ᖁᑭᐅᑎᑖᕈᓐᓇᐅᑎᑖᕆᑦ - ᐆᒪᔪᕐᓯᐅᑎᓂᒃ ᓴᐳᒻᒥᔨᒃᑯᓂᑦ

 


ᐆᒪᔪᕐᓯᐅᑎᓂᒃ ᓴᐳᒻᒥᔩᑦ ᑲᔪᓯᓂᖃᕐᑎᑕᐅᔪᑦ ᓄᑕᐅᓪᓕᕈᓐᓇᑐᓕᕆᕕᖓᓄᑦ, ᐊᕙᑎᓕᕆᕕᖓᓄᑦ, ᓄᓇᓕᕆᕕᖓᓄᑦ ᐊᒻᒪᓗ ᒥᕐᖑᐃᓯᕐᕕᓕᕆᕕᖓᓄᑦ ᑲᑎᕕᒃ ᓄᓇᓕᓕᒫᑦ ᑲᕙᒪᐅᑉ ᑲᔪᓯᑎᑦᓯᓲᖅ ᓄᓇᓕᓐᓂ ᖁᑭᐅᑏᑦ ᐊᑦᑕᓀᑦᑑᑎᓗᒋᑦ ᑲᒪᒋᔭᐅᒍᓯᖏᓐᓂᒃ ᐃᓕᓐᓂᐊᑎᑦᓯᓂᕐᓂᒃ.


ᓱᒧᑦ ᖁᑭᐅᑎᑖᕈᓐᓇᐅᑎᒥᒃ ᐱᒋᐊᖃᕐᒪᖔᑉᐱᑦ

ᖁᑭᐅᑎᖃᕈᓐᓇᐅᑎᖃᕐᓂᖅ ᐊᒻᒪᓗ ᖁᑭᐅᑎᑖᕈᓐᓇᐅᑎᖃᕐᓂᖅ ᐃᓕᓐᓂᒃ ᑎᒍᓯᑎᑦᓯᒍᓐᓇᓚᕿᔪᑦ ᑭᓇᓕᒫᒃᑯᓄᑦ ᖁᑭᐅᑎᒋᔭᐅᒍᓐᓇᑐᓂᒃ ᐊᒻᒪᓗ ᓴᒃᑯᖏᓐᓂᒃ ᓂᐅᕐᕈᓭᔨᓂᑦ ᓂᐅᕕᕐᑎᓯᒍᓐᓇᐅᑎᓕᓐᓂᑦ.

ᑐᑭᓯᒋᐊᓪᓚᕈᓐᓇᑐᑎᑦ ᐃᓗᓕᓪᓚᕆᖏᓐᓂᒃ ᖁᑭᐅᑏᑦ ᐊᑦᑕᓀᑦᑐᒦᑦᑎᑕᐅᒍᓯᖏᓐᓂᒃ, ᐅᕙᓂ ᖃᕆᑕᐅᔭᒃᑯᑦ G ᖁᑭᐅᑎᓂᒃ ᐊᑦᑕᓀᑦᑑᑎᑦᓯᓂᕐᓂᒃ ᐃᑉᐱᒍᓱᑦᑎᓯᒋᐊᕐᓂᖅ.

ᐱᒐᓱᐊᕈᒪᔪᑦ ᖁᑭᐅᑎᖃᕈᓐᓇᐅᑎᓂᒃ ᐊᒻᒪᓗ ᖁᑭᐅᑎᑖᕈᓐᓇᐅᑎᓂᒃ ᓓᓴᓐᓯᓂᒃ, ᐱᑦᓯᐊᓂᖃᕐᓗᑎᒃ ᐊᓂᒍᐃᕐᖄᕆᐊᖃᓲᑦ ᑲᓇᑕᒥ ᖁᑭᐅᑏᑦ ᐊᑦᑕᓀᑦᑑᑎᑕᐅᓂᖏᓐᓂᒃ ᐃᓕᓴᕐᓂᒥᒃ. ᐃᓕᓴᕐᓂᖅ ᒪᓂᔨᒍᑕᐅᓲᖅ ᖃᐅᔨᒪᔭᐅᒋᐊᓕᓐᓂᒃ ᐊᑦᑕᓀᑦᑐᒦᑦᑎᓯᓚᕿᐅᑕᐅᓗᑎᒃ ᐃᓄᓐᓂᒃ ᖃᓂᑕᕆᓲᕐᓃᕕᑦ.


