Latest News

ᐳᕕᕐᓂᑐᖅ: ᒪᕐᕉᒃ ᐊᖑᑏᒃ ᑕᑯᔭᐅᔫᒃ ᓯᑕᒪᓂ ᐅᓪᓗᓂ ᕿᓂᕐᑕᐅᓕᕐᓱᑎᒃ

Friday, May 1st, 2020
 
ᒪᕐᕉᒃ ᐊᖑᑏᒃ ᐊᓯᐅᔪᕕᓂᐅᑦᓱᑎᒃ ᐳᕕᕐᓂᑐᒧᑦ ᐅᑎᕋᓱᐊᓕᕐᓱᑎᒃ ᑕᑯᔭᐅᓚᐅᕐᑑᒃ ᕿᓂᕐᑐᓄᑦ ᓯᑕᒪᓂ ᐅᓪᓗᓂ ᕿᓂᕐᑕᐅᓕᕐᓱᑎᒃ.

ᓂᕿᑦᓯᑐᓂ, ᐁᐸᔭᓕ 24-ᒥ, ᒪᕐᕉᒃ ᐊᖑᑏᒃ ᐳᕕᕐᓂᑐᒥ ᐊᐅᓪᓚᑐᕕᓃᒃ ᐃᖃᓘᔭᕆᐊᓯᑦᓱᑎᒃ ᑕᓄᓱᐊᓗᒻᒧᑦ, 50-ᓂᒃ ᑭᓗᒦᑕᓂᑦ ᐅᖓᓯᑦᑕᓕᒻᒥ. ᐅᓐᓄᓴ ᐅᑎᓚᖓᔪᕕᓂᐅᑦᓱᑎᒃ ᑎᑭᓐᓂᖏᓐᑑᒃ.

ᑕᒪᖏᒃ ᑎᑭᒻᒣᑑᒋᐊᖏᒃ ᖃᐅᔨᒪᔭᐅᓕᕐᓚᐅᔫᒃ ᐊᓪᓕᖏᓱᖓᕐᑐᓂ ᐅᓪᓛᓭᓐᓇᖅ. ᕿᓂᕆᐊᕐᑕᐅᑲᐱᓯᔪᕕᓃᒃ. ᓯᕗᓪᓕᐹᒥ ᕿᓂᕐᑐᑦ ᐃᖏᕐᕋᓯᓚᐅᔫᑦ. ᓄᓇᓖᑦ ᐊᒥᓱᐃᓂᒃ ᖃᒧᑎᑲᓪᓚᑯᑦ ᒪᕐᕉᓂᒃ ᐊᖑᑏᓐᓂᒃ ᕿᓂᕆᐊᕐᑎᓯᓚᐅᔫᑦ. ᑳᓴᓖᒡᒋᓯᐊᕐᓂᖏᒋᐊᖏᑦ ᖃᐅᔨᒪᔭᐅᓚᐅᔫᒃ. ᐅᓪᓗᖅ ᐃᓱᓕᑎᓪᓗᒍ, ᕿᓂᕐᑐᑦ ᓄᕐᖃᑫᓐᓇᕆᐊᖃᓚᐅᕐᑐᑦ ᓯᓚᕐᓂᓗᒻᒧᑦ.

ᐅᓪᓛᑯᑦ, 14 ᕿᓂᕆᐊᓯᓚᐅᕐᑐᑦ ᐳᕕᕐᓂᑐᒥᑦ ᐊᐅᓪᓚᓱᑎᒃ ᖃᒧᑎᑲᓪᓚᑯᑦ. ᕿᑎᕋᓕᒥ, ᕿᓂᓪᓚᕆᓯᓚᐅᕐᑐᑦ 2-ᖓᓕᐊᓂ ᓯᕗᓪᓕᒥ ᑕᑯᔭᐅᓚᐅᔪᖕᖏᒪᓃᒃ, ᐊᒻᒪᓗ ᓯᓚ ᐱᐅᑦᓯᖏᑦᑑᓚᐅᔪᑦᓱᓂ. ᑲᑎᕕᐅᑉ ᐳᓖᓯᖏᑦ ᑎᒻᒥᔫᒥᒃ ᓵᑕᓚᐅᔫᒃ ᓄᓇᐅᑉ ᖁᓛᒍᑦ ᐃᖏᕐᕋᓚᖓᔪᒥᒃ ᕿᓂᕐᓗᓂ. ᑲᑎᕕᐅᑉ ᐳᓖᓯᖏᑦ ᐅᓇᑕᕐᑎᓴᓂᒃ ᑎᓕᔨᓚᐅᔪᒻᒥᔪᑦ ᕿᓂᖃᑕᐅᖁᑦᓱᒋᑦ. ᐅᓐᓄᓴᒃᑯᑦ ᕿᓂᕈᓐᓀᓚᐅᔫᑦ ᓯᓚᕐᓂᓗᓯᒌᕐᒥᑎᓪᓗᒍ.

