Latest News

ᑐᖕᖓᓱᒋᑦᓯ ᑲᑎᕕᐅᑉ ᐳᓖᓯᖏᑦᑕ ᖃᕆᑕᐅᔭᒃᑯᑦ ᑕᑯᑦᓴᐅᑎᑦᓯᕕᖓᓂ!

Thursday, June 8, 2017
 
ᑲᑎᕕᐅᑉ ᐳᓖᓯᖏᑦ ᐱᒋᐊᕐᑎᓯᓚᖓᓕᕐᑐᑦ ᓄᑖᑦᓯᐊᒥᒃ ᖃᕆᑕᐅᔭᒃᑯᑦ ᑕᑯᑦᓴᐅᑎᑦᓯᕕᒻᒥᒃ! ᐊᑦᑕᓇᕐᑐᒦᑦᑎᓯᑦᑌᓕᒍᑏᑦ, ᐊᑦᑕᓀᑦᑐᒦᒋᐊᖃᕐᓂᓄᑦ ᓯᓚᑐᒍᑏᑦ ᐊᒻᒪᓗ ᓄᑖᑦ ᐃᓕᖓᔪᑦ ᑭᓇᓕᒫᒃᑯᑦ ᐊᑦᑕᓇᕐᑐᒦᑦᑎᑕᐅᑦᑏᓕᓂᖏᓐᓄᑦ ᓄᓇᕕᒻᒥ ᖃᕆᑕᐅᔭᖅ ᓇᕐᓂᑐᐃᓐᓇᓗᒍ ᓄᐃᖃᑦᑕᓂᐊᓕᕐᒪᑕ.

ᑐᕌᒐᖓ ᑕᑯᒐᓱᐊᕐᕕᐅᑉ ᒪᓂᔨᓯᒪᖃᑦᑕᓚᖓᓕᕐᓂᖅ ᑕᑯᑦᓴᐅᑎᑦᓯᓯᐊᕈᑎᐅᓂᕐᓴᓂᒃ ᐊᒻᒪᓗ ᐃᑲᔪᕐᓯᔭᐅᖃᑦᑕᓗᑎᒃ ᐃᓕᑦᓯᒋᐊᓪᓚᕈᒪᔪᑦ ᑭᓇᓕᒫᒃᑯᑦ ᐊᑦᑕᓀᑦᑐᒦᑦᑎᑕᐅᓂᖏᓐᓄᑦ ᑲᒪᒋᔭᐅᕙᑦᑐᓂᒃ. ᖃᕆᑕᐅᔭᒃᑯᑦ ᑕᑯᑦᓴᐅᑎᑦᓯᒍᑎᒥᒃ ᐊᑐᕐᑏᑦ ᐊᑐᐃᓐᓇᖃᖃᑦᑕᓂᐊᓕᕐᑐᑦ ᑐᑭᓯᐅᑎᑦᓴᓂᒃ ᐃᓘᓐᓀᓂ 14-ᓂ ᓄᓇᓕᓐᓂ ᐊᒻᒪᓗ ᓄᓇᓕᓐᓂ ᑭᒡᒐᑐᕈᑎᓂᒃ, ᐆᑦᑑᑎᒋᑦᓱᒋᑦ ᐋᓐᓂᐊᓯᐅᕐᑕᐅᕖᑦ, ᑲᑎᕕᐅᑉ ᐳᓖᓯᖏᑦ, ᐅᕕᒃᑫᑦ ᐅᖑᒪᔨᖏᑦ ᐊᒻᒪᓗ ᓄᓇᓕᓐᓂ ᐃᑯᐊᓪᓚᑎᑦᓯᑌᓕᔩᑦ ᖃᒥᑎᕆᔩᑦ.