ᖃᓄᖅ ᑲᓇᑕᒥ ᖁᑭᐅᑏᑦ ᐊᑦᑕᓀᑦᑑᒋᐊᖃᕐᓂᖏᓐᓂᒃ ᐃᓕᓴᕐᓂᒧᑦ ᐃᓕᒐᔭᕐᒪᖔᑉᐱᑦ

ᐃᓚᐅᒍᒪᒍᕕᑦ ᐃᓕᓴᕐᑐᓄᑦ ᐊᒻᒪᓗ ᖁᑭᐅᑎᖃᕈᓐᓇᐅᑎᓂᒃ ᐊᒻᒪᓗ ᖁᑭᐅᑎᑖᕈᓐᓇᐅᑎᓂᒃ ᐁᑦᑐᑕᐅᓚᕿᓗᑎᑦ, ᓄᓇᓕᓯᓐᓂ ᐆᒪᔪᕐᓯᐅᑏᑦ ᓴᐳᒻᒥᔭᐅᕕᖓᓄᑦ ᓇᓗᓀᕐᑕᐅᒋᐊᕐᑐᓗᑎᑦ. ᓄᓇᓕᓯᓐᓂ ᓈᒻᒪᓯᑉᐸᑕ ᐃᓕᓴᕈᒪᔪᑦ, ᓄᓇᓕᓐᓂ ᐆᒪᔪᕐᓯᐅᑏᑦ ᓴᐳᒻᒥᔭᐅᕕᖓ ᑐᓴᕐᑎᓯᒐᔭᕐᑐᖅ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ, ᑌᒪ ᑲᔪᓯᑎᑕᐅᑲᐱᒐᓱᐊᕐᓂᐊᓕᕐᒪᑦ.



ᑲᓇᑕᒥ ᖁᑭᐅᑏᑦ ᐊᑦᑕᓀᑦᑑᒋᐊᖃᕐᓂᖏᓐᓂᒃ ᐃᓕᓴᕐᓂᖅ

ᐅᓪᓗᒥ ᓯᑕᒪᐅᔪᖕᖏᒐᕐᑐᐃᑦ ᖁᑭᐅᑏᑦ ᐊᑦᑕᓀᑦᑑᒋᐊᖃᕐᓂᖏᓐᓂᒃ ᐃᓕᓐᓂᐊᑎᑦᓯᔩᑦ ᐱᓇᓱᐊᖃᑕᐅᔪᑦ ᓄᑕᐅᓪᓕᕈᓐᓇᑐᓄᑦ, ᐊᕙᑎᒧᑦ, ᓄᓇᓄᑦ ᐊᒻᒪᓗ ᒥᕐᖑᐃᓯᕐᕕᓄᑦ ᐱᓇᓱᕝᕕᖓᓂᒃ ᑲᑎᕕᒃ ᓄᓇᓕᓕᒫ ᑲᕙᒪᖓᑕ. ᑐᕌᒐᖃᕐᐳᑦ ᐃᓘᓐᓀᓄᑦ ᓄᓇᓕᓐᓄᑦ ᐊᕐᕕᑕᕐᐸᓗᑎᒃ ᐊᕐᕌᒍᒥ ᒪᕐᕈᕕᓪᓗᑎᒃ ᐃᓕᓐᓂᐊᑎᑦᓯᒋᐊᕐᑐᓗᑎᒃ ᑲᓇᑕᒥ ᖁᑭᐅᑏᑦ ᐊᑦᑕᓀᑦᑑᒋᐊᖃᕐᓂᖏᓐᓂᒃ ᐃᓕᓭᒍᑎᖏᓐᓂᒃ. Sécurité Nature (ᑯᐯᒻᒥ ᐆᒪᔪᕐᓯᐅᑏᑦ ᐊᒻᒪᓗ ᐃᖃᓗᑦᓯᐅᑏᑦ ᑲᑐᑦᔨᖃᑎᒌᕝᕕᖓ) ᐁᑦᑐᐃᓯᒪᓲᖅ ᐃᓕᓭᒍᑎᐅᒋᐊᓕᓐᓂᒃ.

