Latest News

ᕿᓂᕐᑕᐅᔪᑦ ᐊᓐᓇᑎᑕᐅᑦᓯᐊᓂᕕᓂᖏᑦ ᑎᑭᕋᓴᕐᔪᐊᒥᒃ

Wednesday, July 26, 2017
 
ᔪᓓ 17, 2017-ᖑᑎᓪᓗᒍ, ᓯᑕᒪᐅᔪᖕᖏᒐᕐᑐᐃᑦ ᐃᓄᐃᑦ ᐊᓐᓇᑎᑕᕕᓂᐅᓚᐅᕐᑐᑦ ᑎᑭᕋᓴᕐᔪᐊᒥᒃ ᐱᔭᕕᓂᐅᑎᓪᓗᒍ ᐃᑲᔪᕐᑕᐅᒍᒪᐅᑎᐅᑉ ᖃᐅᔨᑎᑦᓯᐅᑎᖓ ᐊᒻᒪᓗ ᐃᑲᔪᖃᑎᒌᓐᓂᖏᓐᓄᑦ ᐊᒥᓱᐃᑦ ᑲᒪᔨᐅᔪᑦ ᐅᐃᒪᓇᕐᑐᓂᒃ.

ᓴᓪᓗᒥᐅᑦ ᑲᓇᑕᐅᑉ ᓯᑦᔭᖓᑕ ᐊᓐᓇᑐᐃᔨᖏᑦᑕ ᐃᓚᐅᔪᖁᑎᖏᑦ, ᑲᒪᔨᖃᕐᓱᑎᑦ ᒣᑯ ᑳᒧᐊᓐᒥᑦ, ᐱᓇᓱᐊᕐᓂᖃᓚᐅᕐᑐᑦ ᕿᓂᕐᓱᑎᑦ 25-ᓂᒃ ᑕᑭᓂᓕᒻᒥᒃ ᖃᔭᕆᐊᒥᒃ ᓯᑕᒪᐅᔪᖕᖏᒐᕐᑐᓂᒃ ᐃᓄᑦᑕᑐᒥᒃ ᓄᖅᑫᓇᕐᓯᒪᔪᕕᓂᕐᒥᒃ 146 ᑭᓛᒥᑌᑦ ᑕᕐᕋᖓᓂ ᓴᓪᓗᐃᑦ, ᑎᑭᕋᓴᕐᔪᐊᒥᒃ.

ᖃᔭᕆᐊᕐᑐᑐᐃᑦ ᐃᖏᕐᕋᓯᒋᐊᖕᖓᑐᕕᓃᑦ ᑭᖕᖓᓂᒃ, ᓄᓇᕘᕐᒥᑦ, ᓴᓪᓗᓕᐊᕋᓱᐊᓯᑦᓱᑎᑦ, ᑭᓯᐊᓂ ᓂᕆᐅᓇᖕᖏᑐᒥᒃ ᐊᐅᓚᐅᑎᕐᓗᓯᔪᕕᓃᑦ.


ᐊᓯᐅᒌᒃᑯᑎᖃᓪᓗᑯᓐᓂᕋᒥᑦ ᖃᔭᕆᐊᒥᓂᒃ, ᐃᑲᔪᕐᑕᐅᒍᑎᒋᒐᓱᐊᓯᔭᕕᓂᖓ ᑕᒐ ᐊᓐᓇᑐᐃᔩᑦ ᐱᓇᓱᐊᓯᑦᓴᐅᑎᒋᔪᕕᓃᑦ. ᐊᑦᔨᒌᖕᖏᑐᑦ ᑎᒥᐅᔪᑦ ᐱᓇᓱᐊᖃᑎᒌᑦᑐᕕᓃᑦ ᐊᓐᓇᑐᐃᓂᒐᓱᐊᕐᓂᒥᒃ: ᑲᑐᑦᔨᖃᑎᒌᑦ ᐊᓐᓇᑐᐃᓂᕐᒥᒃ ᑐᑭᒧᐊᕐᑎᓯᔨᖏᑦᑕ ᐅᓇᑕᕐᑎᑯᑦ ᖃᖓᑦᑕᔫᓕᕆᔨᖏᑦ, ᑲᓇᑕᐅᓪᓗ ᓯᑦᔭᖓᑕ ᓴᐳᒻᒥᔨᖏᑦ ᐃᓚᐅᔪᖁᑎᖏᑦ ᓴᓪᓗᓂ, ᑲᓇᑕᐅᓪᓗ ᓯᑦᔭᖓᑕ ᓴᐳᒻᒥᔨᖏᑦ, ᑲᕙᒫᐱᒃᑯᖏᓪᓗ ᑲᒪᔨᖏᑦ ᓴᓪᓗᓂ ᐊᒻᒪᓗ ᑲᑎᕕᒃᑯᑦ ᐳᓖᓯᒃᑯᖏᑦ. ᖃᔭᕆᐊᕐᑐᕕᓃᑦ ᑕᑯᔭᐅᑦᓴᕋᑕᕐᑐᕕᓃᑦ ᐊᒻᒪᓗ ᓴᓪᓗᓕᐊᕈᑦᔭᐅᓱᑎᑦ, ᑭᖕᖓᓕᐊᕐᖄᓚᐅᑲᑦᓱᑎᑦ.

