ᐊᑦᑐᐃᓯᐊᕐᓂᖅ/ᐊᑦᑐᐃᓂᕐᓗᓂᖅ

 



Good Touch/Bad Touch


ᓇᓗᓀᕐᓯᒍᑏᑦ

ᐊᑦᑐᐃᓯᐊᕐᓂᖅ/ᐊᑦᑐᐃᓂᕐᓗᓂᖅ ᐱᓇᓱᒐᐅᕗᖅ ᑎᒥᒥᒃ ᐊᑦᑕᓀᑦᑐᒦᑦᑎᓯᓂᕐᒧᑦ. ᐋᕐᕿᒋᐊᕐᑕᐅᓯᒪᔪᖅ ᓄᓇᕕᒻᒥ ᐃᓗᓯᓕᕆᓂᕐᓄᑦ ᑲᑎᒪᔨᓄᑦ, ᑲᑎᕕᐅᑉ ᐳᓖᓯᖏᓐᓄᑦ, ᓄᓇᓕᓕᒫᓂ ᐃᓅᓯᓕᕆᓂᕐᓄᑦ ᐊᒻᒪᓗ ᐅᕕᒃᑫᑦ ᓴᐳᒻᒥᔭᐅᓂᖏᓐᓄᑦ ᑭᒡᒐᑐᕐᕕᓄᑦ, ᐊᒻᒪᓗ ᑲᑎᕕᒃ ᐃᓕᓴᕐᓂᓕᕆᕕᒻᒧᑦ ᐃᓱᒪᒋᔭᐅᑎᓪᓗᒋᑦ ᓄᓇᕕᒻᒥ ᐱᐅᓯᐅᓲᑦ ᐊᑦᔨᐅᓲᒍᖕᖏᓂᖏᓐᓄᑦ ᐊᒻᒪᓗ ᐃᓄᐃᑦ ᐃᓗᒡᒍᓯᖓᑕ. ᐱᓇᓱᒐᖅ ᐃᓕᓐᓂᐊᑎᑦᓯᒍᑕᐅᔪᖅ ᑲᒃᑲᓛᓂᒃ ᐃᓱᕐᕆᓗᑎᒃ ᐅᖃᐅᓯᖃᕈᓐᓇᓯᓂᕐᒥᒃ ᐃᓕᖓᔪᓄᑦ ᐊᑦᑐᐃᓂᕐᒧᑦ. ᐃᓚᐅᔪᑦ ᐃᓕᑦᓯᓲᑦ ᑲᒪᒃᑭᓗᓐᓂᒧᐊᖓᔪᓂᒃ ᐊᒻᒪᓗ ᓱᒋᐊᖃᕋᔭᕐᒪᖔᕐᒥᒃ ᐃᓂᕐᑑᒪᓇᕐᑐᒦᓕᕈᑎᒃ ᐅᕝᕙᓘᓐᓃᑦ ᓱᒃᑯᑕᐅᓂᐅᔭᓕᕈᑎᒃ: ᑭᓇᒧᑦ ᐅᖃᕋᔭᕐᒪᖔᒻᒥᒃ ᐊᒻᒪᓗ ᖃᓄᖅ ᐃᒻᒥᓂᒃ ᐅᖑᒪᑦᓯᐊᕈᓐᓇᓯᒍᓐᓇᒪᖔᕐᒥᒃ. ᐆᑦᑑᑎᒃ, ᐃᓕᓴᕐᑕᐅᓲᑦ "ᐊᐅᑳᕈᓐᓇᓂᕐᒥᒃ", "ᑎᒥᒐ" ᓚᒍᓐᓇᓂᕐᒥᒃ ᐊᒻᒪᓗ "ᑲᒪᒃᑭᓗᑦᑕᐅᓂᕐᒧᑦ ᐸᓯᔭᑦᓴᐅᓚᐅᕐᓯᒪᓂᐊᖕᖏᑐᖓ" ᐃᑉᐱᒋᔭᖃᕈᓐᓀᓗᑎᒃ ᒥᑭᓕᒪᑎᑕᐅᓂᕐᒥᒃ ᑲᖕᖑᓱᓐᓂᒥᓪᓘᓃᑦ.

 

ᖃᓄᖅ ᐱᓇᓱᒐᖅ ᐊᑑᑎᑎᑕᐅᕙᒻᒪᖔᑦ

ᐱᓇᓱᒐᖅ ᐃᖏᕐᕋᑎᑕᐅᕙᑦᑐᖅ ᓄᓇᓕᓐᓂ ᐃᓄᑦᑎᑐᑦ ᐅᖃᐅᓯᖅ ᐊᑐᕐᓱᒍ ᐱᓇᓱᐊᕈᓰᓐᓂ ᒪᕐᕉᓂ ᓱᖏᐅᓐᓂᖃᑦᓯᐊᑐᓄᑦ ᐃᓱᕐᕆᑎᑦᓯᔨᓄᑦ ᓴᐳᑦᔭᐅᓂᖃᕐᓱᑎᒃ ᓄᓇᓕᓐᓂ ᑲᒪᒋᐊᕐᑎᓄᑦ.