ᐊᓪᓕᕇᕐᑐᓂ, ᐅᓇᑕᕐᑎᓭᑦ ᕿᓂᕐᓂᒥᒃ ᑲᔪᓯᓚᐅᔫᑦ, ᐊᒻᒪᓗ ᑲᑎᕕᐅᑉ ᐳᓖᓯᖏᑦ ᒪᕐᕈᒋᐊᓪᓛᓂᒃ ᑎᒻᒥᔫᓂᒃ ᑎᓕᔨᑦᓱᑎᒃ ᕿᓂᓚᖓᑎᓪᓗᒋᒃ ᐅᓪᓛᑯᑦ ᐊᒻᒪᓗ ᕿᑎᕋᓕᕇᒥ. ᐅᓐᓄᓴᒃᑯᑦ, ᕿᓂᕐᑐᑦ ᐃᖃᓘᔭᕐᓱᑎᒃ ᐃᓚᖓᑦ ᐁᑉᐸᖓᓂ ᑕᑯᔪᕕᓃᑦ. ᓯᓚᑖᓂᐊᐱᑐᐃᓐᓈᓚᐅᔫᖅ ᕿᓂᕐᕕᐅᓚᖓᔫᑉ. ᐅᑎᓕᕐᓱᑎᒎᖅ, ᓄᓇᓕᓐᓄᑦ ᐊᕐᖁᑎᒋᓂᐊᕐᑕᒥᓂᒃ ᐊᓯᐊᒌᒃᑯᑎᑎᒍᑦ ᐱᑕᖃᖕᖏᑑᔪᕕᓂᐅᓂᕋᓚᐅᔫᖅ GPS-ᒥ. ᐊᓯᐊᔪᕕᓂᐅᓂᕋᕐᓱᓂ, ᐃᖏᕐᕋᑐᐃᓐᓇᑐᕕᓃᒎᖅ ᐸᓕᕋᑕᕐᓱᑎᒃ, ᐱᓯᓱᑦᓱᑎᓪᓗ. ᑕᑯᑎᑦᓯᔪᕕᓂᖅ ᒪᙯᖃᑎᒥᑕ ᐊᓯᐊᒌᒃᑯᑎᒃᑯᑦ ᓇᔪᕐᑕᖓᓂᒃ. ᐅᓐᓄᐊᖃ ᕿᓂᕐᑕᐅᓕᕐᑐᕕᓂᖅ.

ᐁᑉᐱᑐᓂ, ᐅᓪᓛᑯᑦ, ᓯᑕᒣᖓ ᑎᒻᒥᔫᖅ ᐳᕕᕐᓂᑐᒥᑦ ᖃᖓᑦᑕᓕᕐᓂᒥᔪᖅ ᐅᓇᑕᕐᑎᓭᑦ ᐊᒻᒪᓗ ᐊᓯᖏᑦ ᕿᓂᕐᑐᑦ ᑲᔪᓯᑎᓪᓗᒋᑦ ᕿᓂᕐᓱᑎᒃ. ᕿᑎᕋᓕᒥ, ᐅᓇᑕᕐᑎᓭᑦ ᑕᑯᓕᕐᑐᕕᓃᑦ ᖃᒧᑎᑲᓪᓚᒥᒃ ᐊᖑᑏᒃ ᐊᑐᕐᑕᕕᓂᖓᓂᒃ. ᑭᖑᓂᐊᐱᐊᒍᑦ ᑐᖓᓕᐊ ᐊᖑᑎᒃ ᐊᓯᐅᒪᔪᖅ ᕿᓂᕐᕕᐅᓚᖓᔪᒥ ᓄᓇᒥ ᑕᑯᔭᐅᓕᕐᓂᒥᔪᖅ.

