Latest News

ᐱᓇᓱᑦᑏᑦ ᓱᓇᒥᑦᓯᐊᑐᒥᒃ ᓴᐳᒻᒥᔭᐅᒍᑎᖓᑕ ᐊᖏᖃᑎᒌᒍᑎᖓᓂᒃ ᐊᑎᓕᐅᕐᓂᒥᒃ ᐱᐅᓯᕆᔭᐅᔪᖅ

Friday, December 13, 2019
ᓴᐅᒥᒻᒥᑦ ᑕᓕᕐᐱᒧᑦ, ᓵᓪᔅ ᐳᓕᐊᓐ ᓄᓇᕕᒻᒥ ᐳᓖᓰᑦ ᑲᑐᑦᔨᖃᑎᒌᓐᓂᖓᑕ ᐊᖓᔪᕐᖄᑉ ᑐᖓᓕᐊ. ᑭᐊᓂᔅ ᐹᓄᐱ ᓄᓇᕕᒻᒥ ᐳᓖᓰᑦ ᑲᑐᑦᔨᖃᑎᒌᓐᓂᖓᑕ ᐊᖓᔪᕐᖄᖓ, ᓈᑕᓕ ᓕ ᑳᓪ ᑫᐋᔩᑉ ᐱᓇᓱᑦᑎᓕᕆᕕᖓᓂ ᐊᔪᖀᒋᐊᕐᑎ, ᔨᐊᓂᕙ ᒪᓂᒃ ᑫᐋᔩᑉ ᑐᑭᒧᐊᑦᑎᓯᔨᖓ, ᐁᑕ ᑯᐊᑕ ᑫᐋᔩᑉ ᐊᓪᓚᑎᒻᒪᕆᖓ
ᑲᑎᕕᐅᑉ ᓄᓇᖓᓂ ᐳᓖᓯᖏᑦ ᐊᒻᒪᓗ ᓄᓇᕕᐅᑉ ᐳᓖᓯᖏᑦᑕ ᑲᑐᑦᔨᖃᑎᒌᕝᕕᖓ ᐊᑎᓕᐅᕐᑑᒃ ᑕᓪᓕᒪᓄᑦᐊᕐᕌᒍᓅᓕᖓᔪᒥᒃ ᓂᕿᑦᓯᑎᓪᓗᒍ ᑐᖕᖓᕕᓕᕐᑐᓯᐊᕐᑐᒥᒃ ᐱᓇᓱᐊᕐᕕᒥ ᐱᕕᑦᓴᖃᕐᑎᓯᑦᓱᓂ ᐱᓇᓱᑦᑎᙯᓐᓇᕈᑎᑦᓴᒥᒃ ᐱᓇᓱᑦᑎᑐᖃᕐᓂᒃ ᐊᒻᒪᓗ ᐃᓱᐊᕐᓰᒋᐊᕐᓱᓂ ᐱᓇᓱᑦᑎᑖᕋᓱᐊᕈᑎᑦᓴᓂᒃ ᓄᑖᓂᒃ.

ᑖᓐᓇ ᓯᕗᓪᓕᐸᐅᑦᓱᓂ ᑲᑎᕕᐅᑉ ᓄᓇᖓᑕ ᐳᓖᓯᖏᓐᓂᒃ ᐊᖏᖃᑎᒌᒐᓱᐊᕈᑎᖃᕐᓂᐅᓚᐅᕐᑐᖅ ᐱᓇᓱᑦᑏᑦ ᓱᓇᒥᑦᓯᐊᑐᒥᒃ ᓴᐳᒻᒥᔭᐅᒍᑎᖓᓂᒃ ᐊᖏᖃᑎᖃᕐᓱᑎᒃ ᐱᓇᓱᑦᑎᖁᑎᒥᓂᒃ ᐊᕐᕌᒍᓂ ᒪᕐᕉᓂ ᐅᖓᑖᓄᓪᓗ ᐱᓇᓱᑦᓯᒪᓕᕐᑐᓂᒃ.
 
