᓪᓗᐊᑐᓂᒃ ᓄᓇᕕᒻᒥ ᓄᓇᓕᓐᓅᖃᕐᓱᑎᒃ ᐅᖓᓯᑦᑐᓃᑦᑐᓄᑦ.  
2019-ᒥ, 84%-ᖏᑦ 3,345 ᐱᒋᐊᕐᓂᔪᑦ ᐊᒻᒪᓗ 74%-ᖏᑦ 11,763 ᐱᓂᕐᓗᑐᑦ ᓄᓇᕕᒻᒥ ᐃᒥᐊᓗᒻᒧᑦ ᑌᒣᑕᐅᖃᑦᑕᓯᒪᔪᑦ. ᓄᕐᖃᑎᑦᓯᒐᓱᐊᕐᓂᖅ ᐱᖁᔭᕐᓂᒃ ᓯᖁᒥᑦᓯᒍᑕᐅᔪᓂᒃ ᐃᔨᕐᑐᐊᕆᔭᐅᑦᓱᑎᒃ ᓂᐅᕐᕈᓴᕐᑕᐅᔪᓂᒃ ᑲᔪᓯᓚᖓᔪᖅ ᐊᒻᒪᓗ ᑲᑎᕕᐅᑉ ᐳᓖᓯᖏᓐᓄᑦ ᑌᒪᖕᖓᓂᑦ ᐅᐃᒪᓇᕐᑐᖁᑎᒋᔭᐅᑦᓱᓂ. ᐊᕐᕌᒍᓂ ᐱᖓᓱᓂ ᐊᓂᒍᕐᓯᒪᓕᕐᑐᓂ, ᑲᑎᕕᐅᑉ ᐳᓖᓯᖏᑦ ᑎᒍᔨᓐᓂᓯᒪᓕᕐᑐᑦ $1.8 ᒥᓕᐊᓂᒃ ᓈᒻᒪᖁᐊᓕᓐᓂᒃ ᐃᔨᕐᑐᐊᕆᔭᓂᒃ ᐃᒥᐊᓗᓐᓂᒃ.  

ᐃᓱᒪᒋᑦᓱᒋᑦ ᐱᖁᔭᕐᓂᒃ ᓯᖁᒥᑦᓯᒍᑕᐅᔪᑦ ᑕᒪᒃᑯᐊ ᓄᓇᓕᓕᒫᓂ ᐊᒻᒪᓗ ᓱᒃᑯᐃᓚᕆᑉᐸᓱᑎᒃ ᐃᓄᐃᑦ ᐃᓅᓯᖏᓐᓂᒃ ᓄᓇᓕᓐᓂ, ᑲᑎᕕᐅᑉ ᐳᓖᓯᖏᑦ ᐃᓱᒪᑦᓴᓯᐅᕈᑎᖃᓪᓚᕆᓕᕐᑐᑦ ᓄᐃᑦᓯᒋᐊᖃᕐᓂᒥᓂᒃ ᐃᓕᒃᑰᑐᒥᒃ ᑲᒪᓪᓚᕆᕝᕕᒥᒃ ᓄᕐᖃᑎᑦᓯᒋᐊᕐᓂᓄᑦ ᐃᔨᕐᑐᐊᕆᔭᐅᑦᓱᑎᒃ ᓂᐅᕐᕈᑕᐅᕙᓐᓂᖏᓐᓂᒃ ᐃᒥᐊᓗᐃᑦ ᐊᒻᒪᓗ ᐋᖓᔮᓐᓇᑐᐃᑦ ᓄᓇᓕᓕᒫᓂ.  ​

ᑖᓐᓇ ᓄᑖᖅ ᐃᓕᒃᑰᑐᖅ ᐃᑲᔪᕐᑕᐅᕕᐅᓂᕐᓴᐅᒐᔭᕐᑐᖅ ᐊᒻᒪᓗ ᐃᓱᒪᒥᐅᑕᐅᓂᕐᓴᐅᓗᓂ ᐃᖏᕐᕋᑎᑦᓯᓂᒃᑯᑦ ᓄᕐᖃᑎᑦᓯᒐᓱᐊᕐᓂᓂ ᐱᖁᔭᕐᓂᒃ ᓯᖁᒥᑦᓱᒍᑕᐅᔪᓂᒃ ᓂᐅᕐᕈᓯᕐᓂᓂᒃ. ᑲᑎᕕᐅᑉ ᐳᓖᓯᖏᑦ ᐅᖃᐅᓯᖃᖃᑦᑕᓚᖓᔪᑦ ᖃᓄᐃᓕᖓᓂᑦᓴᖏᓐᓂᒃ ᐊᒻᒪᓗ ᓄᕐᖃᑎᑦᓯᒋᐊᕐᓃᑦ ᐱᑦᔪᑎᖏᓐᓂᒃ ᑎᒥᖕᖑᑎᑕᐅᓂᐅᔭᕐᑑᑉ ᑖᑦᓱᒪ ᐱᓇᓱᐊᕈᓰᑦ ᐊᒥᓲᖕᖏᑐᑦ ᓈᑎᓪᓗᒋᑦ ᓄᐃᒋᐊᓚᖓᑦᓱᒍ.  

ᖃᓄᑐᐃᓐᓇᖅ ᖃᐅᔨᑎᑦᓯᒍᑏᑦ ᐃᓕᒪᓇᕐᑐᓂᒃ ᐱᓇᐊᓱᕐᑕᐅᔪᓂᒃ, ᐃᓚᐅᑎᓪᓗᒋᑦ ᓂᐅᕐᕈᓭᓃᑦ ᐋᖓᔮᓐᓇᑐᓂᒃ ᐊᒻᒪᓗ ᐃᒥᐊᓗᓐᓂᒃ, ᐊᑎᕐᒥᓂᒃ ᐅᖃᕆᐊᖃᕈᓐᓀᓗᑎᒃ ᑐᓴᕐᑎᓯᒍᓐᓇᑐᑦ Crime Stoppers-ᓂᒃ ᐱᖁᔭᕐᓂᒃ ᓯᖁᒥᑦᓯᔪᓂᒃ ᓄᕐᖃᑎᑦᓯᔨᓂᒃ ᐅᖄᒍᑎᒧᑦ ᐊᑭᖃᖕᖏᑐᒧᑦ ᓯᕙᓂᕐᓗᑎᒃ ᐅᕗᖓ: 1-800-711-1800. ᑐᓴᕐᑎᓯᔪᑦ ᓇᑯᕆᔭᐅᒍᑎᑖᑐᐃᓐᓇᕆᐊᓖᑦ $2,000 ᑎᑭᓪᓗᒋᑦ.