"ᕿᓂᓚᐅᕐᑐᓂᒃ ᐊᒻᒪᓗ ᐅᓇᑕᕐᑎᓴᓂᒃ ᐱᒐᓱᐊᑦᓯᐊᖃᑦᑕᓚᐅᕐᒪᑕ ᓇᑯᕐᒦᐳᖓ," ᓚᓚᐅᕐᑐᖅ ᐳᓖᓰᑦ ᓯᕗᓕᕐᑎᖓ ᒫᓯᐅ ᓵᕕᑦᔅ. "ᐊᓕᐊᓇᓚᐅᕐᑑᒐᓗᐊᑦ ᑕᑯᔭᐅᒻᒪᓃᒃ, ᑐᑯᕙᑦᑐᒍᑦ ᐊᒻᒪᓗ ᑐᓴᕐᐸᓱᑕ ᐊᓕᐊᓇᖕᖏᑐᓂᒃ. ᐃᓄᓐᓂᒃ ᒪᙯᓲᓂᒃ ᐊᑦᔭᓯᒋᐊᖃᕆᐊᖏᓐᓂᒃ ᐱᐅᓕᓂᐊᒐᕐᓂᒃ ᐊᒻᒪᓗ ᐅᖄᒍᑎᓂᒃ ᑐᓴᕐᑎᓯᒋᐊᓪᓚᐳᖓ, ᐅᓪᓗᓭᓐᓇᖅ ᐅᑎᓚᖓᒐᓗᐊᕈᑎᒃ. ᓚᓲᒍᒻᒪᑕ, ᐅᑎᑦᓯᐊᑐᑦ ᐊᓕᐊᓇᕐᒪᑕ ᐊᓯᐅᑐᐃᓐᓇᖁᓇᖕᖏᒪᑕ."

ᑲᑎᕕᐅᑉ ᐳᓖᓯᖏᑦ ᐊᒻᒪᓗ ᑫᐋᔩᑉ ᐃᓄᓐᓂᒃ ᐊᑦᑕᓀᑦᑐᒦᑦᑎᓯᓂᕐᓄᑦ ᐱᓇᓱᕝᕕᖓ ᐃᕐᙯᑎᑦᓯᒍᒪᕗᑦ ᓄᓇᕕᒻᒥᐅᓂᒃ ᐊᐅᓪᓚᓯᒍᑎᒃ ᐃᒣᖃᑦᑕᖃᑦᑕᕆᐊᖃᕐᒪᑕ:

  • ᐃᓚᒥᓂᒃ ᐃᓚᓐᓈᒥᓂᓘᓐᓃᑦ ᓇᒧᖕᖓᓂᐊᕐᒪᖔᒻᒥᒃ ᐅᑎᕐᕕᓴᒥᓂᓗ ᑐᓴᐅᒪᑎᑦᓯᖃᑦᑕᓗᑎᒃ;
  • ᐅᖄᒍᑎᒡᒋᖃᑦᑕᓗᑎᒃ ᐆᕚᕈᑎᒥᓪᓘᓃᑦ;
  • ᓯᓚ ᖃᓄᐃᓚᖓᒻᒪᖔᑦ ᖃᐅᔨᓴᒐᓱᐊᕐᖄᖃᑦᑕᓗᑎᒃ;
  • ᐊᑦᔭᓯᖃᑦᑕᓗᑎᒃ ᐱᐅᒃᑯᑎᒋᒋᐊᓕᒥᓂᒃ, ᐆᑦᑑᑎᒋᓗᒋᑦ:
    • ᑐᐱᖅ ᐊᒻᒪᓗ ᒪᙯᓯᐅᑏᑦ ᕿᐲᑦ;
    • ᑕᖁᐊᑦ 48-ᓄᑦ ᐃᑲᐅᕐᓂᓄᑦ ᓈᒻᒪᓚᖓᔪᑦ;
    • ᐅᕐᓱᓴᒋᐊᓪᓓᑦ ᐊᒻᒪᓗ ᑳᓴᓖᒋᐊᓪᓓᑦ.

      ​ᑕᑯᒻᒥᓗᒋᑦ: ᓄᓇᒦᑦᓯᐊᕆᑦᓯ ᐊᑦᑕᓈᕿᒍᓐᓀᓗᓯ!​