Latest News

ᐃᒥᕐᓯᒪᔪᑦ ᐊᖁᒻᒪᖔᑕ ᐃᑉᐱᒍᓱᓐᓂᖅ ᑰᑦᔪᐊᒥ: 2 ᐃᓕᒪᒋᔮᒃ ᑎᒍᔭᐅᔫᒃ

Thursday, October 29, 2020
 
ᓂᕿᑦᓯᑐᓂ ᐊᒃᑑᐸ 23-ᒥ, ᑲᑎᕕᐅᑉ ᐳᓖᓯᖏᑦ ᐊᕐᖁᑎᒥ ᐊᖁᑦᑐᓂᒃ ᓄᕐᖃᑎᑦᓯᖃᑦᑕᓚᐅᕐᑐᑦ ᑰᑦᔪᐊᒥ. ᑐᕌᒐᐅᓚᐅᕐᑐᖅ ᐊᖁᒋᐊᖃᕐᓂᖅ ᐊᑦᑕᓇᕈᓐᓀᓗᓂ ᐊᒻᒪᓗ ᐋᖓᔮᒍᓐᓀᓗᓂ.

75 ᐅᖓᑖᓅᕐᑐᑦ ᓄᕐᖃᑎᑕᐅᖃᑦᑕᓚᐅᕐᑐᑦ ᐃᓕᒪᔪᓂᒃ ᐊᖁᑦᑐᖃᕐᒪᖔᑦ ᖃᐅᔨᓴᕐᓂᖃᕐᑎᓗᒍ. ᒪᕐᕉᒃ ᐃᓅᒃ ᖃᐅᔨᔭᐅᓚᐅᕐᑑᒃ ᐋᖓᔮᑦᓱᑎᒃ ᐊᖁᑦᑎᓗᒋᒃ ᑎᒍᔭᐅᑦᓱᑎᓪᓗ.

ᐊᒃᑑᐸ 19 ᐱᓇᓱᐊᕈᓯᖓᓂ, ᑲᑎᕕᐅᑉ ᐳᓖᓯᖏᑦ ᑖᑦᓱᒥᖓ ᑐᓴᕐᑎᓯᓚᐅᔫᑦ ᓯᕗᓂᐊᒍᑦ ᑐᓴᐅᒪᑎᑦᓯᓱᑎᒃ ᑰᑦᔪᐊᒥ ᐊᖁᑦᑐᓂᒃ ᓄᕐᖃᑎᑦᓯᖃᑦᑕᓛᕐᓂᒥᓂᒃ ᐋᖓᔮᑦᑐᓂᒃ ᐊᖁᑦᑐᖃᕐᒪᖔᑦ ᖃᐅᔨᒐᓱᐊᕐᓗᑎᒃ.  

"ᐊᕐᖁᑎᒥ ᐊᖁᑦᑐᖃᕐᒪᖔᑦ ᐋᖓᔮᑦᑐᓂᒃ ᖃᐅᔨᒐᓱᐊᖃᑦᑕᓂᖅ ᐱᕙᓪᓖᒍᑕᐅᒍᓐᓇᑐᖅ ᐊᒻᒪᓗ ᐋᖓᔮᓪᓗᑎᒃ ᐊᖁᒋᐊᖃᖕᖏᑐᓂᒃ ᐃᑉᐱᒍᓱᓕᕐᑎᓯᐅᑕᐅᒍᓐᓇᓱᓂ ᑖᓐᓇ ᐱᖁᔭᕐᓂᒃ ᓯᖁᒥᑦᓯᓂᖅ ᐱᒻᒪᕆᐅᑎᑕᐅᒻᒪᑦ ᑲᑎᕕᐅᑉ ᐳᓖᓯᖏᓐᓄᑦ," ᓚᓚᐅᕐᑐᖅ ᑲᑎᕕᐅᑉ ᐳᓖᓯᖏᑦᑕ ᓯᕗᓕᕐᑎᖓ ᒫᒃ-ᐅᓕᕓ ᑐᑯᓗᔅ. "ᑖᑦᓱᒥᖓ ᐃᖏᕐᕋᑎᑦᓯᓂᖅ ᑐᑭᓯᓇᑦᓯᐊᑐᖅ: ᐃᒥᐊᓗᓪᓗᑎᑦ ᐊᖁᓐᓇᒃ." ​

ᐊᕐᖁᑎᓂ ᓄᕐᖃᑎᑦᓯᑲᑦᑕᓂᖅ ᐊᑑᑎᑎᑕᐅᓕᐅᒥᔮᖃᑦᑕᓛᕐᑐᖅ ᐊᒻᒪᓗ ᑌᒪᖕᖓᑦ ᑐᓴᐅᒪᔭᐅᑎᑕᐅᖃᑦᑕᕈᓐᓀᓗᓂ ᐋᖓᔮᑦᑐᖃᕐᒪᖔᑦ ᐊᖁᑦᑐᓂᒃ ᓄᕐᖃᑎᑦᓯᑲᑦᑕᓂᖅ. ᑲᑎᕕᐅᑉ ᐳᓖᓯᖏᑦ ᐃᓘᓐᓀᓂᒃ ᓄᓇᕕᒻᒥᐅᓕᒫᓂᒃ ᑫᓪᓗᑐᐃᓂᖃᕐᐳᑦ ᐋᖓᔮᓪᓗᑎᒃ ᐊᖁᑉᐸᖁᓇᒋᑦ ᐋᖓᔮᒍᑎᓗ ᐊᓯᒥᓂᒃ ᐊᖁᑦᑎᒋᓚᖓᔭᒥᓂᒃ ᐃᓚᒪᒍᑎᒃ ᓇᓗᓀᕐᓯᓯᒪᖃᑦᑕᕆᐊᖃᕐᓱᑎᒃ.