Latest News

ᑲᑎᕕᐅᑉ ᐳᓖᓯᖏᑦ ᑐᓂᔨᓚᐅᕐᑐᑦ ᐱᖓᓱᓄᑦ ᑕᕐᕿᓅᓕᖓᔪᓂᒃ ᓱᓇᓱᐊᓚᐅᕐᑕᖏᓐᓄᑦ ᑐᓴᕐᑎᓯᒍᑎᒥᓂᒃ ᑲᑎᕕᐅᑉ ᑲᑎᒪᔨᖏᓐᓂᒃ

Monday, March 5, 2018
 
ᕕᕗᐊᕆ 28-ᒥ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᐃᓄᓐᓂᒃ ᐊᑦᑕᓇᕐᑐᒥᑦᑎᓯᑦᑌᓕᔩᑦ ᐱᓇᓱᐊᕐᕕᖓᓂ, ᐊᐅᓚᑦᓯᕕᐅᒻᒥᔪᒥᒃ ᑲᑎᕕᐅᑉ ᐳᓖᓯᖏᓐᓂᒃ ᐊᒻᒪᓗ ᐃᓄᓐᓂᒃ ᐊᑦᑕᓇᕐᑐᒥᑦᑎᓯᑦᑌᓕᒪᓂᕐᒥᒃ, ᑐᓂᔨᓚᐅᔪᕗᑦ ᓱᓇᓱᐊᓚᐅᕐᑕᒥᑕ ᑐᓴᕐᑎᓯᒍᑎᖏᓐᓂᒃ ᑏᓯᒻᐱᕆ 2017 ᐊᒻᒪᓗ ᕕᕗᐊᕆ 2018-ᒧᑦ ᐅᓪᓗᖏᓐᓅᓕᖓᔪᓂᒃ.

ᑖᒃᑯᐊ ᑐᓂᔭᐅᓂᖃᕐᑎᓗᒋᑦ ᑲᑎᕕᐅᑉ ᐳᓖᓯᖏᑦᑕ ᐊᖓᔪᕐᖄᑖᕐᖃᕐᒥᖓᑦ, ᔭᓐ-ᐱᐊᕐ ᓚᕉᔅ, ᑕᑯᔭᐅᒋᐅᓚᐅᔪᕗᖅ ᓯᕗᓪᓕᐹᑦᓯᐊᒥ ᐃᓂᒥᓄᕐᑕᐅᓯᒪᓕᕐᑎᓗᒍ ᕕᕗᐊᕆᐅᓚᐅᔪᒥᓂᑦ.

ᑲᑎᒪᔩᑦ ᐅᖄᖃᑎᖃᓚᐅᔪᑦ ᑲᑎᕕᐅᑉ ᐳᓖᓯᖏᑦᑕ ᑲᒪᔨᒻᒪᕆᖏᓐᓂᒃ ᐱᑦᔪᑎᖃᕐᓱᑎᒃ ᖁᑭᐅᓯᔭᓲᖑᓂᕐᒥᒃ, ᐊᓯᖏᓐᓂᒃ ᐅᓗᕆᐊᓇᕐᑐᓴᖃᕐᓂᒥᒃ, ᒪᑯᓂᖓ ᕿᓯᐊᓗᔭᕐᓂᒃ ᓴᒃᑯᖃᓲᖑᓂᕐᒥᒃ ᐊᒻᒪᓗ ᐃᑯᒪᐅᑎᒨᕐᑐᓂᒃ.  ᑕᒪᒃᑯᓇᓂ ᐊᕐᕌᒍᓯᒪᓕᕐᑐᓂ ᑲᑎᕕᐅᑉ ᐳᓖᓯᖏᑦ ᑐᕌᒐᓕᐅᕐᓯᒪᓲᖑᓕᕐᒪᑕ ᐊᑕᐅᓯᕐᔪᐊᒥᐅᓐᓃᑦ ᐃᑯᒪᐅᑎᒨᕐᑐᒥᒃ ᖁᑭᐅᑎᖃᓲᖑᓂᐊᓕᕐᑎᓗᒋᑦ ᐊᑐᓂᑦ ᓄᓇᓕᓕᒫᑦᓯᐊᑦ ᐳᓖᓯᒥᒃ ᐃᓕᓐᓂᐊᑎᑕᐅᒪᔪᖃᕐᑎᓗᒋᑦ ᐊᑐᕐᑕᐅᕈᓯᖏᓐᓂᒃ.  ᑲᑎᕕᐅᑉ ᐳᓖᓯᖏᑦ ᒫᓐᓇᑯᑦ ᐱᖓᓲᔪᕐᑐᓂᒃ ᐃᑯᒪᐅᑎᒨᕐᑐᓂᒃ ᖁᑭᐅᑎᖃᓲᖑᓕᕐᑐᑦ.