ᑲᑎᕕᒃᑯᑦ ᐳᓖᓯᒃᑯᖏᑦᑕ ᐊᖓᔪᖅᖄᖓ ᐅᖃᓚᐅᕐᑐᖅ, ᒥᓯᐊᓪ ᒫᕐᑎᓐ, ᐊᓯᐅᒌᒃᑯᑎᒃ ᐃᑲᔪᕐᓂᖃᓪᓚᕆᓚᐅᕐᑐᖅ ᐊᓐᓇᑐᐃᓂᕐᒥᒃ. ᐊᓯᐅᒌᒃᑯᑎᒥᒃ ᑲᒪᒋᐊᓯᑦᓴᐅᑎᒋᔪᕕᓂᐅᓂᖏᑦ ᐊᓐᓇᑐᐃᔨᓂᒃ ᐃᖏᕐᕋᓯᑎᑦᓯᓴᐅᑎᒋᒍᓐᓇᓯᔪᕕᓂᐅᓚᐅᕐᑐᑦ. ᐊᓯᐅᒌᒃᑯᑎᖃᕐᓂᖏᑐᐊᕈᑎᑦ, ᑕᑯᔭᐅᑦᓴᐅᑎᒋᒍᓐᓇᓯᕋᔭᓚᐅᔪᖕᖏᑐᖅ ᖃᔭᕆᐊᖅ. ᑲᑎᕕᒃᑯᑦ ᐳᓖᓯᒃᑯᖏᑦ ᐅᖃᐅᓯᖃᕈᑎᖃᕐᑐᑦ ᖃᔭᕆᐊᕐᑐᕙᑦᑐᓂᒃ ᐊᓯᐅᒌᒃᑯᑎᑖᖁᔨᑦᓱᑎᑦ ᐆᒪᔪᕐᓂᐊᑎᒃᑯᓂᒃ ᐅᕝᕙᓘᓐᓃᑦ ᑲᕙᒫᐱᒃᑯᓂᒃ.

ᑲᓇᑕᐅᑉ ᓯᑦᔭᖓᑕ ᓴᐳᒻᒥᔨᖏᑦᑕ ᐃᓚᐅᔪᖁᑎᖏᑦ ᓴᓪᓗᓂ ᓄᐃᑕᕕᓂᐅᔪᖅ 2016-ᖑᑎᓪᓗᒍ. ᐃᓚᐅᔪᖁᑎᖏᑦ ᓄᓇᓕᒻᒥᒃ ᐃᑲᔪᕐᑎᐅᕗᑦ ᐊᑭᓕᕐᑐᑕᐅᒐᑎᒃ ᐊᑐᓲᖑᑦᓱᑎᑦ ᑲᕙᒫᐱᒃᑯᑦ ᐅᐃᒪᓇᕐᑐᓯᐅᑎᖏᓐᓂᒃ ᐊᑐᓲᖑᑦᓱᑎᑦ ᐊᒻᒪᓗ ᐃᑲᔪᕈᒪᔪᑦ ᐃᑲᔪᖃᑕᐅᒍᓐᓇᓲᖑᑦᓱᑎᑦ ᕿᓂᕐᓂᒥᒃ ᐊᒻᒪᓗ ᐊᓐᓇᑐᐃᓂᐅᑉ ᐱᓇᓱᐊᕐᑕᐅᓂᖏᓐᓂᒃ.

 

ᐊᑦᔨᐸᓱᖓ ᐊᓪᓚᓯᒪᔪᖅ

ᐊᓕᐊᒋᓗᒍ ᐃᒪᖅ ᐊᑦᑕᓇᖕᖏᑐᒥᒃ!