ᕿᓂᕐᓂᖅ ᐊᒻᒪᓗ ᐱᐅᓕᑦᓯᓂᖅ

 

    ᓇᓗᓀᕐᓯᐅᑏᑦ

    ᑲᑎᕕᐅᑉ ᐳᓖᓯᖏᑦ ᑭᒡᒐᑐᕐᑎᐅᕗᑦ ᑲᒪᒋᔭᖃᕐᓱᑎᒃ ᐊᐅᓚᑦᓯᓂᕐᓂᒃ ᓄᓇᑐᐃᓐᓇᒥ ᐊᓯᐅᔪᖃᕐᐸᑦ ᕿᓂᕐᓂᓂᒃ ᐊᒻᒪᓗ ᐃᓅᓕᕐᓯᒐᓱᐊᕐᓂᓂᒃ ᓄᓇᕕᒻᒥ ᐃᑲᔪᕐᑕᐅᓯᐊᕐᓱᑎᒃ ᓄᓇᓕᓐᓄᑦ, ᓄᓇᓕᓕᒫᓄᑦ ᐊᒻᒪᓗ ᐊᖓᔪᕐᖄᓄᑦ. 2012-ᒥᓂᑦ, ᑲᑎᕕᐅᑉ ᐳᓖᓯᖏᑦ ᐱᓇᓱᐊᖃᑎᒋᔭᐅᓪᓚᕆᑦᓯᒪᓕᕐᒥᔪᖅ ᑲᑐᑦᔨᔪᑦ ᐃᓅᓕᑦᓯᒐᓱᐊᕐᓂᖏᓐᓂᒃ ᑲᔪᓯᑎᑦᓯᕕᒻᒥᒃ (ᐃᖏᕐᕋᑎᑕᐅᔪᖅ ᑲᓇᑕᒥ ᐅᓇᑕᕐᑎᓄᑦ ᐱᓇᓱᐊᖃᑕᐅᑎᓪᓗᒋᑦ ᑲᓇᑕᐅᑉ ᓯᑦᔭᖓᓂ ᐃᑉᐱᒍᓱᑦᑏᑦ) ᕿᓂᕐᓂᖃᕆᐊᖃᓕᕐᐸᑦ ᑕᕆᐅᒥ ᐅᕝᕙᓘᓐᓃᑦ ᑎᒻᒥᔫᒃᑯᑦ ᖃᓄᐃᓕᖕᖓᓯᒪᔪᓂ ᓄᓇᕕᒻᒥ ᐊᒻᒪᓗ ᓄᓇᕕᐅᑉ ᑭᓪᓕᖏᓐᓂ.

    ᐊᐅᓚᓚᖓᔪᑦ ᓄᓇᒥ ᐊᒻᒪᓗ ᓄᓇᓕᓕᒫᑦ ᓯᑦᔭᖏᓐᓂ ᑲᒪᒋᔭᖃᕆᐊᓖᑦ ᖃᐅᔨᒪᓂᕐᒥᓂᒃ ᐃᓅᒐᓱᐊᕈᑎᑦᓴᓂᒃ ᐊᓐᓇᒐᓱᐊᕈᑎᒋᒐᔭᕐᑕᒥᓂᒃ ᐊᒻᒪᓗ ᐊᑦᑕᓀᑦᑐᒦᒍᑎᒋᒐᔭᕐᑕᒥᓂᒃ ᖃᐅᔨᒪᓂᖃᕆᐊᖃᕐᓂᒥᓂᒃ, ᐊᒻᒪᓗ ᑌᒪᖕᖓᑦ ᐊᑦᔭᓯᒋᐊᖃᕐᓱᑎᒃ ᓈᒻᒪᑐᓂᒃ ᐱᐅᒃᑯᑎᓂᒃ ᐃᓅᒐᓱᐊᕈᑎᑦᓴᒥᓂᒃ.


