Latest News

ᓄᑖᑦ ᒪᓕᒉᑦ ᑲᒪᒍᑎᑦᓭᑦ ᑎᒍᔭᐅᒍᓐᓇᒋᐅᒪᔪᖃᓕᕐᐸᑦ ᐅᕝᕙᓘᓐᓃᑦ ᐃᓂᕐᑑᒪᓇᕐᑐᑎᒎᕐᑐᖃᓕᕐᐸᑦ ᐊᕐᓱᕈᕐᑐᓂᒃ

Monday, November 11, 2019
 
ᐃᓛᓐᓂ ᐳᓖᓰᑦ ᑲᒪᒋᐊᖃᕐᐸᑐᑦ ᖁᑭᐅᓯᔭᕐᑐᓂᒃ, ᐃᑎᕐᑕᐅᒍᓐᓇᖏᕐᓯᒪᔪᓂᓪᓗ ᐅᕝᕙᓘᓐᓃᑦ ᐊᓯᒥᓂᒃ ᑎᒍᓯᓯᒪᓂᔪᓂᒃ. ᑌᒣᑐᓂᒃ ᑲᒪᒋᐊᖃᓕᕈᑎᒃ ᐅᐸᓗᙰᕐᓯᒪᖁᔨᑦᓱᑎᒃ ᐱᓇᓱᑦᑎᒥᓂᒃ, ᑲᑎᕕᐅᑉ ᐳᓖᓯᖏᑦ ᐃᓕᓐᓂᐊᑎᑦᓯᓂᖃᓚᐅᔫᑦ ᐊᒃᑑᐸ 8-ᒥᑦ 10-ᒧᑦ.

ᐱᖓᓱᑦ Sûreté du Québec (ᑯᐯᑉ ᐳᓖᓯᖏᑦ, SQ) ᑰᑦᔪᐊᓕᐅᓚᐅᔫᑦ ᓯᕗᓪᓕᐹᒥ ᐃᓕᓐᓂᐊᑎᑦᓯᓂᕐᒥᒃ Filet II ᑲᔪᓯᑎᑦᓯᒋᐊᕐᑐᓱᑎᒃ 12-ᓂᒃ ᑲᑎᕕᐅᑉ ᐳᓖᓯᒻᒪᕆᖁᑎᖏᓐᓂᒃ.

ᐳᓖᓰᑦ ᐊᖓᔪᕐᖄᖓ ᑯᕆᔅᑎᐊᓐ ᒥᓲ ᑯᐯᑉ ᐳᓖᓯᖏᑦᑕ ᖃᐅᔨᓴᕐᓂᓕᕆᓂᕐᓄᑦ ᑭᒡᒐᑐᕐᕕᖓᓂ ᐱᖁᔭᕐᓂᒃ ᓯᖁᒥᑦᓯᔪᕕᓂᕐᓂᒃ, ᓱᕐᖁᐃᓯᒍᑎᑦᓴᓯᐅᕐᓂᓄᑦ ᐃᓱᒪᓐᓂᐊᑎ ᒥᓯᐊᓪ ᓭᓐᑦ-ᐄᕝ ᐊᒻᒪᓗ ᐳᓖᓰᑦ ᓯᕗᓕᕐᑎᖓ ᓘᒃ ᑐᕋᐳ SQ ᐅᐃᒪᓇᕐᑐᖃᓕᕐᐸᑦ ᖃᓄᐃᓕᒋᐊᕐᑎᖏᑦᑕ ᑲᒪᒋᔭᖃᓚᐅᔫᒃ ᐃᓱᐊᕐᓂᐹᒍᓲᓂᒃ ᐃᓕᓐᓂᐊᑎᑦᓯᒋᐊᕐᑐᓱᑎᒃ ᐊᑦᑕᓀᑦᑐᒦᑦᑎᓯᒍᑎᓂᒃ, ᐅᖄᖃᑎᖃᕈᓯᓂᒃ ᐃᓂᕐᑑᒪᓇᕐᑐᒦᑦᑎᓯᔪᓂᒃ, ᐊᑑᑎᔪᓂᒃ ᐊᐅᓚᑦᓯᒍᓯᓂᒃ ᐊᒻᒪᓗ ᐳᓖᓯᓄᑦ ᐊᓯᖏᓐᓄᑦ ᑲᒪᔪᑦ ᑲᒪᒋᔭᐅᔪᓂᒃ ᓅᑦᓯᒍᓯᓂᒃ.