ᐊᑯᓃᕐᑐᓴᖅ ᐊᖏᖃᑎᒌᒍᑎᖓ ᐱᒋᐊᕐᕕᖃᕐᓂᐊᑐᖅ ᔭᓄᐊᕆ 1, 2018-ᒥᑦ ᐊᒻᒪᓗ ᐊᑑᑎᓂᐊᕐᓱᓂ ᑏᓯᒻᐱᕆ 31, 2022 ᑎᑭᓪᓗᒍ. ᐃᓱᒪᒋᔭᐅᔪᖅ ᐃᑲᔪᕐᓯᓯᐊᒻᒪᕆᓚᒪᖓᓂᖓ ᑲᑎᕕᐅᑉ ᓄᓇᖓᑕ ᐳᓖᓯᖏᑦᑕ ᐱᓇᓱᑦᑎᖃᖕᖏᓂᖓᓂᒃ ᐃᓐᓄᐃᓂᕐᒥ ᐊᒻᒪᓗᑦᑕᐅᖅ ᐱᓇᓱᒐᕐᓂᒃ ᓄᑖᓂᒃ ᓄᐃᑦᓯᕙᓪᓕᐊᓗᓂ ᑯᐯᒃ ᐳᓖᓰᓐᓂᐊᑎᓪᓗᒍ. ᑕᓪᓕᒪᓄᑦ-ᐊᕐᕌᒍᓅᓕᖓᔪᖅ ᐊᖏᖃᑎᒌᒍᑎᒃ ᐊᑑᑎᒍᓐᓇᓯᓚᕿᓚᐅᕐᑐᖅ ᑮᓇᐅᔭᖃᕐᑎᑕᐅᒍᑎᓂᒃ ᐊᖏᖃᑎᒌᒍᑎᖃᕐᓂᑯᒧᑦ ᐊᑑᑎᒍᓐᓇᕕᖃᕐᑎᑕᐅᔪᖅ ᒫᑦᔨ 2023 ᑎᑭᓪᓗᒍ.  
 
ᐊᖏᖃᑎᒌᒍᑎᐅᑉ ᑐᑭᖓᑕ ᑐᖕᖓᕕᖓ ᐊᖏᕈᑎᐅᓚᐅᔪᖅ ᔫᓂᐅᓚᐅᔪᒥ ᐊᖏᖃᑎᒌᒐᓱᐊᕈᑎᐅᓚᐅᑲᑦᓱᓂ ᐊᕐᕌᒎᓐᓂ ᒪᕐᕉᓂ. ᐊᓪᓚᓯᒪᔪᖁᑎᖏᑦ ᑐᑭᑖᕐᑕᐅᓚᐅᕐᑐᑦ ᐱᓇᓱᑦᑏᑦ ᑭᒡᒐᑐᕐᑎᖏᓐᓄᑦ ᐊᒻᒪᓗ ᐊᐅᓚᑦᓯᔩᑦ ᑭᒡᒐᑐᕐᑎᖏᓐᓄᑦ ᐊᒻᒪᓗ ᐊᖏᕐᑕᐅᓱᑎᑦ ᐱᓇᓱᑦᑎᓄᑦ ᓅᕕᒻᐱᕆ 13-ᒥ 14-ᒥᓗ ᐊᖏᖃᑎᒌᒍᑎᒃ ᓂᕈᐊᕐᑕᐅᓱᓂ 85-ᐳᓴᓄᑦ.
 