    ᓄᓇᒦᑦᑐᓂᒃ ᕿᓂᕐᓂᓄᑦ ᐊᒻᒪᓗ ᐃᓅᓕᑦᓯᒐᓱᐊᕐᓂᓄᑦ ᒪᓕᒉᑦ

    ᓄᓇᒥ, ᑕᓯᕐᒥ ᐊᒻᒪᓗ ᑰᒻᒥ ᕿᓂᕐᓂᓂᒃ ᐊᒻᒪᓗ ᐃᓅᓕᑦᓯᒐᓱᐊᕐᓂᓂᒃ ᐸᕐᓀᓯᒪᐅᑏᑦ ᓄᓇᕕᒻᒥ ᒪᓂᒪᑎᑦᓯᕗᑦ ᐱᖓᓱᐃᓕᖓᔪᓂᒃ ᐱᓪᓚᕆᑉᐸᓕᐊᒍᑎᑦᓴᓂᒃ ᐅᐃᒪᓇᕐᑐᖃᓕᕐᐸᑦ. ᑖᒃᑯᐊ ᐳᕐᑐᓕᕇᑦ ᐃᓗᓕᖃᕐᑎᓗᒋᑦ ᐊᑦᔨᒌᖕᖏᑐᓂᒃ ᖃᓄᐃᓕᒋᐊᕈᑎᑦᓴᓂᒃ ᐊᒻᒪᓗ ᐸᕐᓀᓯᒪᐅᑎᑦᓴᓂᒃ.

    ᐳᕐᑐᓂᖅ 1

    ᐊᑑᑎᔭᖅ A: ᐃᓄᒃ ᐅᕝᕙᓘᓐᓃᑦ ᑲᑎᒪᔪᑦ ᐃᓄᐃᑦ ᐊᐅᓚᔪᑦ ᓄᓇᓖᑦ ᓯᓚᑖᓂ ᐅᑎᖕᖏᒪᑕ ᐱᖏᒋᔭᐅᓕᕐᓱᑎᒃ ᑎᑭᒻᒣᑑᒻᒪᑕ ᐁᕕᒋᓂᐊᕐᑕᕕᓂᕐᒥᓄᑦ ᐅᕝᕙᓘᓐᓃᑦ ᓇᔪᕆᐊᓚᖓᔭᕕᓂᕐᒥᓄᑦ.

    ᐱᐅᓯᕆᔭᖅ B: ᐃᓄᒃ ᐅᕝᕙᓘᓐᓃᑦ ᑲᑎᒪᔪᑦ ᐃᓄᐃᑦ ᐁᔭᐅᑲᓪᓚᒐᓱᐊᕆᐊᓖᑦ ᐊᑦᑕᓇᕐᑐᒦᓕᕐᓂᒥᓄᑦ ᐅᕝᕙᓘᓐᓃᑦ ᐋᓐᓂᐊᓯᐅᑎᓄᑦ ᑲᒪᒋᔭᐅᑲᐱᒋᐊᖃᕐᑐᖃᓕᕐᐸᑦ.

     

    ᐊᑑᑎᔭᖅ A-ᒦᑦᑐᒧᑦᓭᓇᖅ:

      • ᐃᓄᒃ ᐊᓯᐅᔪᖅ ᓄᓇᓕᒥᐅᒍᑉᐸᑦ, ᐃᓚᒋᔭᐅᔪᖅ ᐊᒻᒪᓗ ᐃᓚᓐᓈᖏᑦ ᓄᓇᓕᓐᓂ ᕿᓂᕐᖄᓲᑦ ᐃᓄᒃ ᐱᖏᒋᔭᖅ ᓄᓇᓕᓐᓄᑦ ᐅᑎᕐᒣᑑᒻᒪᖔᑦ (ᖃᐅᔨᒪᒍᓐᓀᓗᓂ ᐱᖏᒋᔭᐅᓂᕐᒥᓂᒃ) ᖃᐅᔨᒐᓱᐊᕐᖄᕆᐊᖃᕋᔭᕐᑐᑦ;
      • ᐃᓚᒥᓄᑦ ᐊᒻᒪᓗ ᐃᓚᓐᓈᒥᓄᑦ ᑕᑯᔭᐅᖕᖏᐸᑦ, ᓄᓇᓕᓐᓂ ᓯᕗᓕᕐᑎ ᐱᒋᐊᕐᑎᓯᒐᔭᕐᑐᖅ ᓄᓇᓕᓐᓂ ᐅᐃᒪᓇᕐᑐᖃᓕᕐᐸᑦ ᐃᖏᕐᕋᑎᑦᓯᒍᑎᓂᒃ ᐊᒻᒪᓗ ᑲᔪᓯᑎᓗᒋᑦ ᐸᕐᓀᓯᒪᐅᑏᑦ, ᑲᔪᓯᑎᑦᓯᓗᓂᓗ ᐊᒻᒪᓗ ᐱᒋᐊᕐᑎᓯᓗᓂ ᓄᓇᒥ ᕿᓂᕐᑐᓂᒃ;
      • ᐃᓄᒃ ᐊᓯᐅᔪᖅ ᓄᓇᓕᒥᐅᒍᖕᖏᐸᑦ, ᑲᑎᕕᐅᑉ ᐳᓖᓯᒃᑯᖏᑦᑕ ᐊᖓᔪᕐᖄᖓ ᕿᓄᕕᖃᓲᖅ ᓄᓇᓕᓐᓂ ᓯᕗᓕᕐᑎᒥᒃ ᐃᖏᕐᕋᓯᑎᑦᓯᖁᑦᓱᒍ ᓄᓇᓕᓐᓂ ᐅᐃᒪᓇᕐᑐᖃᓕᕐᐸᑦ ᑲᔪᓯᑎᒐᑦᓴᓂᒃ, ᐊᒻᒪᓗ ᑲᔪᓯᑎᓗᒋᑦ ᐸᕐᓀᓯᒪᐅᑏᑦ, ᑲᔪᓯᑎᑦᓯᓗᓂᓗ ᐊᒻᒪᓗ ᐱᒋᐊᕐᑎᓯᓗᓂ ᓄᓇᒥ ᕿᓂᕐᑐᓂᒃ;

      ᐊᑑᑎᔭᖅ B-ᒦᑦᑐᒧᑦᓭᓇᖅ:

      • ᑲᑎᕕᐅᑉ ᐳᓖᓯᖏᑦᑕ ᐊᖓᔪᕐᖄᖓ ᐃᑲᔪᕐᑕᐅᓗᓂ ᓄᓇᓕᓐᓂ ᓯᕗᓕᕐᑎᒧᑦ ᖃᓄᑐᐃᓐᓇᖅ ᐊᐅᓚᑦᔦᓂᐅᒋᐊᓕᓐᓂᒃ ᑲᔪᓯᑎᑦᓯᒐᔭᕐᑐᖅ;
      • ᑲᑎᕕᐅᑉ ᐳᓖᓯᖏᑦᑕ ᐊᖓᔪᕐᖄᖓ ᑐᑭᑖᕈᓐᓇᕋᔭᕐᑐᖅ ᑕᒉᓐᓇᖅ ᐳᕐᑐᓰᒋᐊᕐᓗᓂ ᐊᓯᐅᒪᔪᒥᒃ ᕿᓂᕐᓂᒥᒃ ᐊᒻᒪᓗ ᐃᓅᓕᑦᓯᒐᓱᐊᕐᓂᒥᒃ ᐃᓕᓗᒋᑦ ᐳᕐᑐᓂᖅ 3-ᒧᑦ.

       


    ᐳᕐᑐᓂᖅ 2

    ᐳᕐᑐᓂᖅ 2 ᖃᓄᐃᓕᒋᐊᕈᑎᑦᓴᖅ ᑲᔪᓯᑎᑕᐅᒐᔭᕐᑐᖅ ᐳᕐᑐᓂᖅ 1-ᒦᑦᑐᑦ ᓱᒍᑕᐅᖕᖏᐸᑕ.