ᐃᓕᓴᕐᓂᖅ ᐅᓪᓘᓂ ᒪᕐᕈᑐᓲᖅ. ᓯᕗᓪᓕᒥ ᐅᓪᓗᒥ, ᐃᓚᐅᔪᑦ ᐃᓕᓐᓂᐊᑎᑕᐅᓲᑦ ᖁᑭᐅᑏᑦ ᐊᑦᑕᓀᑦᑑᑎᑕᐅᒍᓯᖏᓐᓂᒃ. ᑐᖓᓕᐊᓂ ᐅᓪᓗᒥ, ᐱᔭᕇᕐᑕᐅᒋᐊᖃᓲᑦ ᑕᒪᖏᒃ ᐃᓱᒪᒍᓐᓇᓂᑎᒍᑦ ᖃᐅᔨᓴᕐᑕᐅᓂᖅ ᐊᒻᒪᓗ ᓈᒻᒪᓈᕈᓐᓇᓂᑎᒍᑦ ᐆᑦᑐᕋᕐᑕᐅᓂᖅ. ᐃᓘᓐᓈᒍᑦ ᐊᓂᒍᐃᒍᓐᓇᐅᑎᒃ ᑲᓇᑕᒥ ᖁᑭᐅᑏᑦ ᐊᑦᑕᓀᑦᑑᒋᐊᖃᕐᓂᖏᓐᓄᑦ ᐃᓕᓴᕐᓂᒥᒃ 80%-ᓂᒃ ᑭᑎᑦᔪᑎᑖᕐᕕᐅᒋᐊᖃᓲᖅ.



ᑲᓇᑕᒥ ᖁᑭᐅᑏᑦ ᐊᑦᑕᓀᑦᑑᒋᐊᖃᕐᓂᖏᓐᓄᑦ ᐃᓕᓴᕐᓂᒥᒃ ᐊᓂᒍᐃᔪᑦ ᓱᕐᖁᐃᑕᐅᒍᑎᖓ

ᐃᓚᐅᔪᑦ ᐊᓂᒍᐃᑦᓯᐊᑐᑦ ᑲᓇᑕᒥ ᖁᑭᐅᑏᑦ ᐊᑦᑕᓀᑦᑑᒋᐊᖃᕐᓂᖏᓐᓂᒃ ᐃᓕᓴᕐᓂᒥᒃ ᐁᑦᑐᑕᐅᓲᑦ ᓱᕐᖁᐃᑕᐅᒍᑎᒥᒃ ᐱᓯᒪᔪᒥᒃ Sécurité Nature-ᒥᑦ ᐱᓇᓱᐊᕈᓰᑦ ᐱᖓᓱᑦ ᓈᑎᓪᓗᒋᑦ. ᓱᕐᖁᐃᑕᐅᒍᑎᒃ ᓄᑕᐅᓪᓕᑎᕐᑕᐅᒋᐊᖃᓲᒍᖕᖏᑐᖅ.