ᑖᑦᓱᒪ ᐊᖏᖃᑎᒌᒍᑎᐅᑉ ᓄᑖᑉ ᐃᓗᓕᖏᓐᓃᑐᑦ ᐊᒥᓱᓂᒃ ᐊᓯᑦᔨᒪᕆᓐᓂᖃᓚᐅᕐᑐᖅ ᐅᑯᐊ ᐃᓚᐅᑎᓪᓗᒋᑦ:  
-ᐱᓇᓱᑦᑎᓄᑦ ᐱᔭᐅᔭᕆᐊᖃᓕᕐᑐᖅ ᐊᕐᕌᒍᓂᒃ ᐱᖓᓱᓂᒃ ᐱᒍᑦᔨᓂᖃᖕᖏᑐᐊᕈᓂ ᑲᑎᕕᐅᑉ ᓄᓇᖓᑕ ᐳᓖᓯᖏᓐᓂᒃ ᐅᑎᕐᑎᓯᖃᑦᑕᕆᐊᖃᓕᕐᑐᖅ ᑮᓇᐅᔭᕐᑑᕕᓂᕐᓂᒃ ᐃᓕᓐᓂᐊᕈᑎᕕᓂᕐᓄᑦ ᐅᕝᕙᓘᓐᓃᑦ ᐱᔭᕆᐅᕐᓴᐅᑎᕕᓂᕐᓄᑦ.  
-ᐊᕐᕌᒍᑕᒫᑦ ᐱᓇᓱᑦᑎᐅᑯᑖᕐᑕᕈᑎᓄᑦ ᐅᓄᕐᓯᒋᐊᕐᑕᕈᑏᑦ ᒪᓂᔭᐅᓗᑎᑦ ᐊᕐᕌᒍᓂ ᓯᑕᒪᐅᔪᖕᖏᒐᕐᑐᓂ ᐅᖓᑖᓄᓪᓗ ᐱᒍᑦᔨᓯᒪᓕᑐᐊᕐᐸᑕ.
-ᐊᓯᑦᔨᓗᒍ ᐱᓇᓱᑦᑏᑦ ᐃᑲᕈᕐᓂᓕᐊᖏᑦᑕ ᓴᓂᕐᕓᕕᖓᑕ ᐅᓄᕐᓂᖓ ᕿᑲᑯᑖᒍᓐᓇᓯᓕᐅᒥᒍᑎᑦᓴᐅᓗᓂ ᐊᒻᒪᓗ ᐃᑲᔪᕐᓯᓂᐊᕐᓗᓂ ᐃᓇᖏᕐᑌᔨᖓᓂᒃ. 
-ᐊᑑᑎᒍᓐᓇᓯᓗᓂ ᐊᑭᓕᕐᑐᑕᐅᒍᓐᓀᓗᓂ ᕿᑲᕐᓃᑦ.
-ᐃᓂᓪᓚᒋᐊᕐᓯᐊᓱᒍ ᑮᓇᐅᑦᔭᓵᑦ ᐳᕐᑐᓂᓕᕇᓐᓂᖓ ᐊᑯᓂ ᐱᓇᓱᑦᑎᐅᓕᕐᑐᓂᒃ ᐃᑲᔪᕐᓯᓯᐊᕐᓂᓴᐅᓗᓂ ᐱᓇᓱᑦᑎᖃᒻᒥᓂᐅᖕᖏᓂᕐᓴᖅ ᐅᓄᕐᓰᒋᐊᕋᓱᐊᕈᑎᒋᑦᓱᒍ ᐱᓇᓱᑦᑎᑐᙯᑦ ᐊᑌᓐᓇᕈᑎᑦᓴᖏᓐᓂᒃ.
ᑮᓇᐅᑦᔭᓵᑦ ᐅᓄᕐᓯᒋᐊᓚᖓᔪᑦ ᑉ-ᐳᓴᓄᑦ ᐊᕐᕌᒍᑕᒫᑦ ᔭᓄᐊᕆ 1-ᒥ.  
“ᑲᑎᕕᐅᑉ ᓄᓇᖁᑎᖓᓂ ᐳᓖᓰᑦ ᓈᒻᒪᓴᕐᑐᑦ ᐊᖏᖃᑎᒌᒍᑎᒥᒃ, The KRPF” ᓚᑦᓱᓂ ᐅᖃᕐᑐᖅ ᑲᑎᕕᐅᑉ ᓄᓇᖁᑎᖓᓂ ᐳᓖᓯᖏᑦᑕ ᐊᖓᔪᕐᖄᖓ ᔮᓐ-ᐱᐊ ᓚᕉᖅ. “ᓂᕆᐅᓐᓂᖃᕐᑐᒍᑦ ᑖᒃᑯᐊ ᐊᓯᑦᔨᒋᐊᕈᑏᑦ ᑲᑎᕕᐅᑉ ᓄᓇᖁᑎᖓᑕ ᐳᓖᓯᖏᓐᓂᒃ ᐱᓇᓱᑦᑎᑖᓕᐅᒥᓚᖀᓂᐊᕐᑎᓗᒍ ᐊᒻᒪᓗ ᐅᓇᒻᒥᒋᔭᐅᓂᕐᓴᕈᕐᓗᓂ ᐊᒻᒪᓗ ᐱᓇᓱᑦᑎᙯᓐᓇᓂᐊᕐᑎᓗᒍ ᓇᓗᕐᑯᑎᖕᖏᑐᓂᒃ ᐊᒻᒪᓗ ᑲᑦᓱᙰᑦᑐᓂᒃ ᐱᓇᓱᑦᑎᑎᓐᓂᒃ.  ​