    • ᓄᓇ ᕿᓂᕐᕕᐅᔪᖅ ᐊᖏᓕᒋᐊᕐᑕᖅ;
    • ᑐᖕᖓᕕᒋᓗᒋᑦ ᐃᒫᙰᕈᑎᖏᑦ ᓄᓇᓕᓐᓂ ᐅᐃᒪᓇᕐᑐᖃᓕᕐᐸᑦ ᐃᖏᕐᕋᓯᑎᑦᓯᕕᐅᑉ, ᓄᓇᓕᓐᓂ ᓯᕗᓕᕐᑎ ᐊᒻᒪᓗ ᓄᓇᓕᓐᓂ ᑲᑎᕕᐅᑉ ᐳᓖᓯᖏᑦ ᕿᓄᕕᖃᕈᓐᓇᑐᑦ ᑲᑎᕕᐅᑉ ᐳᓖᓯᖏᑦᑕ ᐊᖓᔪᕐᖄᖓᓂᒃ ᐊᑐᕐᑕᐅᖁᔨᓗᑎᒃ ᑎᒻᒥᔫᒥᒃ ᐅᕝᕙᓘᓐᓃᑦ ᖁᓛᒻᒥᒎᓕᒻᒥᒃ ᕿᓂᕐᓂᖅ ᐱᕙᓪᓕᕆᐊᕐᓗᒍ;
    • ᑲᑎᕕᐅᑉ ᐳᓖᓯᖏᑦᑕ ᐊᖓᔪᕐᖄᖓ ᓵᑕᕈᓐᓇᑐᖅ ᑎᒻᒥᔫᒥᒃ ᐅᕝᕙᓘᓐᓃᑦ ᖁᓛᒻᒥᒎᓕᒻᒥᒃ;
    • ᑲᑎᕕᐅᑉ ᐳᓖᓯᖏᑦᑕ ᐊᖓᔪᕐᖄᖓ ᑐᓴᕐᑎᓯᔪᖅ ᑯᐯᑉ ᐳᓖᓯᒃᑯᖏᓐᓂᒃ Sûreté du Québec (SQ).

     

    ᐳᕐᑐᓂᖅ 3

    ᐳᕐᑐᓂᖅ 3 ᖃᓄᐃᓕᒋᐊᕈᑎᑦᓴᖅ ᑲᔪᓯᑎᑕᐅᒐᔭᕐᑐᖅ ᐳᕐᑐᓂᖅ 2-ᒦᑦᑐᑦ ᓱᒍᑕᐅᖕᖏᐸᑕ.

     

    • ᑲᑎᕕᐅᑉ ᐳᓖᓯᖏᑦᑕ ᐊᖓᔪᕐᖄᖓ ᕿᓄᕕᓕᒃ ᐃᑲᔪᕐᑕᐅᒍᒪᑦᓱᓂ ᑯᐯᑉ ᐳᓖᓯᖏᓐᓄᑦ SQ;
    • SQ ᓯᖏᑦᓯᔪᖅ ᕿᓂᕐᓃᑦ ᐊᒻᒪᓗ ᐃᓅᓕᑦᓯᒐᓱᐊᕐᓃᑦ ᐃᖏᕐᕋᓂᖏᓐᓂᒃ ᑲᒪᓯᑦᓱᓂ;
    • ᑲᑎᕕᐅᑉ ᐳᓖᓯᖏᑦᑕ ᐊᖓᔪᕐᖄᖓ ᓄᓇᓕᓐᓂ ᓯᕗᓕᕐᑎᒥᒃ ᑐᓴᐅᒪᑎᑦᓯᔪᖅ ᖃᓄᑐᐃᓐᓇᖅ ᐱᕙᓪᓕᐊᔭᐅᔪᓂᒃ ᕿᓂᕐᑐᓂ ᐊᒻᒪᓗ ᐃᓅᓕᑦᓯᒐᓱᐊᕐᑐᓂ ᐃᖏᕐᕋᓂᕐᓂ ᐃᓄᒃ ᐊᓯᐅᒪᔪᖅ ᓄᓇᓕᒥᐅᒍᑉᐸᑦ;
    • ᑐᑭᑖᕐᓂᖅ ᐃᓱᓕᑎᑦᓯᓚᖓᓂᕐᒥᒃ ᕿᓂᕐᓂᓄᑦ ᐊᒻᒪᓗ ᐃᓅᓕᑦᓯᒐᓱᐊᕐᓂᓄᑦ ᐃᖏᕐᕋᓂᕐᓂᒃ ᐃᓱᒪᒥᐅᑕᐅᔪᖅ SQ-ᒃᑯᓄᑦ. ᑭᓯᐊᓂ, ᐃᓄᒃ ᐊᓯᐅᒪᔪᖅ ᐃᓚᐅᑉᐸᑦ ᔦᒥᔅ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑎᒧᑦ (ᐊᖏᖃᑎᒌᒍᑎᒃ) ᐊᒻᒪᓗ ᓄᓇᓖᑦ ᐃᖏᕐᕋᓂᕐᓂᒃ ᑲᔪᓯᔭᐅᖁᔨᑉᐸᑕ SQ ᕿᓂᕐᓂᒥᒃ ᐃᓱᓕᑎᑦᓯᒐᓗᐊᕐᐸᑦ, ᑮᓇᐅᔦᑦ ᐃᑲᔪᕐᓯᐅᑎᑦᓭᑦ ᕿᓄᒍᑕᐅᒍᓐᓇᑐᑦ ᐃᓘᓐᓀᓄᑦ ᑲᒪᔨᒻᒪᕆᖓᓄᑦ ᑫᐋᔩᑉ ᐊᒻᒪᓗ ᐱᔭᐅᑎᑕᐅᒍᓐᓇᓗᑎᒃ ᐅᓄᕐᓂᐸᐅᑎᓪᓗᒋᑦ ᓈᒻᒪᑐᑦ ᐅᓪᓗᓄᑦ ᓯᑕᒪᐅᔪᖕᖏᒐᕐᑐᓄᑦ.                