"ᑖᓐᓇ ᐃᓕᓐᓂᐊᑎᑦᓯᓂᖅ ᑐᕌᒐᓕᒃ ᐊᑑᑎᔭᐅᔪᓂᒃ ᐋᕐᕿᓚᖀᒍᓐᓇᑐᓂᒃ ᐊᑦᑕᓈᕿᒍᓐᓀᓗᑎᒃ ᖃᐅᔨᔭᐅᑎᑦᓯᒋᐊᕐᓂᐅᓚᐅᔫᖅ ᐃᓄᐃᑦ ᐊᑦᑕᓀᑦᑐᒦᓐᓂᖏᑦ ᐱᑦᔪᑎᒋᓗᒋᑦ, ᑖᓐᓇᓗ ᐃᓂᕐᑑᒪᑎᑦᓯᔪᖅ ᐊᒻᒪᓗ ᐳᓖᓰᑦ ᖃᓄᐃᓕᖕᖓᖏᓐᓂᓴᐅᖃᑦᑕᖁᒧᑦ," ᓚᓚᐅᔫᖅ ᐳᓖᓰᑦ ᐊᖓᔪᕐᖄᖓ ᒥᓲ. "ᐃᑲᔪᕐᓯᓚᖓᔪᖅ ᐃᓕᓐᓂᐊᑎᑦᓯᓂᖅ ᑲᑎᕕᐅᑉ ᐳᓖᓯᖏᓐᓂᒃ ᐱᔪᓐᓇᓯᒋᐊᓪᓚᓚᕿᓗᒋᑦ ᑲᒪᒋᔭᒥᓂᒃ ᐊᐅᓚᑦᓯᓂᖏᑎᒍᑦ ᐊᕐᓱᕈᓐᓇᑐᒃᑰᕉᑕᕆᓂᕐᓂ," ᓚᒋᐊᓪᓚᓚᐅᔫᖅ.

"ᐳᓖᓯᖁᑎᕗᑦ ᑲᒪᒋᔭᖃᕈᓐᓇᑐᑦ ᓯᕗᒧᐊᑦᑎᓯᓗᑎᒃ ᐊᑦᑕᓇᕐᑐᒦᓐᓇᑐᓂᒃ ᑲᔪᓯᑎᑦᓯᖏᐊᖃᕋᓗᐊᕈᑎᒃ ᐃᑲᐅᕐᓂᓂ ᐊᒥᓱᓂ. ᑌᒣᒻᒪᑦ ᐱᒻᒪᕆᐅᓚᐅᔪᕗᖅ ᑖᑦᓱᒪ ᐱᑦᔪᑎᖃᓪᓚᕆᑦᑑᑉ ᐃᓕᓐᓂᐊᑎᑦᓯᓂᐅᑉ ᐃᖏᕐᕋᓯᑎᑕᐅᓂᖓ ᓈᒻᒪᑐᓂᒃ ᓴᐳᑦᔭᐅᒍᑎᖃᕆᐊᖃᕐᓂᖏᓐᓄᑦ. ᓄᓇᓖᑦ ᑭᒡᒐᑐᕐᑕᐅᔪᑦ ᑲᑎᕕᐅᑉ ᐳᓖᓯᖏᓐᓄᑦ ᐱᕙᓪᓕᖁᑎᖃᕐᓂᐊᒥᔪᑦ ᑖᑦᓱᒥᖓ ᐃᓕᓐᓂᐊᑎᑦᓯᓂᕐᒥᒃ," ᓚᓚᐅᔫᖅ ᑲᑎᕕᐅᑉ ᐳᓖᓯᖏᑦᑕ ᐊᖓᔪᕐᖄᒪᕆᖓ ᔮᓐ-ᐱᐊᕐ ᓚᕈᔅ.