ᐱᓇᓱᒐᐅᑉ ᐱᓇᓱᐊᕈᓯᖏᑦᑕ ᓯᕗᓪᓕᐹᖓᓂ, ᓱᖏᐅᑎᓴᕐᑎᓯᓂᕐᓄᑦ ᑲᑎᒪᑎᑦᓯᓃᑦ ᐊᒻᒪᓗ ᐃᑉᐱᒍᓱᓕᕐᑎᓯᒋᐊᕐᓃᑦ ᐊᒻᒪᓗ ᒪᒥᓴᕐᓃᑦ ᑲᔪᓯᑎᑕᐅᓲᑦ ᑐᕌᖓᑎᓪᓗᒋᑦ ᐱᓇᓱᑦᑎᓄᑦ ᑲᒪᔨᓪᓚᕆᓐᓄᑦ, ᐊᒻᒪᓗ ᑐᑭᓯᐅᑎᑦᓭᑦ ᑐᓴᕐᑕᐅᑎᑕᐅᑦᓱᑎᒃ (ᐃᓚᐅᑎᓪᓗᒍ ᑐᓴᐅᑎᒃᑰᕈᑎᖃᕐᓂᖅ) ᑲᒃᑲᓛᑦ ᐊᖓᔪᕐᖄᖏᑦ ᐊᒻᒪᓗ ᓄᓇᓕᓐᓄᑦ ᐃᓚᐅᔪᑦ ᑲᑎᒪᑎᑕᐅᑎᓪᓗᒋᑦ. ᐊᒻᒪᓗ, ᑐᑭᓯᐅᑎᑦᓭᑦ ᐊᓪᓚᓯᒪᔪᑦ ᐊᒻᒪᓗ ᑕᒪᑐᒧᖓᐅᓕᖓᔪᑦ ᓴᓇᕐᕈᑏᑦ ᐃᓄᓐᓅᖃᕐᑕᐅᓲᒍᒻᒥᔪᑦ.

ᐱᓇᓱᒐᐅᑉ ᐱᓇᓱᐊᕈᓯᖏᑦᑕ ᑐᖓᓕᐊᓂ, ᑲᒃᑲᓛᑦ ᐃᓕᓴᕆᐊᓕᕐᓵᑐᑦ ᑎᑭᑦᓱᒋᑦ ᐳᕐᑐᓂᓖᑦ 6-ᒥᒃ ᐃᓚᐅᓲᑦ ᐊᑦᔨᒌᖕᖏᑐᓄᑦ ᑕᓪᓕᒪᓂᒃ ᐅᓪᓗᑐᕐᑐᓄᑦ ᑲᑎᒪᑎᑕᐅᓂᕐᓄᑦ. ᐅᓪᓗᒥ ᑭᖑᓪᓕᐹᒥ, ᑐᑭᓯᒪᓂᖏᑦ ᐃᓕᓴᐅᑎᓂᒃ ᖃᐅᔨᓴᕐᑕᐅᓲᑦ. ᑐᑭᓯᐅᑎᑦᓭᑦ ᐊᑦᔨᒌᖕᖏᑐᓂ ᑲᑎᒪᑎᑦᓯᓂᕐᓄᑦ ᐋᕐᕿᓯᒪᔪᑦ ᓈᒻᒪᓱᑎᒃ ᐅᑭᐅᖏᓐᓄᑦ, ᖃᐅᔨᒪᓂᖏᓐᓄᑦ ᐊᒻᒪᓗ ᐱᕈᕐᐸᓕᐊᓯᒪᓂᖏᓐᓄᑦ ᐃᓚᐅᔪᑦ. ᑲᑎᒪᑎᑦᓯᓃᑦ ᐅᖃᐅᓯᖃᕐᕕᐅᓲᑦ ᐊᑦᔨᒌᖕᖏᑐᓂᒃ ᐊᕐᖁᑎᒋᑦᓱᒋᑦ ᐅᓂᒃᑳᑦ, ᑕᑯᓐᓇᕋᑦᓭᑦ ᐊᒻᒪᓗ ᐱᖕᖑᐊᕈᑏᑦ. ᖃᐅᔨᓴᕐᓂᓄᑦ ᑲᑎᒪᓃᑦ ᐊᒻᒪᓗ ᐊᓕᐊᓇᖕᖑᐊᑐᑦ ᓄᓇᓕᓐᓂ ᑲᑎᒪᑎᑦᓯᓃᑦ ᑲᔪᓯᑎᑕᐅᓲᒍᒻᒥᔪᑦ ᐱᓇᓱᐊᕈᓰᑦ ᑐᖓᓕᐊᓂ.

 

ᑐᑭᓯᒋᐊᓪᓚᕕᑦᓭᑦ

ᐃᑲᔪᕐᑕᐅᒍᒪᔪᑦ ᑲᔪᓯᑎᑦᓯᒍᒪᓗᑎᒃ ᐊᑦᑐᐃᓯᐊᕐᓂᖅ/ᐊᑦᑐᐃᓂᕐᓗᓂᖅ ᐱᓇᓱᒐᕐᒥᒃ ᓄᓇᓕᒥᓃᓪᓗᑎᒃ ᐅᕝᕙᓘᓐᓃᑦ ᑐᑭᓯᒋᐊᓪᓚᕈᒪᔪᑦ ᐱᓇᓱᒐᕐᒧᐊᖓᔪᓂᒃ, ᐅᖄᕕᖃᕈᓐᓇᑐᑦ ᑲᑎᕕᐅᑉ ᐳᓖᓯᖏᑦᑕ ᐱᓂᕐᓗᕕᐅᑎᑦᓯᑌᓕᔨᖓᓂᒃ, ᓕᓯ ᐋᓗᐸᒥᒃ, ᐅᖄᒍᑎᒃᑯᑦ ᐅᕗᖓ ᐅᖄᕕᒋᓗᒍ 819-964-2488.

ᑐᑭᓯᐅᑎᑦᓴᒋᐊᓪᓓᑦ ᐅᕙᓃᒥᔪᑦ ᓄᓇᕕᒻᒥ ᓄᓇᓕᓕᒫᓂ ᐃᓗᓯᓕᕆᓂᕐᓄᑦ ᑲᑎᒪᔩᑦᖃᕆᑕᐅᔭᒃᑯᑦ ᑕᑯᑦᓴᐅᑎᑦᓯᕕᖓ.