                                                                                                          

    ᐃᓗᐃᒃᑫᑦ ᓇᓗᓀᕐᓯᓯᒪᐅᑏᑦ ᐱᔭᐅᒍᒪᒍᑎᒃ, ᑕᑯᒐᓱᐊᕐᓗᒋᑦ ᒪᓕᒉᑦ ᓄᓇᒥ ᐊᓯᐅᒪᔪᒥᒃ ᕿᓂᕐᓂᓄᑦ ᐊᒻᒪᓗ ᐃᓅᓕᑦᓯᒐᓱᐊᕐᓂᓄᑦ ᑲᑎᕕᐅᑉ ᓄᓇᖁᑎᖓᓂ (2009).


    ᑕᕆᐅᒥ ᐊᒻᒪᓗ ᑎᒻᒥᔫᕐᓱᑎᒃ ᓱᒃᑯᐊᕿᔪᓂᒃ ᕿᓂᕐᓂᓄᑦ ᐊᒻᒪᓗ ᐃᓅᓕᑦᓯᒐᓱᐊᕐᓂᓄᑦ ᒪᓕᒉᑦ

    ᓇᓗᓀᕐᓯᐅᑏᑦ

    ᑎᒻᒥᔫᕐᓱᑎᒃ ᖃᓄᐃᓕᖕᖓᓯᒪᔪᑦ - ᑎᒻᒥᔫᒃᑰᓱᑎᒃ ᓱᒃᑯᐊᕿᔪᑦ

    ᑕᕆᐅᒥ ᑌᒣᓕᔪᑦ - ᐊᑑᑎᔪᖅ ᐅᒥᐊᑦ ᐃᖏᕐᕋᕕᒋᒍᓐᓇᑕᖓᓂ (ᐆᑦᑑᑎᒃ, ᐃᒪᕐᒥ ᐅᒥᐊᕐᕈᐊᒃ ᐃᖏᕐᕋᕕᒋᓲᖏᓐᓂ) ᐅᕝᕙᓘᓐᓃᑦ ᐃᒪᐅᑉ ᓯᑦᔭᖏᓐᓂ (ᓇᓂᑐᐃᓐᓇᖅ ᐃᒪᕐᒥ, ᑕᓯᐅᔭᒥ ᐅᕝᕙᓘᓐᓃᑦ ᑰᒻᒥ ᐅᒥᐊᕐᑐᕕᐅᒍᓐᓇᑐᒥ ᑎᑭᓪᓗᒍ 1 ᒣᓪ ᓄᓇᒦᕙᓯᑦᑐᒥ ᐅᕝᕙᓘᓐᓃᑦ ᓯᕗᓪᓕᐹᒧᑦ ᐃᓄᓐᓄᑦ ᓴᓇᔭᕕᓂᖅ ᑎᑭᓪᓗᒍ, ᐆᑦᑑᑎᒋᓗᒍ ᐃᒪᕐᒥᒃ ᐃᖄᕐᕕᒃ) ᐊᑐᕐᑕᐅᑎᓪᓗᒍ ᐃᒪᒃᑯᑦ ᐃᖏᕐᕋᐅᑎᒃ, ᐃᓚᐅᑎᓪᓗᒋᑦ ᐅᐃᒪᓇᕐᓯᔪᑦ ᐃᓄᐃᑦ ᐅᑭᐊᒃᑯᑦ ᓱᒃᑯᐊᕿᑦᓱᑎᒃ.