ᐃᓱᒫᒍᑎᖃᓚᐅᔪᒻᒥᔪᑦ ᖁᑭᐅᑏᑦ ᓇᓗᓀᕐᑕᐅᒪᒋᐊᖃᓲᖑᓕᕐᓂᖏᓐᓄᑦ.  ᑯᐯᒃᑯᑦ ᐱᖁᔭᐱᖏᓐᓂᒃ ᑲᔪᓯᑎᑕᐅᔪᖃᓚᐅᔪᒻᒪᑦ ᑕᒪᒃᑯᐊ ᖁᑭᐅᑎᓖᑦ ᓇᓗᓀᕐᑕᐅᑎᑦᓯᒋᐊᖃᓕᕐᑎᓗᒋᑦ ᐅᓗᕆᐊᓇᕐᑐᖁᑎᒥᓂᒃ ᑭᖑᓪᓕᐅᓂᐊᕐᑐᒥ ᐊᕐᕌᒍᕐᒥ.  ᑲᑎᕕᐅᑉ ᐳᓖᓯᖏᑦ ᐃᓱᒪᖃᕐᓯᒪᔪᑦ ᐃᑲᔪᕐᓯᓂᐊᕆᐊᒥᒃ ᓄᓇᕕᒻᒥᐅᓂᒃ ᓇᓗᓀᕐᑕᐅᑎᑦᓯᑎᓗᒋᑦ ᖁᑭᐅᑎᒥᓂᒃ, ᐊᑐᐃᓐᓇᕈᕐᑎᓗᒋᑦ ᖃᓄᐃᓕᖓᓂᐅᓂᐊᓕᕐᑐᒧᑦ ᐊᒻᒪᓗ ᐅᖃᕐᒥᓱᑎᒃ ᐃᓱᒫᖃᑕᐅᒻᒥᒋᐊᒥᓄᑦ ᓱᕐᕃᑐᐃᓐᓇᕆᐊᖃᓚᖓᓂᖓᓄᑦ ᐃᓄᐃᑦ ᐃᓗᕐᕈᓯᖓᓂᒃ ᓄᓇᕕᒻᒥ.


ᓴᐅᒥᐊᓂᑦ ᑕᓕᕐᐱᐊᓄᑦ: ᑲᑎᕕᐅᑉ ᐳᓖᓯᖏᑦᑕ ᐊᖓᔪᕐᖄᖓᓄᑦ ᑐᖓᓕᖓ ᒥᓯᐊᓪ ᒪᕐᑌᓐ, ᐊᖓᔪᕐᖄᑉ ᑐᖓᓕᖓᑦ ᔮᓂ-ᑮ ᓚᓘᓐᑦ, ᑲᑎᕕᐅᑉ ᐳᓕᓯᖏᑦᑕ ᐊᖓᔪᕐᖄᖓᑦ ᔮᓐ-ᐱᐊᕐ ᓚᕉᔅ ᐊᒻᒪᓗ ᐊᖓᔪᕐᖄᒧᑦ ᑐᖓᓕᐅᒻᒥᔪᖅ ᐱᐊᓐᒍᐊ ᑉᓛᓐᑦ