ᓇᓪᓕᑳᕐᕕᖏᓐᓂ ᖃᕆᑕᐅᔭᒃᑯᑦ ᑕᑯᑦᓴᐅᑎᑦᓯᕕᐅᑉ ᖁᑉᐱᒐᖏᑦᑕ ᓯᕗᓪᓕᐹᖓᓂ, ᑕᑯᒍᓐᓇᖃᑦᑕᓂᐊᓕᕐᑐᑎᑦ ᖃᒻᒥᐅᓂᕐᐹᓂᒃ ᑭᓇᓕᒫᒃᑯᑦ ᐊᑦᑕᓀᑦᑐᒦᑦᑎᑕᐅᓂᖏᓐᓄᐊᖓᔪᓂᒃ ᑐᓴᕋᑦᓴᓂᒃ ᓄᓇᕕᒻᒥ. ᓇᓗᓀᒃᑯᑕᖏᑦ ᒪᓂᔨᓯᒪᕕᐅᓚᖓᔪᑦ ᐊᑑᑎᖃᑦᓯᐊᑐᓂᒃ ᐅᖄᒍᑎᓂᒃ ᓇᓂᔨᐅᑏᑦ ᓇᓗᓀᒃᑯᑕᖏᓐᓂᒃ ᐃᓘᓐᓀᓂ ᓄᓇᓕᓐᓂ. ᑕᑯᒐᓱᐊᕐᓗᒍ ᐃᓗᓕᖏᓐᓂᒃ ᑕᑯᒐᓱᐊᕐᕕᒃ ᑐᑭᓯᓕᐅᒥᖃᑦᑕᓂᐊᓕᕐᑐᓯ ᐊᓯᖏᓐᓄᐊᖓᔪᓂᒃ ᓄᓇᕕᒻᒥ ᓄᓇᓕᓯ!

ᖃᕆᑕᐅᔭᒃᑯᑦ ᑕᑯᑦᓴᐅᑎᑦᓯᕕᐅᑉ ᖁᑉᐱᒐᖏᑦᑕ ᓯᕗᓪᓕᐹᑦ ᐊᑖᓂ ᓇᓗᓀᕐᓯᐅᑏᑦ ᓯᕗᓂᕐᒥ ᑲᔪᓯᑎᑕᐅᔪᑦᓴᓂᒃ ᐊᒻᒪᓗ ᖃᒻᒥᓂᒃ ᓄᑕᐅᓪᓕᑎᕐᑕᐅᓯᒪᔪᓂᒃ ᐱᓇᓱᒐᕐᓂᒃ. ᓯᕗᓪᓕᐹᒥ ᖁᕐᐱᒐᖓᓂ ᓇᓪᓕᑳᕐᕕᑕᖓ ᓄᐃᑕᕕᐅᔪᖅ ᓇᓗᓀᕐᑐᓯᒪᑦᓯᐊᑐᓂᒃ ᑐᑭᓯᐅᑎᑦᓴᓂᒃ ᐱᓇᓱᒐᖏᓐᓄᑦ ᑲᑎᕕᐅᑉ ᐳᓖᓯᖏᑦᑕ ᐊᒻᒪᓗ ᑭᓇᓕᒫᒃᑯᑦ ᐊᑦᑕᓀᑦᑐᒦᑦᑎᑕᐅᓂᖏᓐᓄᑦ ᐱᓇᓱᕝᕕᖓᓄᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ.



ᑕᑯᒐᓱᐊᕋᑦᓭᑦ ᓇᓗᓀᒃᑯᑕᖏᓐᓂᒃ, ᑕᑯᒍᓐᓇᓚᖓᔪᑎᑦ ᐅᐃᒪᓇᕐᑐᓯᐅᑎᓂᒃ ᐅᖄᒍᑎᖏᓐᓂᒃ ᓄᓇᓖᑦ.


ᑕᑯᒐᓱᐊᕐᕕᒪᕆᑦᑕᖓ ᓇᓗᑫᒃᑯᑕᕐᑕᓕ ᐱᑕᖃᕐᓱᓂ ᐱᖓᓲᔪᕐᑐᓂᒃ ᐅᒃᑯᐃᑕᐅᒍᓐᓇᑐᓂᒃ ᐊᑦᔨᒌᖕᖏᑐᓂᒃ.