ᑯᐯᑉ ᐳᓖᓯᖏᑦᑕ SQ ᐊᓪᓚᕕᖓ ᓄᓇᖃᕐᖄᑐᕕᓂᓕᕆᓂᕐᓄᑦ ᐃᓕᓐᓂᐊᑎᑦᓯᓂᕐᒥᒃ ᐃᑉᐱᒍᓱᑦᓯᐊᖃᑕᐅᓚᐅᔪᒻᒥᔪᑦ. "ᐅᖄᖃᑎᖃᑦᓯᐊᐸᑦᑐᒍᑦ ᐱᑦᔪᑎᖃᑦᓯᐊᑐᓂᒃ ᐃᓕᓐᓂᐊᑎᑦᓯᔨᓂᒃ ᐊᒻᒪᓗ ᑲᑎᕕᐅᑉ ᐳᓖᓯᖏᑦᑕ ᐳᓖᓯᒻᒪᕆᖏᓐᓂᒃ ᑐᑭᓯᒪᐅᑎᒋᐊᖃᕐᓂᑎᓄᑦ ᐱᓇᓱᐊᒐᖏᓐᓂᒃ ᐳᓖᓰᑦ ᑌᒣᑦᑐᑰᓕᕈᑎᒃ. ᐅᕙᑦᑎᓂᒃ ᐃᑲᔪᕐᓯᐅᒥᒐᔭᕐᑐᓂᒃ ᐋᕐᕿᐅᑎᑦᓴᓂᒃ ᓇᓂᔨᑦᓯᐊᕈᒪᒐᑦᑕ ᑕᕐᕋᒥ ᓄᓇᓕᓐᓂ," ᑌᒫᒃ ᐅᖃᓚᐅᔫᖅ ᕿᒥᕐᕈᓂᕐᓄᑦ ᐊᖓᔪᕐᖄᒪᕆᒃ ᔨᓂᐊᑦ ᓭᑫ ᐃᓕᓐᓂᐊᑎᑦᓯᓂᐅᑉ ᐃᓚᖓᓂ ᐁᓯᒪᑫᓐᓇᓚᐅᔫᖅ.

"ᐊᕐᕌᒍᓂ ᐊᒥᓲᓕᕐᑐᓂ, ᐱᐅᓭᒋᐊᕐᓯᒪᓂᖃᓕᕐᑐᒍᑦ Filet II-ᐅᑉ ᐃᖏᕐᕋᑎᑕᐅᓂᖏᓐᓄᑦ ᐱᒻᒪᕆᑦᑕᖏᓐᓂᒃ ᐳᓖᓰᑦ ᐊᑐᐃᓐᓇᐅᓯᐊᕐᓂᓴᐅᖁᒧᑦ ᑲᒪᓪᓚᕆᒋᐊᖃᓕᕈᑎᒃ ᐊᑦᑕᓇᕐᑐᒦᒍᑎᓂᒃ ᐊᒻᒪᓗ ᐱᓇᓱᑦᑎᕗᑦ ᐱᓇᓱᐊᕈᑎᕗᓪᓗ ᑲᔪᓯᑎᑕᐅᓂᖏᓐᓂ. ᐃᖏᕐᕋᓯᑎᑦᓯᓯᒪᓕᕐᑐᒍᑦ ᐃᓱᐊᕐᓂᓴᓂᒃ ᑐᓴᐅᒪᐅᑎᑦᓯᐊᕈᑎᓂᒃ ᐊᒻᒪᓗ ᐱᓇᓱᑦᑎᓂᒃ ᐱᓇᓱᐊᕈᑎᓂᓪᓗ ᒪᓐᑐᔨᐊᓚᒦᑦᑐᓂᒃ ᑲᒪᑎᑦᓯᓯᒪᓕᕐᓱᑕ ᐊᖏᖃᑎᖃᕋᓱᐊᕐᑎᓱᒋᑦ ᐃᓂᕐᑑᒪᓇᕐᑐᑎᒎᕐᑎᓯᔪᓂᒃ ᐊᒻᒪᓗ ᑲᔪᓯᑎᑦᓯᓯᒪᑦᓱᑕ ᖃᐅᔨᓴᕐᓃᑦ ᐃᓚᖏᓐᓂᒃ ᐃᓚᒋᑦᓱᒋᑦ ᐃᓄᐃᑦ ᑲᒪᓪᓚᕆᑦᑐᑦ ᑖᒃᑯᓂᖓ ᐃᓕᒃᑰᑎᕐᑐᓂᒃ ᐃᓄᓐᓂᒃ," ᓚᓚᐅᔫᖅ ᐳᓖᓰᑦ ᐊᖓᔪᕐᖄᖓ ᒥᓲ.​

"ᐃᑉᐱᒋᑦᓱᒋᑦ ᐳᓖᓯᖁᑎᑦᑕ ᖃᓄᐃᓕᒍᑎᒋᓯᒪᔭᖏᑦ, ᑖᓐᓇ ᐃᓕᓐᓂᐊᑎᑦᓯᓂᖅ ᐱᓇᓱᐊᓕᕈᑎᒃ ᐊᑑᑎᖃᑦᓯᐊᑎᑦᓯᓚᕿᓯᒪᖃᑦᑕᓛᓕᕐᑐᖅ," ᓚᓚᐅᕐᑐᖅ ᑲᑎᕕᐅᑉ ᐳᓖᓯᖓᑕ ᐊᖓᔪᕐᖄᒪᕆᖓ ᓚᕈᔅ.