ᐃᓅᓂᒃᑯᑦ ᐊᑦᔨᒋᖏᑑᑎᑦᓯᓂᕐᒥᒃ ᐅᖃᐅᓯᕆᔭᐅᔪᖃᓚᐅᔪᒻᒥᔪᖅ: ᐃᓚᖏᑦ ᑭᓇᒐᓚᒃᑯᑦ ᒪᖓᑦᓯᓲᖑᒻᒪᑕ ᐃᓄᐃᑦ ᑐᓄᖏᑎᒍᑦ ᓄᓇᓖᑦ ᐃᓚᖏᓐᓂ.  ᑕᒪᓐᓇ ᐊᕐᕿᓂᕐᓴᐅᖁᓗᒍ, ᐃᓱᒪᒋᔭᐅᓯᒪᓕᕐᑐᖅ ᐳᓖᓯᐅᓂᐊᕐᑐᐃᑦ ᑐᑭᓯᑎᑕᐅᒪᕐᖄᕐᑎᑕᐅᓂᐊᕐᑎᓗᒋᑦ ᐃᓄᐃᑦ ᐱᐅᓯᖏᓐᓂᒃ ᐊᒻᒪᓗ ᑕᒪᓐᓇ ᓴᐳᒻᒥᔭᐅᓂᖃᓚᐅᔪᑦᓱᓂ ᐊᖓᔪᕐᖄᒧᑦ ᓚᕉᔅᒧᑦ:

"ᖃᐅᔨᓚᐅᕐᓯᒪᒍᒪᖕᖏᓚᖓ ᐃᓅᓂᒃᑯᑦ ᐊᑦᔨᒋᖏᑑᑎᑦᓯᑫᓂᕐᒥᒃ.  ᑐᑭᓯᑎᑦᓯᓯᐊᕆᐊᖃᕐᐳᒍᑦ ᓄᓇᕕᐅᑉ ᐃᓄᖏᑦᑕ ᐃᓗᕐᕈᓯᖓᓂᒃ ᐱᓇᓱᑦᑎᓯᒋᐊᓚᐅᕋᑕ ᓇᐅᑐᐃᓐᓇᒥᒃ.  ᑕᒪᑦᓱᒥᖓ ᐃᓱᒪᒋᔭᕐᒥᒃ ᑲᔪᓯᑎᑦᓯᒐᓱᐊᓚᖓᕗᒍᑦ."


ᐊᑦᔨᒋᖏᑐᓂᒃ ᐅᖄᔭᐅᔪᖃᓚᐅᔪᒻᒥᔪᖅ ᑕᒫᓂ ᑐᓂᔭᐅᓂᖃᕐᑎᓗᒍ ᒪᑯᓂᖓ:

  • ᑮᓇᐅᔭᖃᕐᑎᑕᐅᒍᑏᑦ ᓄᑕᐅᓯᓕᕐᑎᑕᐅᓂᖏᓐᓄᑦ: ᑐᑦᓯᕋᐅᑏᑦ ᐊᓪᓚᓯᒪᔪᖁᑎᖏᓐᓂᒃ ᒪᓂᔭᐅᔪᖃᓚᐅᔪᕗᖅ ᑲᕙᒪᑐᖃᒃᑯᓄᑦ ᑯᐯᒃᑯᑦ ᑲᕙᒪᖓᓄᓪᓗ.  ᐃᓱᒪᒋᔭᐅᒐᓱᐊᕐᑐᒥᒃ ᑖᒃᑯᐊ ᐊᖏᖃᑎᒌᒍᑎᐅᓂᐊᕐᑐᑦ ᑕᓪᓕᒪᓄᑦ ᐊᕐᕌᒍᕐᓅᓕᖓᓂᐊᕐᑎᓗᒋᑦ, ᐁᕆᓕ 2018-ᒥᑦ ᒫᑦᔨ 2023-ᒧᑦ.
  • ᐃᓕᓐᓂᐊᑎᑦᓯᓂᕐᒧᑦ: ᑲᑎᕕᐅᑉ ᐳᓖᓯᖏᑦᑕ ᐳᓖᓯᖁᑎᖓᓂᒃ ᐃᓕᓐᓂᐊᑎᑕᐅᔪᖃᓚᐅᔪᕗᖅ ᐊᖓᔮᓐᓇᑐᓕᕆᓂᕐᒥᒃ ᐃᓕᑕᕐᓯᒍᓐᓇᓯᐊᕈᓯᕐᓂᒃ ᐊᑐᐃᓐᓇᕈᕐᑎᐸᓪᓕᐊᕈᑎᒋᑦᓱᒍ 2018-ᒥ ᐊᖓᔮᓐᓇᑑᑉ ᓱᐳᕐᑐᒐᐅᑉ ᐱᖁᔭᓕᐅᕐᑕᐅᖑᓱᓐᓂᖓᓄᑦ.  ᐊᑯᓂᕐᑐᒥᒃ ᑕᑯᓐᓈᕈᑎᒋᑦᓱᒍ, ᑲᑎᕕᐅᑉ ᐳᓖᓯᖏᑦ ᖃᐅᔨᒪᔪᒻᒪᕆᒻᒥᒃ ᑌᒣᑦᑐᓕᕆᓂᕐᒥᒃ ᐱᑕᖃᖁᔨᒐᔭᕐᑐᑦ ᐊᑐᓂᑦ ᓄᓇᓕᓐᓂ.
  • ᐊᖓᔮᓐᓇᑑᑉ ᓱᐳᕐᑐᒐᐅᑉ ᐱᖁᔭᓕᐅᕐᑕᐅᖑᓱᓐᓂᖓᓄᑦ: ᑲᑎᕕᐅᑉ ᐳᓖᓯᖏᓐᓄᑦ ᐊᖓᔪᕐᖄᕆᔭᐅᓯᒪᔪᒥᒃ ᒥᓯᐊᓪ ᒪᕐᑌᒥᒃ ᐁᓯᒪᔪᖃᓚᐅᔪᕗᖅ ᐃᓚᖃᕐᓱᓂ ᐊᓯᖏᓐᓂᒃ ᑲᑎᕕᐅᑉ ᑭᒡᒐᑐᕐᑎᖏᓐᓂᒃ ᐅᖃᕐᕕᒪᕆᒃᑯᓄᑦ ᐃᑦᓯᕙᑎᑕᐅᔪᓂᒃ ᐱᑦᔪᑎᖃᕐᓱᑎᒃ ᐊᖓᔮᓐᓇᑑᑉ ᓱᐳᕐᑐᒐᐅᑉ ᒪᓕᒐᓕᐅᕐᑕᐅᖑᓱᓐᓂᖓᓄᑦ ᐊᒻᒪᓗ ᓱᕐᕃᓚᖓᓂᖏᓐᓄᑦ ᓄᓇᖃᕐᖄᓯᒪᔪᐃᑦ ᓄᓇᓕᖏᓐᓂᒃ.  ᑖᒃᑯᐊ ᐅᖃᐅᓯᖃᓚᐅᔪᒻᒥᔪᑦ ᐃᓱᒫᓗᑎᒥᓂᒃ, ᐱᓗᐊᕐᑐᒥᒃ ᐊᖓᔮᓐᓇᑐᕐᑐᓯᒪᑦᓱᑎᒃ ᐊᖁᖃᑦᑕᓲᖑᓂᐊᕐᑐᓂᒃ ᐊᒻᒪᓗ ᖃᓄᖅ ᖃᐅᔨᔭᐅᒍᓯᖃᓲᖑᓂᐊᕐᓂᖏᓐᓄᑦ;