ᓄᑖᖅ ᑐᓴᕋᑦᓴᑯᕕᒃ ᐱᑕᖃᓚᖓᔪᖅ ᓄᑖᒍᓂᕐᐹᓂᒃ ᖃᐅᔨᒪᔭᐅᒋᐊᓕᓐᓂᒃ ᑭᓇᓕᒫᒃᑯᑦ ᐊᑦᑕᓀᑦᑐᒦᑦᑎᑕᐅᓂᖏᓐᓄᑦ ᐃᓕᖓᔪᓂᒃ ᓄᓇᕕᒻᒥ.

ᐱᓇᓱᒐᕐᓄᐊᖓᔪᖅ ᐊᕕᑦᓯᒪᔪᖅ ᐃᓗᓕᖃᓚᖓᔪᖅ ᓇᓗᓀᕐᑐᓯᒪᐅᑎᖏᓐᓂᒃ ᑐᑭᓯᐅᑎᑦᓭᑦ ᐃᓕᖓᔪᓂᒃ ᐊᒥᓱᐃᓂᒃ ᐱᓇᓱᒐᕐᓂᒃ, ᐆᑦᑑᑎᒋᑦᓱᒋᑦ ᐳᓖᓯᑦᓭᑦ, ᖁᑭᐅᑏᑦ ᑲᒪᒋᔭᐅᒍᓯᖏᑦ ᐊᑦᑕᓇᕈᓐᓀᑎᓗᒋᑦ ᐃᑉᐱᒍᓱᓕᕐᑎᓯᒋᐊᕈᑏᑦ ᐊᒻᒪᓗ ᑲᒃᑲᓛᑦ ᑲᒪᒃᑭᓗᑦᑕᐅᑎᑕᐅᑦᑌᓕᓂᖏᑦ, ᐊᒻᒪᓗ ᐊᓯᐅᒪᔪᓂᒃ ᕿᓂᕐᑐᓄᐊᖓᔪᑦ.

ᑭᒡᒐᑐᕈᑎᓄᐊᖓᔪᑦ ᑕᑯᑦᓴᐅᑎᑦᓯᕕᐅᓚᖓᔪᑦ ᓇᓗᓀᕐᑕᐅᓯᒪᐅᑎᖏᓐᓂᒃ ᓄᓇᓖᑦ. ᓇᓪᓕᑐᐃᓐᓇᖓ ᓇᕐᓂᓗᒍ ᐃᓕᒪᔪᑦ, ᕿᒥᕐᕈᕈᓐᓇᓚᖓᔪᑎᑦ ᐊᑦᔨᒌᖕᖏᑐᓂᒃ ᑭᒡᒐᑐᕈᑎᓂᒃ ᓄᓇᓕᓐᓂ. ᓇᕐᓂᓗᒍ ᑐᕃᓐᓇᓗᒍ ᑭᒡᒐᑐᕈᑏᑦ ᓄᐃᑦᓯᒍᓐᓇᓚᖓᔪᑦ ᑐᑭᓯᐅᑎᑦᓴᓂᒃ ᑖᒃᑯᓂᖓᑦᓭᓇᖅ ᐊᕐᖁᑎᒋᓗᒍ ᑕᑯᒐᓱᐊᕐᑕᐅᒍᓐᓇᑐᑦ ᓇᓗᓀᕐᑕᐅᓯᒪᐅᑎᖏᑦ.