    ᐱᓇᓱᐊᒐᖏᑦ JRCC

    ᑲᑐᑦᔨᔪᑦ ᐃᓅᓕᑦᓯᒐᓱᐊᕐᓂᒥᒃ ᑲᔪᓯᑎᑦᓯᕕᖓ (JRCC) ᐃᖏᕐᕋᑎᑕᐅᔪᖅ ᑲᓇᑕᒥ ᐅᓇᑕᕐᑏᑦ ᐃᓚᒋᑦᓱᒋᑦ ᑲᓇᑕᒥ ᓯᑦᔭᒥ ᐃᑉᐱᒍᓱᑦᑏᑦ. JRCC ᐃᓗᐃᒃᑲᑎᒍᑦ ᑲᒪᒋᔭᖃᓲᖅ ᐸᕐᓀᓂᓂᕐᓂᒃ, ᑲᔪᓯᑎᑦᓯᓂᕐᓂᒃ, ᐊᐅᓚᑦᓯᓂᕐᓂᒃ ᐊᒻᒪᓗ ᑕᕆᐅᒥ ᐊᒻᒪᓗ ᑎᒻᒥᔫᒃᑯᑦ ᖃᓄᐃᓕᖕᖓᑐᓂᒃ ᕿᓂᕐᓂᓂᒃ ᐊᒻᒪᓗ ᐃᓅᓕᑦᓯᒐᓱᐊᕐᓂᓂᒃ (SAR) ᐃᖏᕐᕋᓂᖏᓐᓂᒃ ᑕᒪᒃᑯᐊ ᓄᓇᕕᒻᒥ ᐊᒻᒪᓗ ᓄᓇᕕᐅᑉ ᑭᓪᓕᖏᓐᓂ.

    ᐃᓘᓐᓇᑎᒃ ᑕᕆᐅᒥ ᐊᒻᒪᓗ ᑎᒻᒥᔫᑦ ᖃᓄᐃᓕᖕᖓᑐᑦ ᕿᓂᕐᓃᑦ ᐃᓅᓕᑦᓯᒐᓱᐊᕐᓃᓗ ᐃᖏᕐᕋᓂᖏᓐᓂ, JRCC ᐃᒣᓲᖅ:

    • ᓱᕐᖁᐃᓯᓗᑎᒃ ᐊᒻᒪᓗ ᕿᓄᒍᑎᖃᕐᓗᑎᒃ ᓈᒻᒪᓂᕐᐹᓂᒃ ᐱᓇᓱᐊᕈᑎᑦᓴᓂᒃ ᕿᓂᕐᑐᓴᓂᓪᓗ.
    • ᕿᓄᕕᖃᓲᖅ ᐃᑲᔪᕐᑕᐅᒍᒪᑦᓱᓂ ᓄᓇᓕᓐᓄᑦ ᓈᒻᒪᓂᕐᐹᓄᑦ ᐃᑲᔪᕈᑎᖃᖁᑦᓱᒋᑦ ᐃᒣᑦᑐᐃᑦ ᐆᑦᑑᑎᒋᑦᓱᒋᑦ:
      • ᕿᓂᕈᑕᐅᔪᑦᓭᑦ ᐊᒻᒪᓗ ᐃᓅᓕᑦᓯᒋᐊᕈᑎᑦᓭᑦ ᐅᒥᐊᑦ;
      • ᑲᓇᑕᒥ ᐅᓇᑕᕐᑎᓭᑦ ᐃᓚᒌᕝᕕᖓᓄᑦ ᐃᑲᔪᕐᑕᐅᒍᒪᑦᓱᑎᒃ;
      • ᖃᒥᑎᕆᔩᑦ;
      • ᐅᐃᒪᓇᕐᑐᓕᕆᔩᑦ;
      • ᐊᓯᖏᑦ ᓄᓇᓕᓐᓂ ᐃᑲᔪᕐᑐᓭᑦ.