  • ᐱᒪᑎᑦᓯᑌᓕᒪᓂᕐᒥᒃ ᓄᓇᓕᓐᓂᓗ ᐱᒋᐊᕐᑎᑕᐅᓂᐊᕐᑐᓂᒃ ᐃᓚᐅᖃᑕᐅᓚᖓᓂᖏᓐᓄᓗ: ᑲᑎᕕᐅᑉ ᐳᓖᓯᖏᑦ ᐅᖃᐅᓯᖃᓚᐅᔪᑦ ᐊᑦᔨᒋᖏᑐᓂᒃ ᓱᓇᓱᐊᖃᑦᑕᓚᐅᕐᑕᒥᓄᑦ ᐃᓚᐅᖃᑕᐅᑦᓱᑎᒃ ᐊᑦᔨᒋᖏᑐᓄᑦ ᓄᓇᓕᓐᓄᑦ;
  • ᐱᓗᑲᑦᑕᐅᔪᕕᓃᑦ ᑭᓯᑕᐅᒪᒍᑎᖏᑦ:
    • ᐱᒋᐊᕐᓂᔪᕕᓃᑦ ᐃᑭᓪᓕᓕᐅᒥᓂᕐᓴᐅᓚᐅᕐᑐᑦ 6.5% ᐳᓴᓐᑎᒐᓚᓐᓄᑦ 2016 ᑕᑯᓐᓈᓱᒍ ᐊᒻᒪᓗ ᐃᒥᐊᓗᒻᒨᓕᖓᔪᑦ ᐃᑭᓪᓕᓕᐅᒥᒻᒥᓱᑎᒃ 15.9% ᐳᓴᓐᑎᓄᑦ.
    • ᓄᓕᐊᓂᕐᓗᓃᑦ ᐅᓄᕐᓯᓕᐅᒥᓚᐅᕐᑐᑦ 13.2% ᐳᓴᓐᑎᒐᓚᓐᓄᑦ 2016 ᑕᑯᓐᓈᓱᒍ ᐊᒻᒪᓗ ᐃᒥᐊᓗᒻᒨᓕᖓᔪᐃᑦ ᐅᓄᕐᓯᒋᐊᓚᐅᕐᓱᑎᒃ 21.24% ᐳᓴᓐᑎᓄᑦ;
    • ᐃᓚᓯᒪᑦᓱᑎᒃ ᐊᖁᑦᑐᕕᓃᑦ ᐅᓄᕐᓯᓕᐅᒥᓚᐅᕐᑐᑦ 4.9 ᐳᓴᓐᑎᒐᓚᓐᓄᑦ 2016 ᑕᑯᓐᓈᓱᒍ;
    • ᐱᓗᑲᑦᑐᕕᓃᑦ ᐃᑭᓪᓕᓕᐅᒥᓯᒪᓕᕐᑐᑦ 11.74% ᐳᓴᓐᑎᒐᓚᓐᓄᑦ ᐃᒣᓕᖓᑦᓱᓂ 1,475-ᓂᒃ ᐱᓗᑲᑦᑐᖃᖕᖏᓂᕐᓴᐅᓕᓚᐅᕐᒪᑦ 2016 ᑕᑯᓐᓈᓱᒍ.
ᑕᒪᒃᑯᐊ ᐅᖄᔭᐅᒌᑐᐊᕐᒪᑕ, ᑲᑎᕕᐅᑉ ᐃᑦᓯᕙᐅᑕᖓᑦ ᔨᐊᓂᕙ ᒪᓂᒃ ᓱᕐᖁᐃᑕᐅᑎᑦᓯᓚᐅᔪᕗᖅ ᑖᑦᓱᒪ ᐳᓖᓯᒃᑯᑦ ᐊᖓᔪᕐᖄᕆᓚᐅᔪᔭᖓᑕ ᒥᓯᐊᓪ ᒪᕐᑌᓐ ᐱᓇᓱᐊᖃᑦᑕᓚᐅᕐᑕᖏᓐᓂᒃ ᑲᑎᕕᐅᑉ ᐳᓕᓯᖏᓐᓂᒃ ᐱᒍᑦᔨᓚᐅᕐᒪᑦ ᔫᓂ 2015-ᒥᓂᑦ.