ᐱᓇᓱᒐᑦᓴᓄᐊᖓᔪᑦ ᐊᕕᑦᓯᒪᐅᑎᖏᑦ ᑕᑯᑦᓴᐅᑎᑦᓯᔪᑦ ᑐᑭᓯᐅᑎᑦᓴᓂᒃ ᐅᓪᓗᒥ ᐱᓇᓱᒐᑦᓴᖕᖑᕐᓯᒪᔪᓂᒃ ᑲᑎᕕᐅᑉ ᐳᓖᓯᖏᓐᓂ.  ᑕᕝᕙᓂᓗ ᐃᓕᒪᑦᓱᑎᒃ ᑲᑎᕕᐅᑉ ᐳᓖᓯᖏᓐᓄᑦ ᐃᓚᐅᒍᒪᒍᕕᑦ ᐃᓕᒐᓱᐊᕈᓐᓇᐅᑎᑎᑦ. ᐊᓯᖏᑦ ᑕᕝᕙᓃᒻᒥᔪᑦ ᐃᓚᒋᔭᐅᑦᓱᑎᒃ ᖃᐅᔨᒪᔭᐅᒋᐊᓕᓐᓂᒃ ᐱᑕᓖᑦ ᐱᓇᓱᒐᕐᓄᐊᖓᔪᓂᒃ ᖃᓄᐃᑦᑑᒋᐊᖃᕐᒪᖔᑕᓗ ᐳᓖᓯᐅᒍᒪᔪᑦ.

ᐃᑲᔪᕐᓯᓂᕐᓄᐊᖓᔪᓄᑦ ᐊᕕᑦᓯᒪᐅᑏᑦ ᑕᓪᓕᒪᑕᓖᑦ ᑕᑯᒐᓱᐊᕐᑕᐅᒍᓐᓇᑐᓂᒃ ᐊᑦᔨᒌᖕᖏᑐᓂᒃ ᓴᐳᑦᔭᐅᒍᑏᑦ ᑭᒡᒐᑐᕐᓃᑦ ᓱᓇᐅᓂᖏᓐᓂᒃ, ᑭᓯᐊᓂ ᐃᑲᔪᕐᓯᒍᒪᔪᑦ ᑕᕝᕙᓂ ᑐᓴᕐᑎᓯᓗᑎᒃ ᐱᖁᔦᑦ ᓯᖁᒥᑕᐅᑎᓪᓗᒋᑦ ᑕᑯᓐᓈᑐᑦ ᑐᓴᕐᑎᓯᕕᑦᓴᖓ ᐅᕝᕙᓘᓐᓃᑦ ᐃᓄᓐᓂᒃ ᐊᓯᐅᒪᔭᐅᔪᓂᒃ ᑕᑯᔪᕕᓃᑦ ᑐᓴᕐᑎᓯᕕᒋᑦᓱᓂᐅᒃ.

ᑭᖑᓪᓕᐹᒥ, ᑲᑎᕕᐅᑉ ᐳᓖᓯᖏᓐᓄᐊᖓᔪᑦ ᐊᕕᑦᓯᒪᐅᑎᒦᒻᒥᔪᑦ ᖃᕆᑕᐅᔭᑎᒍᑦ ᑕᑯᒐᓱᐊᕋᑦᓭᑦ ᓄᐃᑕᐅᓯᒪᓂᖏᓐᓄᑦ ᑲᑎᕕᐅᑉ ᐳᓖᓯᖏᑦᑕ, ᐊᐅᓚᑦᓯᔨᖏᑦᑕ ᐊᒻᒪᓗ ᓯᓚᑖᓃᑦᑐᑦ ᑎᒦᑦ ᐅᖄᒍᑎᖏᓐᓂᒃ ᐱᑕᖃᕐᓱᑎᒃ.

 

ᑲᑎᕕᐅᑉ ᐳᓖᓯᖏᑦ ᑖᑦᓱᒥᖓ ᖃᕆᑕᐅᔭᒃᑯᑦ ᑕᑯᒐᓱᐊᕐᕕᒥᒃ ᐃᑲᔪᕐᓯᓯᒪᓚᖓᖁᔨᔪᖅ ᓄᓇᕕᒻᒥᐅᓂᒃ ᑐᑭᓯᒋᐊᕈᒪᔪᓂᒃ ᐊᒻᒪᓗ ᖃᐅᔨᒋᐊᓪᓚᕈᒪᔪᓂᒃ ᐱᓇᓱᐊᕐᐸᑕᖏᓐᓂᒃ ᐊᒻᒪᓗ ᐱᓇᓱᐊᒐᖏᓐᓂᒃ ᓄᓇᓕᓕᒫᓂ ᐳᓖᖁᑎᓯ!