 

ᖃᓄᖅ ᐱᔭᐅᒍᓐᓇᒪᖔᑕ ᖁᑭᐅᑎᖃᕈᓐᓇᐅᑏᑦ ᐊᒻᒪᓗ ᖁᑭᐅᑎᑖᕈᓐᓇᐅᑏᑦ

ᐱᓯᒪᓕᕈᕕᐅᒃ ᑲᓇᑕᒥ ᖁᑭᐅᑏᑦ ᐊᑦᑕᓀᑦᑑᒋᐊᖃᕐᓂᖏᓐᓄᑦ ᐃᓕᓴᕐᓂᒥᒃ ᐊᓂᒍᐃᓯᒪᓂᕐᒥᒃ ᓱᕐᖁᐃᑕᐅᒍᑎᒃ, ᓄᓇᓕᓯᓐᓂ ᐆᒪᔪᕐᓯᐅᑏᑦ ᓴᐳᒻᒥᔭᐅᕕᖓᓕᐊᕐᓗᑎᑦ ᐊᒻᒪᓗ ᐱᑕᑦᓯᑐᒐᕐᒥᒃ ᐱᑕᑦᓯᑐᐃᓗᑎᑦ ᖁᑭᐅᑎᖃᕈᓐᓇᐅᑎᒥᒃ ᐊᒻᒪᓗ ᖁᑭᐅᑎᑖᕈᓐᓇᐅᑎᒥᒃ ᓓᓴᓐᓯᑖᕈᑎᒥᒃ. ᓓᓴᓐᓯᑖᕐᓂᓄᑦ ᐱᓇᓱᒐᖅ ᐊᐅᓚᑕᐅᓂᓕᒃ Royal Canadian Mounted Police-ᑯᓄᑦ (ᐋᓰᐃᐊᒻᐲᒃᑯᓄᑦ)

 


ᓄᑕᐅᓪᓕᑎᕐᑕᐅᓂᖏᑦ ᖁᑭᐅᑎᖃᕈᓐᓇᐅᑏᑦ ᐊᒻᒪᓗ ᖁᑭᐅᑎᑖᕈᓐᓇᐅᑏᑦ

ᐃᓘᓐᓇᑎᒃ ᖁᑭᐅᑎᖃᕈᓐᓇᐅᑏᑦ ᐊᒻᒪᓗ ᖁᑭᐅᑎᑖᕈᓐᓇᐅᑏᑦ ᐊᑐᕈᓐᓇᕕᓖᑦ ᐊᕐᕌᒍᓂ ᑕᓪᓕᒪᓂ. ᓓᓴᓐᓰᑦ ᓄᑕᐅᓪᓕᑎᕐᑕᐅᒋᐊᓖᑦ ᐊᑐᕐᕕᓴᖏᑦ ᐃᓱᓕᑉᐸᑕ. ᓄᑕᐅᓪᓕᑎᕐᑕᐅᒋᐊᖃᓕᕐᐸᑦ ᖁᑭᐅᑎᖃᕈᓐᓇᐅᑏᑦ ᐊᒻᒪᓗ ᖁᑭᐅᑎᑖᕈᓐᓇᐅᑏᑦ, ᐅᑯᓄᖕᖓᕆᐊᖃᕐᑐᑎᑦ:

  • ᓄᓇᓕᓯᓐᓂ ᐆᒪᔪᕐᓯᐅᑏᑦ ᓴᐳᒻᒥᔭᐅᕕᖓ ᐁᓪᓚᕆᓪᓗᑎᑦ;
  • ᖃᕆᑕᐅᔭᒃᑰᑎᑦᓯᕕᒃ RCMP website.


ᐃᓕᓐᓂᐊᑎᑦᓯᔨᖑᕈᒪᒍᕕᑦ

ᑲᓇᑕᒥ ᖁᑭᐅᑏᑦ ᐊᑦᑕᓀᑦᑑᒋᐊᖃᕐᓂᖏᓐᓄᑦ ᐃᓕᓭᕕᒻᒥ ᐃᓕᓭᔨᐅᒍᒪᒍᕕᑦ, ᑐᓴᕐᑎᓗᒍ ᓄᓇᓕᓐᓂ ᐆᒪᔪᕐᓯᐅᑏᑦ ᓴᐳᒻᒥᔭᐅᕕᖓ ᐃᓄᑦᔪᐊᒥ ᐅᖄᒍᑎᒃᑯᑦ ᐅᕗᖓ 819-254-8836.