    ᐅᐃᒪᓇᕐᓯᔪᑦ ᐳᐃᑦᔪᕋᕐᓱᑎᒃ, ᐊᕐᖃᐅᒪᑦᓱᑎᒃ ᐅᕝᕙᓘᓐᓃᑦ ᐃᓄᐃᒃ ᐅᐃᑕᐅᔪᑦ, ᐃᒪᑎᒍᑦ ᐃᖏᕐᕋᐅᑎᑦᓴᔭᐅᖕᖏᑐᓄᑦ ᐃᒫᒎᕐᑐᑦ, ᐃᓅᑉ ᖃᓄᐃᓕᖕᖓᕈᑎᐅᓂᕋᕐᑕᐅᒍᑎᖏᑦ. ᑲᒪᒋᔭᐅᒋᐊᖃᕐᓂᖏᑦ ᐃᓅᑉ ᖃᓄᐃᓕᖕᖓᕈᑎᖏᑦ ᑲᒪᒋᔭᑦᓴᔭᕆᖕᖏᑕᖏᑦ JRCC, ᑲᑎᕕᐅᑉ ᐳᓖᓯᖏᑦᑕ ᑲᒪᒋᔭᑦᓴᔭᕆᒻᒣᑦ ᒪᓕᑦᓱᒋᑦ ᒪᓕᒉᑦ ᓄᓇᒥ ᐊᓯᐅᒪᔪᒥᒃ ᕿᓂᕐᓂᓄᑦ ᐊᒻᒪᓗ ᐃᓅᓕᑦᓯᒐᓱᐊᕐᓂᓄᑦ ᑲᑎᕕᐅᑉ ᓄᓇᖁᑎᖓᓂ.

     

    ᐱᓇᓱᐊᒐᖏᑦ ᑲᑎᕕᐅᑉ ᐳᓖᓯᖏᑦᑕ

    ᓯᕗᓪᓕᐹᒥ ᑲᑎᕕᐅᑉ ᐳᓖᓯᖓ ᑐᓴᕈᓂ ᑕᕆᐅᒥ ᐅᕝᕙᓘᓐᓃᑦ ᑎᒻᒥᔫᑉ ᓱᒃᑯᐊᕿᓂᖓᓂᒃ ᐃᒣᒐᔭᕐᑐᖅ:

    • ᑐᓴᕐᑎᓗᒋᑦ ᓄᓇᓖᑦ ᑲᕙᒫᐱᖓᑕ ᐅᐃᒪᓇᕐᑐᓕᕆᓂᕐᓄᑦ ᑭᒡᒐᑐᕐᕕᖓ;
    • ᐃᑲᔪᕐᓗᒍ ᓄᓇᓖᑦ ᑲᕙᒫᐱᖓᑕ ᐅᐃᒪᓇᕐᑐᓕᕆᓂᕐᓄᑦ ᑭᒡᒐᑐᕐᕕᖓ ᐳᑯᑦᑎᓗᒍ ᑐᑭᓯᐅᑎᑦᓴᓕᒫᓂᒃ ᐃᓕᖓᔪᓂᒃ ᓱᒃᑯᐊᕿᔪᓄᑦ ᐃᑲᔪᕐᓯᐅᑎᐅᓚᖓᔪᓂᒃ ᕿᓂᕐᑐᓂᒃ ᐊᒻᒪᓗ ᐃᓅᓕᑦᓯᒐᓱᐊᕐᑐᓂᒃ;
    • ᑕᒉᓐᓇᖅ ᑐᓴᕐᑎᓗᒍ ᑲᑎᕕᐅᑉ ᐳᓖᓯᖏᑦᑕ ᐊᖓᔪᕐᖄᖓ.

    ᑲᑎᕕᐅᑉ ᐳᓖᓯᖏᑦᑕ ᐊᖓᔪᕐᖄᖓ ᐅᑯᓂᖓ ᑲᔪᓯᑎᑦᓯᒐᔭᕐᑐᖅ:

    • ᑐᓴᕐᑎᓯᓗᓂ JRCC-ᒥᒃ ᐊᑑᑎᔪᒥᒃ ᐊᒻᒪᓗ ᓅᑦᓯᓗᓂ ᐊᐅᓚᑕᐅᓂᖏᓐᓂᒃ ᕿᓂᕐᑐᑦ ᐊᒻᒪᓗ ᐃᓅᓕᑦᓯᒐᓱᐊᕐᑐᑦ ᐃᖏᕐᕋᓂᖏᓐᓂᒃ JRCC-ᒧᑦ;
    • ᑐᓴᕐᑎᓯᓗᓂ JRCC-ᒥᒃ ᐃᓘᓐᓀᓂᒃ ᓄᓇᓕᓐᓂ ᐃᑲᔪᕐᑐᓴᓂᒃ ᕿᓂᕐᑐᑦ ᐊᒻᒪᓗ ᐃᓅᓕᑦᓯᒋᐊᕐᑐᑦ ᐃᖏᕐᕋᓂᖏᓐᓄᑦ;
    • ᑐᓴᕐᑎᓗᒋᑦ ᓄᓇᓖᑦ ᑲᕙᒫᐱᒃᑯᖏᑦ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓ (ᐱᓗᐊᕐᑐᒥᒃ ᐃᓘᓐᓀᓄᑦ ᑲᒪᔨᒻᒪᕆᒻᒥᒃ) ᐊᖓᔪᕐᖄᖏᑦ ᕿᓂᕐᑐᑦ ᐊᒻᒪᓗ ᐃᓅᓕᑦᓯᒐᓱᐊᕐᑐᑦ ᑲᔪᓯᑎᑕᐅᓂᖏᓐᓂᒃ;
    • ᐃᑲᔪᕐᓗᒋᑦ JRCC ᐊᒻᒪᓗ SAR ᐃᖏᕐᕋᓂᖏᑦ ᓄᓇᓕᓕᒫᓂ ᑐᑦᑕᕕᐅᓗᓂ ᐊᒻᒪᓗ ᑲᔪᓯᑎᑦᓯᔨᐅᓗᓂ;
    • ᓇᔪᕐᑎᖃᕐᓗᓂ ᓇᓗᓀᕐᑐᓯᒪᔪᓂᒃ ᐃᖏᕐᕋᓯᑎᑕᐅᖃᑦᑕᑐᑦ ᓇᓗᓀᒃᑯᑕᖏᓐᓂᒃ;
    • ᑐᓴᕐᑎᓯᖃᑦᑕᓗᓂ SAR ᐃᖏᕐᕋᓂᖏᑦ ᖃᓄᐃᓕᖓᓕᕐᒪᖔᑕ ᑐᓴᕐᑕᐅᑎᑕᐅᔪᑦ JRCC-ᒧᑦ ᐊᓯᖏᓐᓂᒃ ᑎᒥᓂᒃ ᐊᒻᒪᓗ ᑲᒪᖃᑕᐅᔪᓂᒃ ᐊᑯᓂᓕᑦᓯᒍᓐᓀᓗᒋᑦ.

    ᐃᓗᐃᒃᑫᑦ ᓇᓗᓀᕐᓯᐅᑎᑕᖏᑦ ᑕᒪᒃᑯᐊ ᐅᕙᓃᑦᑐᑦ ᕿᓂᕐᑐᓄᑦ ᐊᒻᒪᓗ ᐃᓅᓕᑦᓯᒐᓱᐊᕐᑐᓄᑦ ᒪᓕᒉᑦ ᑕᕆᐅᒥ ᐊᒻᒪᓗ ᑎᒻᒥᔫᑦ ᖃᓄᐃᓕᖕᖓᓂᖏᓐᓄᑦ ᑲᑎᕕᐅᑉ ᓄᓇᖁᑎᖓᓂ (2012).

     

    ᑐᑭᓯᒋᐊᓪᓚᕕᑦᓭᑦ

    • ᖃᐅᔨᒋᐊᓪᓚᕈᒪᔪᑦ ᕿᓂᕐᑐᓄᑦ ᐊᒻᒪᓗ ᐃᓅᓕᑦᓯᒐᓱᐊᕐᑐᓄᑦ ᒪᓕᒐᕐᓂᒃ ᓄᓇᕕᒻᒥ ᐊᒻᒪᓗ ᑭᓪᓕᖏᓐᓂ, ᑐᓴᕐᑎᓗᒋᑦ ᑲᑎᕕᐅᑉ ᐳᓖᓯᖏᑦ ᐅᖄᒍᑎᒃᑯᑦ ᐅᕗᖓ 819-964-2488 ᐅᕝᕙᓘᓐᓃᑦ ᐊᑭᖃᖕᖏᑐᒧᑦ ᐅᕗᖓ 1-800-964-2644.